"Təbliğatı üç gün ərzində geniş şəkildə aparılan bu gün keçirilmiş aksiya faktiki olaraq heç bir böyük diqqət cəlb edə bilmədi. Biz orada çox az sayda insanın iştirak etdiyini gördük. Aksiyada ajiotaj yaratmaq cəhdi uğursuzluqla nəticələndi. Polisin zorakılıq tətbiq edəcəyini əvvəlcədən proqnozlaşdıran tədbir təşkilatçılarının fikirləri reallaşmadı. Polis çox etik və qanunlar çərçivəsində davranaraq, hətta onlara qarşı təhqiramiz şüarların səsləndirilməsinə də təmkinini qoruyub saxladı. Polislərimizi çox təmkinli davranaraq heç bir provakasiyalara, təxribata uymadıqları üçün təbrik etmək istərdim".
Bunu açıqlamasında Milli Məclisin deputatı Naqif Həmzəyev deyib.
Deputat bildirib ki, "Amerikanın səsi" və "Azadlıq radiosu”nun bu günlər ərzində apardığı təbliğat, aranı qızışdırmaq və bu aksiyaya çoxlu sayda insan toplamaq cəhdləri baş tutmadı: "Çox təəssüflər olsun ki, bu cəhdlər Qazaxstanda "Sputnik" agentliyinin apardığı məlum təbliğatla sanki üst-üstə düşür. Onlar da Qazaxstandakı hadisələr zamanı insanları bu tip askiyalara toplamaq, çaşqınlıq, qarışıqlıq yaratmaq niyyətlərini ortaya qoyurdular. Bu aksiyada həmçinin, jurnalistlərin çoxluq təşkil edəcəyi proqnozlaşdırılsa da, faktiki olaraq orada çox az sayda jurnalist nəzərə çarpdı. Fotolar, videolardan da görünən bu idi. Bir sözlə bu təbliğat tamamilə fərqli bir məqsədə hədəflənmişdi. Aksiya təşkilatçıları aksiya zamanı tamamilə fərqli proseslərin cərəyan edəcəyini düşünürdülər, ancaq şükürlər olsun ki, Azərbaycanda stabillik var. Azərbaycanda xalq Cənab Prezident İlham Əliyevin ətrafında sıx birləşib. Biz hazırda regionda baş verən prosesləri çox yaxşı dərk edir və izləyirik. Ölkəmizdə qarşıdurma yaratmaq istəyən qüvvələr öz niyyətlərinə heç bir şəkildə çata bilməyəcəklər. Aksiyada az sayda adamın iştirak etməsi də bir növ insanlar arasında çaşqınlıq yaratmaq istəyən qüvvələrə bir cavab oldu. Bizim gənclərimiz, jurnalistlərimiz, insanlarımız bu aksiyada iştirak etməməklə Azərbaycanda xaos vəziyyətini yaratmaq istəyən qüvvələrə öz cavablarını vermiş oldular. Bizim ölkəmiz sabitlik adasıdır. Azərbaycanın çox gərgin bir regionda yerləşməsinə baxmayaraq Cənab Prezident İlham Əliyevin uğurlu xarici və daxili siyasəti nəticəsində ölkədə stabillik qorunub saxlanılır. Bu gün biz əminliklə deyə bilərik ki, Azərbaycan ən təhlükəsiz və stabil ölkələrdən biridir. Azərbaycanın güclənməsini, uğur qazanmasını istəməyən qüvvələr təəssüf ki, müxtəlif vasitələrlə bu stabilliyi pozmaq istəyirlər, ancaq biz o qüvvələrə heç vaxt imkan verməyəcəyik ki, onlar bu istəklərini reallaşdırsınlar. Onlar istəklərinə heç bir şəkildə çata bilməyəcəklər".