Naqif Həmzəyev: “Cinayətkarların beynəlxalq hüquq qarşısında cəzalandırılması vacibdir”
Azərbaycan ordusu 44 günlük Vətən müharibəsində düşməni darmadağın edərək işğaldakı torpaqlarımızı azad etsə də, ötən əsrin 90-cı illərində həyata keçirilən erməni vəhşilikləri xalqımızın şüurunda, tarixin yaddaşında öz dərin izlər buraxıb. Bu baxımdan 1992-ci ilin mayın 8-də Şuşanın, mayın 18-də isə Laçının düşmən tərəfindən işğal edilməsi, işğal əsnasında ermənilərin həyata keçirdiyi vəhşiliklər yaxın tarixin acı reallıqları olaraq qalmaqdadır.
Bununla bağlı Moderator.az-a açıqlama verən millət vəkili Naqif Həmzəyev qeyd edib ki, torpaqlarımız işğaldan azad olunsa da, erməni vəhşiliklərinin ifşası prosesi davam etdirilməlidir:
“Dağlıq Qarabağ münaqişəsi artıq tarixə çevrilib. 44 günlük Vətən müharibəsində Azərbaycan düşməni məğlub etdi və işğalçını öz torpaqlarından qovdu. Buna baxmayaraq, biz tarixi unuda bilmərik və qətiyyən unutmamalıyıq. Başımıza gələn faciələrin səbəbini öyrənməkdə davam etməli, bunu gələcək nəsillərə də öyrətməliyik. Bu baxımdan biz Laçının, Şuşanın, digər rayonlarımızın vaxtilə Ermənistan ordusu tərəfindən işğalı faktını yaddan çıxarmamalı, bu hadisələrin səbəblərini təhlil etməli, onlardan lazımi nəticələr çıxarmalıyıq.
Erməni vəhşiliklərinin, cinayətlərinin ifşası prosesi davam etdirilməli, dünya erməni xislətini tanımalı, onun hansı vəhşiliklərə imza atdığını bilməlidir. Bu, həm tarixi həqiqətlərin bütün dünya ictimaiyyəti tərəfindən öyrənilməsi, həm də ədalətin öz yerini alması, cinayətkarların beynəlxalq hüquq qarşısında cəzalandırılması baxımından zəruridir”.