“Azəbaycan torpaqları erməni işğalından azad edildikdən sonra bu torpaqlara qayıdışı uğurla təşkil edə bilmək üçün cənab Prezident İlham Əliyevin rəhbərliyi ilə yaradılmış xüsusi komissiya müvafiq işləri həyata keçirdi. Ağdam və Füzuli şəhərlərinin baş planları təsdiq olundu. Şuşada yenidənqurma, bərpa işləri uğurla həyata keçirilir və burada yeni layihələr reallaşdırılır. Bütün bunlarla yanaşı digər işğaldan azad olunmuş ərazilərin də baş planları üzərində işlər görülür və ən qısa zamanda onlar da təsdiqlənəcək”.
Bu fikirləri Demokrat.az-a Milli Məclisin deputatı Naqif Həmzəyev Prezident İlham Əliyevin yanvarın 12-də yerli televiziya kanallarına verdiyi müsahibəsini şərh edərkən deyib. Deputat qeyd edib ki, bütün bunlarla yanaşı bu ərazilərdə yol infrastrukturu, elektrik enerji ilə təminat məsələsi də uğurla həyata keçirilməkdədir:
“Bildiyimiz kimi, ötən il Füzuli Beynəlxalq Hava Limanının açılışı oldu, digər iki hava limanlarının da fəaliyyətə başlaması üçün işlər görülür. Bütün bunlarla yanaşı, bu il cənab İlham Əliyevin göstərişi ilə işlər daha da sürətlə həyata keçiriləcək. Cənab Prezidentin ötən gün müsahibəsindəki səsləndirdiyi fikirlərə söykənərək, onu deyə bilərik ki, həyata keçiriləcək yenidənqurma, bərpa işləri birbaşa olaraq Azərbaycan dövlətinin nəzarətində olacaq. Bütün bu işlərin şəffaf keçirilməsi və keyfiyyət meyarının ön planda olması çox vacibdir. Prezident İlham Əliyev də öz çıxışında bu mesajı vermiş oldu: “Əgər hansısa xoşagəlməz hallar olacağı təqdirdə Azərbaycan dövlətinin cəzası çox sərt olacaqdır”.
Bu baxımdan da bizim üçün müqəddəs olan bu torpaqlarda həyata keçiriləcək bütün layihələr, tikiləcək bütün binalar çox dözümlü, möhkəm, müasir dövrün tələblərinə cavab verəcək səviyyədə olmalıdır. Həm də bilirsiniz ki, cənab Prezident tərəfindən işğaldan olan ərazilər yaşıl zona elan edilib. Burada “Ağıllı şəhər” və “Ağıllı kənd” konsepsiyaları əsasında tikinti işləri və layihələr reallaşdırılacaq. Bu tenderləri udacaq şirkətlər də bütün bunları nəzərə almalıdır və maksimum dərəcədə çalışmalıdır ki, şəffaflığı qorusunlar. Bu işləri uğurla, yüksək keyfiyyətlə yerinə yetirsinlər. Belə olacağı təqdirdə ən qısa zamanda biz keçmiş məcburi köçkünlərimizin öz dədə-baba yurdlarına qayıdacağının şahidi olacağıq. İnanıram ki, cənab Prezidentin rəhbərliyi ilə bu işin də öhdəsindən layiqincə gələ biləcəyik”.
N.Həmzəyev diqqətə çatdırıb ki, işğaldan azad olunmuş ərazilərdə həyata keçiriləcək infrastruktur layihələr nəticə etibarilə Qarabağın dirçəlməsini, onun cənnət məkana çevrilməsini təmin edəcək:
“Əldə edilmiş nəticə Azərbaycan iqtisadiyyatına çox böyük töhfələr verəcək. Bu baxımdan da Qarabağda görüləcək bütün infrastruktur layihələrin keyfiyyətli, vaxtında və qüsursuz həyata keçirilməsi çox vacibdir. Həmçinin, bura köçürələcək keçmiş məcburi köçkünlərin məşğulluq probleminin aradan qaldırılması üçün hər iqtisadi rayonun, hər kəndin, hər bir qəsəbənin öz imkanlarına və potensialına uyğun olaraq burada layihələrin reallaşdırılması vacibdir. Bununla məhz burada yaşayacaq vətəndaşlarımızın həm sosial problemləri, həm də onların məşğulluq problemləri həll olunsun. Həmçinin də, nəticə etibarilə bu ərazilər Azərbaycanın digər regionlarından, bölgələrindən qətiyyən geri qalmasın, əksinə ən inkişaf etmiş və ən qabaqcıl iqtisadi zonalardan birinə çevrilsin. Azərbaycan hökuməti birbaşa olaraq bu hədəfi qarşısına məqsəd qoyub. İnanıram ki, ən qısa zamanda Qarabağ və Şərqi Zəngəzur iqtisadi rayonlarında iqtisadi dirçəlişin şahidi olacağıq və bu əraziləri də biz Azərbaycana tamamilə inteqrasiya edə biləcəyik”.