Xəbər verdiyimiz kimi, Azərbaycanda jurnalistlər güzəştli ipoteka əldə edə biləcəklər. Bu barədə Azərbaycan Respublikası Prezidentinin 2016-cı il 22 iyun tarixli 940 nömrəli Fərmanı ilə təsdiq edilmiş “Azərbaycan Respublikası İpoteka və Kredit Zəmanət Fondunun vəsaiti hesabına ipoteka kreditinin, o cümlədən güzəştli ipoteka kreditinin verilməsi Qaydası”nda dəyişiklik edilməsi haqqında Prezidentin Fərmanında qeyd edilir. Yeni qanunla bağlı deputatlar Demokrat.az-la fikirlərini bölüşüblər.
Milli Məclisin deputatı Ceyhun Məmmədov hesab edir ki, bütün sahələrdə çalışanlar üçün müəyyən stimullaşdırıcı addımlar atılmalıdır:
“Bir şəxs bilməlidir ki, o, müəllimliyi, həkimliyi, jurnalistikanı seçməklə, həm də hansı güzəştləri əldə edə bilər. Hesab edirəm ki, bütün sahələrdə biz bu barədə ciddi düşünməliyik. Bu baxımdan da, jurnalistlərə güzəştli ipotekaların verilməsi məsələsi çox önəmlidir. Bu gün ümumiyyətlə, dünyada jurnalist hakimiyyətin əsas qollarından biri hesab olunur. Bu baxımdan da, bu sahədə artıq qanunvericilik təkmilləşdirildi və bir sıra mühüm addımlar atıldı, qərarlar qəbul edildi. Hesab edirəm ki, bu güzəştli ipotekanın verilməsi də, qələm sahiblərinin, jurnalistlərimizin bu sahəyə marağını, həvəsini daha da artıracaq və biz bu sahədə daha da uğurların qazanıldığının şahidi olacağıq. Biz görəcəyik ki, növbəti mərhələdə bizim jurnalistlərimiz, qələm əhlimiz dövlətimizin güclənməsinə, müstəqilliyimizin möhkəmlənməsinə öz töhfələrini verəcəklər. Bizim bir çox sahələrdə olduğu kimi, media sahəsində də uğurlarımız artacaq və daha böyük uğurlara imza atacağıq. Hesab edirəm ki, bu, çox vacib, mütərəqqi və zamanında atılmış, qəbul olunmuş mühüm addımdır”.
Deputat Cavid Osmanov açıqlamasında vurğulayıb ki, Azərbaycan Prezidenti Cənab İlham Əliyevin təşəbbüsü ilə Media İnkişafı Agentliyinin yaradılması, “Media haqqında” Qanunun qəbul edilməsi bir daha onu göstərir ki, Azərbaycan dövlətinin prioritet sahələrindən biri də medianın inkişafıdır:
“Həmçinin, bu sahədə çalışan əməkdaşların sosial müdafiəsinin gücləndirilməsi də bu tərkibdə vacib olan bir məsələdir. Bu baxımdan da məhz jurnalistlərə güzəştli ipotekanın verilməsi onların sosial müdafiəsinin gücləndirilməsinə istiqamətlənir. Biz bilirik ki, media sahəsində çalışan bir çox jurnalistlərimiz var ki, onların hələ də öz mənzilləri yoxdur. Ona görə də, bu, onların mənzil-məişət məsələlərinin yaxşılaşdırılması istiqamətində atılan mühüm bir addımdır. Bu addım Azərbaycan dövlətinin məhz bu sahədə çalışan vətəndaşlarımıza, jurnalistlərimizə dövlət qayğısının bariz nümunəsidir. Bu baxımdan da, bu, çox əhəmiyyətli məsələdir və düşünürəm ki, bundan sonrakı mərhələdə jurnalistlər də onlara verilmiş bu fürsətdən istifadə edəcək və öz mənzil-məişət şəraitlərini yaxşılaşdıracaqlar. Bir daha deyirəm ki, bu, cənab İlham Əliyevin rəhbərliyi ilə media sahəsinin dövlətin prioritet bir sahəsi kimi qiymətləndirilməsi və bu sahədə çalışan insanların sosial müdafiəsinin gücləndirilməsinə istiqamətlənmiş vacib və əhəmiyyətli bir addımdır”.
Millət vəkili Naqif Həmzəyevin sözlərinə görə, yeni dəyişiklik jurnalistlərin çox uyğun şərtlərlə ev sahib olmalarına şərait yaradacaq:
“Bu, çox ədalətli və düzgün edilmiş dəyişiklikdir. Düşünürəm ki, jurnalistlərimiz bunu çoxdan gözləyirdilər. Hesab edirəm ki, ən qısa zamanda jurnalistlərimiz güzəştli ipoteka kreditindən yararlanaraq, ev sahibi olacaqlar və nəticə etibarilə də, mənzil-məişət problemlərini həll etmiş olacaqlar. Bu dəyişikliyə görə, cənab Prezidentə təşəkkürümü bildiririrəm. Göründüyü kimi, əhalinin müxtəlif kateqoriyalarının sosial müdafiəsinin gücləndirilməsi hər zaman dövlətin əsas prioritetlərindən biri olaraq qalır. Buna kimi şəhid ailəsinin üzvü, Milli Qəhrəman, məcburi köçkünlər və sair kateqoriyadan olanlar güzəştli ipotekadan yararlana bilirdi. Bundan sonra həmin qaydalar jurnalistlərə də şamil ediləcək. Bu da onu göstərir ki, mətbuat nümayəndələri hər zaman dövlət qayğısı və diqqəti ilə əhatə olunub. Bu qərar nəticə etibarı ilə minlərlə jurnalistin problemini həll etməsinə imkan verəcək. Bu, onu göstərir ki, dövlət daima jurnalistlərin yanındadır və onun sosial şəraitinin yaxşılaşdırılması istiqamətində mühüm addımlar atmaqdadır.