“Son dövrlər Ermənistan rəsmilərinin Azərbaycan ərazilərinə qanunsuz səfərləri qeydə alınmırdı. Ancaq sülh prosesinin irəliləməsi fonunda yenidən Ermənistanın baş prokurorunun qanunsuz olaraq sərhədi keçib Azərbaycan ərazilərinə səfər etməsi, qondarma “qurum”un nümayəndəsi ilə görüşməsi onların nə dərəcədə qeyri-səmimi olduqlarını ortaya qoydu. Bu, onu deməyə imkan verir ki, ermənilər yenidən prosesləri öz xeyirlərinə dəyişmək üçün vaxt qazanmaq istəyirlər. Hər kəs bunu anlayır ki, proseslərin uzanması bizim xeyrimizə deyil. Ermənistanın da əleyhinə işləyir. Bu cür vaxt yubatmaq prosesi ilə qətiyyən barışmayacağıq. Ermənilərin bu günə qədərki təxribatlarına müəyyən dərəcədə göz yummuşuq, onlara şans vermişik. Ancaq Azərbaycanın sülh təklifi həmişə qüvvədə olmaya bilər, daha sərt addımlar atmaq iqtidarındadır. Bunu da heç kim Azərbaycanda qadağan edə, prosesə maneə ola bilməz”.
Bu sözləri açıqlamasında Milli Məclisin deputatı Naqif Həmzəyev deyib.
Deputat bildirib ki, səfər barədə xüsusilə rus sülhməramlılarının Azərbaycan tərəfini məlumatlandırmaması sual doğuran növbəti məqamdır: “Azərbaycan Xarici İşlər Nazirliyinin Ermənistanın baş prokurorunun qanunsuz səfəri ilə bağlı açıqlamasında açıq-aydın görünür ki, rus sülhməramlıları Azərbaycan tərəfinə bu barədə məlumat verməyiblər. Baş prokurorun qanunsuz səfəri tamamilə xəbərsiz və razılaşdırılmadan həyata keçirilib. Bu cür təxribatlar davam edəcəyi təqdirdə Azərbaycan daha sərt addımlar atacaq, Laçın koridoruna tam nəzarəti öz əlinə keçirəcək. Ümumiyyətlə, Ermənistanla əlaqənin tamamilə kəsilməsi mümkündür. Necə ki, Qafan-Gorus yolunda da ötən il yaranmış narazılıqlara görə Azərbaycan tam nəzarəti öz üzərinə götürdü. Sonra proseslər müəyyən dərəcədə biz istədiyimiz məcrada cərəyan etdi. Bu baxımdan rəsmi İrəvan atdığı addımlara diqqət etməli, sülh prosesinə kölgə salmamalı, Azərbaycanın səbri ilə oynamamılıdır”.