"Çox təəssüflər olsun ki, Ermənistan tərəfi hələ də reallıqları qəbul edə bilmir". Bu sözləri açıqlamasında deputat Naqif Həmzəyev deyib.
Onun sözlərinə görə, xüsusilə revanşist qüvvələr Azərbaycan ilə Ermənistan arasındakı münasibətlərin normallaşmasını istəmir: "Bu baxımdan da mütəmadi olaraq erməni mətbuatında dezinformasiyalar yayılır. Bu informasiyalar həqiqəti əks etdirmir. Ancaq istər-istəməz daxili auditoriyada müəyyən inamı bərpa etmək, Azərbaycana qarşı hər hansı bir üstünlüklərin əldə olunması fikrini yaratmaq niyyətindədir. Bütün bunlarla yanaşı, erməni silahlı qüvvələrinin təxribat törətdiyinin də şahidi olmuşuq. Azərbaycan Silahlı Qüvvələri erməni quldur dəstələrinin və qanunsuz silahlı birləşmələrinin törətdiyi təxribatları dəf edə bilib. Sonuncu "Qisas" əməliyyatı ermənilərə dərs olmalıdır. Biz maksimum dərəcədə diqqətli olmalı və anlamalıyıq ki, mübarizə yalnız döyüş məkanında yox, həmçinin informasiya məkanında da getməkdədir. Ermənilər dezinformasiya yayaraq informasiya məkanında çaşqınlıq yaratmaq istəyirlər. Azərbaycan bütün təxribatların qarşısının alınması üçün hazırdır".