“Praqada baş tutan görüşlərdə ilkin nəzərdə tutulan qərarlar onu deməyə imkan verir ki, Azərbaycan öz istəyinə doğru bir addım daha yaxınlaşdı. Azərbaycan regionda uzunmüddətli sülh və dayanıqlı sülhün əldə olunması üçün irəli sürdüyü təşəbbüs və təklif etdiyi müzakirə gündəliyi artıq həm Ermənistan tərəfindən, həm Makron tərəfindən, həm də Avropa İttifaqının moderatorluğu və xüsusilə Şarl Mişelin səyləri nəticəsində mümkün görünür". Bu sözləri açıqlamasında Milli Məclisin deputatı Naqif Həmzıyev deyib.
Onun sözlərinə görə, xüsusilə də dördtərəfli görüş öncəsi qeyri-rəsmi Ermənistanın naş naziri ilə Türkiyə Prezidentinin söhbətləşməsi və burada müəyyən müzakirələrin aparılması onu deməyə imkan verir ki, bu görüş əvvəlkilərdən xeyli fərqlidir: “Azərbaycanın qalib ölkə və mövqelərini gücləndirmiş tərəf olaraq bu görüşə dəvət edilməsi və ümumi fotoda tam mərkəzdə cənab Prezident İlham Əliyev ilə Türkiyə Prezidenti Rəcəb Tayib Ərdoğanın bir yerdə dayanmaları və bədən dili ilə verdikləri mesaj Azərbaycanın öz istəklərinə doğru addımla irəliləməsinə bariz nümunədir”.
Deputat fikirlərinə davam edərək həmçinin qeyd edib ki, dördtərəfli görüş zamanı Ermənistanın Azərbaycanın ərazi bütövlüyünü tanıması düşünürəm ki, sülhə yaxınlaşmağımızın carçısıdır: "Amma biz unutmayaq ki, sonuncu Brüssel görüşü zamanı da buna bənzər razılaşmalar var idi. Konkret sülh mətninin hazırlanması üçün XİN-ə təlimat da verilmişdi. Lakin biz sentyabrın 12-13-də Ermənistan təxribatının şahidi olduq. Bu əldə olunan razılıqdan sonra biz mövqelərimizi daha da gücləndirmişik. Biz Ermənistanı sülhə məcbur etməliyik, çünki regionda sülh və əmin-amanlıq olmayacağı təqdirdə, iqtisadi inkişafdan və böyük sərmayələrin qoyulmasından söhbət gedə bilməz. Bu baxımdan, sülh həm Azərbaycan, həm Ermənistan, həm də region dövlətləri üçün vacibdir. Biz sülhü dəstəkləyirik”.