Yeni Azərbaycan Partiyası Yasamal rayon təşkilatında Milli Məclisin deputatları Elnur Allahverdiyev, Ramin Məmmədov, Naqif Həmzəyev və YAP Gənclər Birliyinin sədri Bəxtiyar İslamovun "Gənclər bizim gələcəyimizdir" mövzusunda gənclərlə görüşü keçirilib.
İlk öncə ümumilli lider Heydər Əliyevin və Azərbaycan Respublikasının ərazi bütövlüyü uğrunda canından keçmiş şəhidlərimizin əziz xatirəsi bir dəqiqəlik sükutla yad edilib.
Çıxış edən YAP Yasamal rayon təşkilatının sədri Bəxtiyar Nəbiyev
Zəfər bayramını bizə yaşatdığı üçün Müzəffər Ali Baş Komandana və Şanlı Azərbaycan Ordusuna təşəkkürünü bildirib, Allahdan şəhidlərimizə rəhmət, qazilərimizə şəfa diləyib.
B.Nəbiyev qeyd edib ki, bu gün Azərbaycan gəncliyi də cəmiyyətdə tutduğu fəal mövqeyi və çevikliyi ilə seçilir: “Azərbaycanımızın gələcəyi olan gənclər inkişafın və modernləşmənin operativ ön cəbhəsidir. Ümummilli liderimiz Heydər Əliyev həmişə gənclərə güvənərək onlara böyük etimad göstərirdi və deyirdi: "Biz dövlətin və cəmiyyətin idarə edilməsində gənc nəslin qüvvəsinə arxalanacaq, onların imkanlarından maksimum istifadə edəcəyik." Bəli, Azərbaycanda gənclər siyasəti həmişə dövlət siyasətinin əsas tərkib hissəsi kimi xüsusi yer tutub.”
Milli Məclisin deputatı Elnur Allahverdiyev gənclərə tövsiyə verərək gənclərin seçdikləri gələcək istiqamət yollarında daha inamlı və həvəslə addımlamalarınının vacibliyini vurğulayıb. Ümumilli lider Heydər Əliyevin qurucusu olduğu və Prezident İlham Əliyev tərəfindən davam etdirilən gənclər siyasətinin bu gün uğurla həyata keçirildiyini bildirib.
Çıxış edən millət vəkili Ramin Məmmədov gənclərin Azərbaycanı tərəqqiyə aparan gələcək uğurlu yolun davamçıları olduğunu bildirib. Ramin Məmmədov Yeni Azərbaycan Partiyasının Azərbaycan Respublikasının bütün gəncləri üçün mehriban ailə olduğunu və bu ailənin gənclərə verdiyi böyük töhfələrdən danışaraq, gənclərə daha fəal olmalarını tövsiyə edib.
YAP Gənclər Birliyinin sədri Bəxtiyar İslamov bu gün Azərbaycan gəncliyinə göstərilən diqqət və qayğının əhəmiyyətindən danışıb. Azərbaycan gəncliyinin vətənpərvər olduğunu vurğulayan Bəxtiyar İslamov 44 günlük Vətən müharibəsində gənclərin xidmətlərini xüsusi qeyd edib. B.İslamov çıxışının sonunda gənclərə öz fəaliyyətlərində uğurlar arzulayıb.
Millət vəkili Naqif Həmzeyev bildirib ki, gənclərimiz milli-mənəvi dəyərlərimizin qorunmasında, dövlətçilik ənənələrimizin dünyada tanıdılmasında səy və bacarıqlarını təsdiqləyir, qəhrəmanlığın, vətənpərvərliyin təbliğ olunmasında böyük işlər aparır və cəmiyyətin inkişafı istiqamətində ciddi addımlar atırlar.
Müzakirə formatında davam edən görüşdə gənclərin təklifləri dinlənilib.
Görüşün sonunda gənclərlə xatirə şəkli çəkilib.
