Vətən müharibəsindəki Zəfərin birinci ildönümü ərəfəsində Prezident İlham Əliyev və birinci xanım Mehriban Əliyevanın Qubadlıya səfərə getmələri və Qubadlı sakinlərini səfərə dəvət etmələri Azərbaycan xalqı və dost ölkələr tərəfindən böyük rəğbətlə qarşılandı. Prezident mütəmadi olaraq Qarabağ və Şərqi Zəngəzur iqtisadi rayonlarına səfərlərə gedir, infrastruktur layihələrinin təməlqoymasında iştirak edir, həmçinin rayon və kəndlərin, şəhərlərin Baş planlarını təsdiqləyir, yeni layihələrin icrasını yaxından izləyir. Prezidentin Qubadlıya səfərində də yeni yol infrastrukturunun əsasını qoyması, habelə Qubadlı ictimaiyyəti ilə səmimi görüşü və açıqlamaları ehtiramla qarşılandı. Möhtərəm Prezident çıxışında qeyd etdi ki, müharibə bitsə də, bizi döyüşüb-vuruşmağa məcbur edirlər və biz bütün cəbhələrdə mübarizəni davam etdiririk. Nəzərə almaq lazımdır ki, 44 günlük Vətən müharibəsində əldə etdiyimiz qələbəni həzm edə bilməyən qruplar, Ermənistan və onun havadarları var. İstənilən halda, Azərbaycanın postmünaqişə dövründə həyata keçirdiyi tədbirlər və reallaşdırdığı layihələr ölkəmizin haqlı olduğunu ortaya qoyur.
Bu sözləri AZƏRTAC-a açıqlamasında Milli Məclisin deputatı Naqif Həmzəyev Prezident İlham Əliyev və birinci xanım Mehriban Əliyevanın Qubadlıya oktyabrın 25-də keçirilən səfərləri barədə danışarkən deyib.
Deputat bildirib ki, səfər çərçivəsində Prezident, həmçinin Qubadlı ilə əlaqədar konseptual layihələrin mövcud olduğunu və Sovet dövründə Qubadlıda 20 min nəfər yaşadığı halda, indi əhalinin sayının 40 min nəfərə çatdığını bildirdi: “Beləliklə, Qubadlıda icra ediləcək bütün layihələr zamanı əhali sayının artımı nəzərə alınacaq və vətəndaşların daha rahat işləyib, yaşaması üçün dövlət tərəfindən sistemli şəkildə müxtəlif layihə və proqramlar həyata keçiriləcək. Ümid edirik ki, yaxın günlərdə keçmiş qaçqın və məcburi köçkünlər də öz dədə-baba yurdlarına qayıdıb, orada yaşaya biləcəklər. Bu cür səfərlər zamanı ictimaiyyətlə görüşlərin təşkil edilməsi və sadə vətəndaşların fikirlərinin öyrənilməsi təqdirəlayiqdir. Qubadlılıların dili ilə desək, ümid edirik ki, inşallah vaxtı gələndə onlar öz dədə-baba yurdlarına Prezidenti dəvət edərək Qubadlıda həyata keçirilən layihələrin nəticələrindən bəhs edə bilsinlər. Həmin gün uzaqda deyil, biz tezliklə bütün işğaldan azad edilmiş ərazilərimizdə olan canlanmanı və torpaqlarımızın cənnət məkana çevrildiyini müşahidə edəcəyik”.
N.Həmzəyevin dediyinə görə, açılışı olan yeni kompleksin döyüş texnikası parkında müasir silah sistemlərinin mövcudluğu Azərbaycanın hərbi qüdrətini sübut edir: “Qubadlı səfəri çərçivəsində Prezident hərbçilərlə görüşüb, yeni açılışı olan hərbi hissə ilə yaxından tanış olub. Səfərdən paylaşılan fotolarda hərbçilərin üzündə müşahidə edilən təbəssüm onu deməyə əsas verir ki, Qubadlı, o cümlədən işğaldan azad edilən bütün bölgələr Azərbaycan ordusu tərəfindən şərəflə qorunur, sərhədboyu ərazilər ordumuzun nəzarəti altındadır. Ümumiyyətlə Qubadlı rayonunda Dövlət Sərhəd Xidmətinin yeni hərbi hissə kompleksinin açılışı sərhədlərinin etibarlı qorunmasından xəbər verir”.
Qubadlının işğaldan azad edilməsinin Vətən müharibəsinin gedişində önəmli rol oynadığını bildirən parlament üzvü əlavə edib ki, Qubadlı azad edildikdən sonra Azərbaycan ordusu üçün Laçın istiqamətində yol açıldı: “Bir müddət sonra Laçının cənub hissəsində yerləşən kəndlər işğaldan azad edildi. Bu, həmçinin Şuşa uğrunda gedən döyüşlər üçün də yeni mərhələnin başlanğıcı oldu, habelə ordumuzun daha uğurlu döyüşlər həyata keçirə bilməsi, taktiki gedişlər etməsi üçün yeni imkanlar yarandı. Ali Baş Komandan, Prezident İlham Əliyevin rəhbərliyi altında rəşadətli Azərbaycan Ordusu Qubadlını azad etməklə xalqın və döyüşçülərin motivasiyasını daha da artırdı. Faktiki olaraq, Qubadlının işğaldan azad edilməsi ilə düşmənin beli qırıldı”.