"Cənab Prezident İlham Əliyevin sentyabrın 1-də Azərbaycanla İtaliya arasında diplomatik münasibətlərin qurulmasının 30 illiyi çərçivəsində Sercio Mattarellanın dəvəti ilə İtaliyaya işgüzar səfəri Azərbaycanın beynəlxalq arenadakı mövqeyinin daha da güclənməsinin aydın təzahürüdür. Prezident İlham Əliyevin bir neçə gün əvvəl reallaşan bu işgüzar səfəri bütün beynəlxalq aləmin, o cümlədən də çoxsaylı kütləvi informasiya vasitələrinin diqqət mərkəzində olub. İtaliya və Azərbaycan arasındakı çoxşaxəli strateji münasibətlər bu səfər nəticəsində daha da inkişaf edərək yeni bir müstəviyə daşınıb". Bu sözləri açıqlamasında deputat Naqif Həmzəyev deyib.
Onun sözlərinə görə, ölkələrimiz arasında əlaqələr daima yüksək səviyyəsi, hərtərəfliliyi və nümunəvi dinamikası ilə seçilib: "Xüsusilə vurğulamaq istəyirəm ki, İtaliya Avropa İttifaqının üzv ölkələri arasında Azərbaycanın ən önəmli siyasi, iqtisadi və ticarət tərəfdaşıdır. İtaliya ikitərəfli müstəvidə Azərbaycanın strateji tərəfdaşı olmaqla yanaşı, NATO-ya üzv dövlət kimi Azərbaycanla NATO arasındakı əməkdaşlığının güclənməsinə töhfə verməkdə də böyük rol oynayacaqdır.
Azərbaycan eyni zamanda İtaliyanın Cənubi Qafqaz ölkələri arasındakı ən iri ticarət tərəfdaşıdır. Bu baxımdan dövlətlərarası enerji sahəsindəki əməkdaşlığı xüsusi qeyd etmək istəyirəm. Azərbaycan İtaliyanın neft təchizatında birinci, qaz təchizatında isə 3-cü yeri tutur. Cənab Prezident İlham Əliyevin işgüzar səfəri zamanı Çernobbio şəhərində İtaliyanın “İl Sole 24 Ore” qəzetinin müxbiri Roberto Boncorniyə verdiyi müsahibəsində də vurğuladığı kimi Cənub Qaz Dəhlizi və onun tərkib hissəsi olan Trans-Adriatik qaz boru kəməri (TAP) ikitərəfli enerji əməkdaşlığını və İtaliyanın enerji təhlükəsizliyini gücləndirən əhəmiyyətli faktordur. Trans-Adriatik qaz boru kəməri hal-hazırda İtaliyanın qaz tələbatının təxminən 10 faizini qarşılayır, lakin yaxın gələcəkdə Azərbaycanın Avropaya nəql etdiyi qazın həcminin artırılması ilə bağlı Avropa İttifaqı ilə əldə olunan razılaşma nəticəsində TAP vasitəsilə İtaliyanın qaza olan tələbatının ödənilməsinin iki dəfəyə qədər artırılması nəzərdə tutulmuşdur".
Deputat fikirlərinə davam edərək həmçinin qeyd edib ki, Azərbaycanın İtaliya ilə mədəni-humanitar əlaqələr günü-gündən dərinləşməkdədir: "2002-ci il iyunun 1-də Bakıda hökumətlər arasında ‘Mədəniyyət, Elm və Texnologiya sahəsində əməkdaşlıq haqqında Saziş”, Prezident S.Mattarellanın Azərbaycana 2018-ci il 18-19 iyulda dövlət səfəri zamanı iki ölkənin təhsil nazirlikləri arasında “Ali təhsil üzrə Birgə Bəyannamə”, 2020-ci ilin fevralında isə “Çoxölçülü Strateji Tərəfdaşlığın Gücləndirilməsinə dair Birgə Bəyannamə”nin imzalanması sözügedən sahələrdə əməkdaşlığı yeni bir mərhələyə qaldırmışdır.
Səfər çərçivəsində Azərbaycanın ADA Universiteti ilə İtaliyanın beş aparıcı ali təhsil müəssisəsi - Luiss Guido Carli Universiteti, Romanın Sapienza Universiteti, Turin Politexnik Universiteti, Alma Mater Bolonya Universiteti və Milan Politexnik Universiteti arasında akademik əməkdaşlığa dair imzalanmış sazişlərin mübadiləsi sadəcə olaraq iki dövlət arasında təhsil sahəsində əməkdaşlığı gücləndirməklə kifayətlənməyəcək. Azərbaycan-İtaliya Universitetinin yaradılması həmçinin də İtaliya-Azərbaycan dostluğu mərkəzinə çevriləcəkdir. Dünyanın bir sıra qədim şəhərlərindən sonra Romanın mərkəzi hissəsində, tarixi məhəlləsində səfirliyimizin yeni binasının, Azərbaycanın Mədəniyyət Mərkəzinin açılması Azərbaycan-İtaliya münasibətlərinin son 20 ildə daha da inkişaf etdiyini deməyə əsas verir.
Sonda qeyd etmək istəyirəm ki, İtaliya Ermənistan-Azərbaycan, Dağlıq Qarabağ münaqişəsinin həlli istiqamətində aparılan müzakirələrdə həmişə Azərbaycanın haqlı mövqeyini dəstəkləyib, ölkəmizin səmimi, qətiyyətli və sadiq tərəfdaşı olduğunu təsdiq edib. Bu işgüzar səfər ölkələrimiz arasında ikitərəfli münasibətlərin inkişafı yolunda növbəti addım kimi tarixə düşəcək, dövlətlərarası strateji münasibətlərin formalaşması və inkişafında böyük uğurlara yol açacaq".