İyulun 4-də Avropa İttifaqı Şurasının Prezidenti Şarl Mişel Azərbaycan Respublikasının Prezidenti İlham Əliyevə zəng edib. Söhbət zamanı Brüssel gündəliyinə aid məsələlər müzakirə olunub.
Deputat Naqif Həməyev bildirib ki, Şarl Mişelin Prezident İlham Əliyevə zəngi maraqla qarşılanıb. Avropa İttifaqı Prezidenti Şarl Mişelin moderatorluğunda Azərbaycacan və Ermənistan rəhbərlərinin Brüsseldə görüşlərinin baş tutduğunu xatırladan N.Həmzəyev deyib ki, bu görüşlərdə konkret olaraq, sərhədlərin tanınması ilə bağlı komissiyanın yaradılması məsələsi qərarlaşdırılıb və hazırda sözügedən komissiya öz fəaliyyətinə başlayıb: "Hesab edirəm ki, növbəti görüşə qədər bir nəticə əldə olunmalıdır. Biz düşünürük ki, növbəti Brüssel görüşünün isə iyul və ya avqust ayında baş tutması mümkündür".
N.Həmzəyevib sözlərinə görə, növbəti Brüssel görüşündə hansısa real sənədin imzalanması da ola bilər: “Çünki sərhədlərin tanınması bir günün məsələsi deyil, bu prosses uzun çəkə bilər. Razılaşdırılmış hansısa ərazinin tanınması mümkündür. Həmçinin kommunikasiya xətlərinin açılması sonuncu Brüssel görüşündə razılaşdırılmışdı. Bununla bağlı da konkret qərarların açıqlanması növbəti görüşdə gözlənilir. Lakin bununla da iş bitmir".
MM üzvü bildirib ki, Avropa İttifaqını tək Ermənistan-Azərbaycan münasibətlərinin normallaşması deyil, həm də Avropanın enerji təhlükəsizliyi məsələsi maraqlandırır. Dediyinə görə, bu baxımdan da məhz Şarl Mişelin Prezidentə zəngi zamanı böyük ehtimalla Azərbaycan qazının Avropaya nəqli ilə bağlı müəyyən məsələlər də müzakirə edilib.
"Ona görə də hesab edirəm ki, zəng zamanı Azərbaycanın bu prosesdə daha fəal iştirak etməsi, müqavilələrin imzalanması üçün hansısa tələblərin vacib olduğuna toxunulub. İstənilən halda Azərbaycanın mövqeyi hər kəsə bəllidir. Azərbaycan həm enerji təhlükəsizliyi məsələsində, həm Ermənistanla münasibətlərin normallaşmasında, həm də sərhədlərin tanınmasında maraqlıdır”, - deyə Naqif Həmzəyev əlavə edib.