Deputat: Nifrət və kin üzərində formalaşan neofaşist erməni düşüncəsi təkcə Azərbaycan və digər bölgə xalqları üçün deyil, bütün bəşəriyyət üçün təhlükəlidir
Məlum olduğu kimi, Prezident İlham Əliyev aprelin 20-də Hacıqabul rayonuna səfəri çərçivəsində Azərbaycan Televiziyasına müsahibəsində bir sıra önəmli məsələlərə toxunub. Ölkə başçısı müsahibəsində işğalçı Ermənistanın 30 ilə yaxın ölkəmizə qarşı törətdiyi cinayətkar və faşizm əməllərindən də söz açıb.
Milli Məclisin deputatı Naqif Həmzəyev məsələ ilə bağlı “İki sahil”ə açıqlamasında bildirib ki, nifrət və kin üzərində formalaşan neofaşist erməni düşüncəsi təkcə Azərbaycan və digər bölgə xalqları üçün deyil, bütün bəşəriyyət üçün təhlükəlidir: “Prezident İlham Əliyev Azərbaycan Televiziyasına müsahibəsində haqlı olaraq, erməni faşizminin bütün ölkələrdə mövcud olmuş faşizmlərin ən eybəcəri, ən qəddarı olduğunu bildirdi. Sözün bütün mənalarında, erməni faşizminin bəşər tarixində heç bir bənzəri yoxdur”.
Deputat onu da qeyd edib ki, 44 günlük Vətən müharibəsində Azərbaycan Ordusu erməni faşistlərini işğal olunmuş ərazilərdən qovdu və ərazi bütövlüyünü bərpa etdi: “Əldə olunan Zəfərdən sonra ortaya bir çox həqiqətlər çıxır. Birincisi, işğal müddətində erməni faşistləri, terroristləri Azərbaycan ərazilərini tamamilə viran qoyublar. Yaşayış üçün yararlı olan tikililərə, infrastruktura ciddi ziyan vurmaqla yanaşı, tarixi-dini abidələrimizə də qarşı əsl vəhşilik, barbarlıq törədiblər. Bir sözlə, həmin ərazilərdə mövcud həyatı tamamilə məhv ediblər. Hazırda ekspertlər tərəfindən işğaldan azad edilmiş ərazilərimizə dəymiş ziyan hesablanır. Bununla da Azərbaycan beynəlxalq məhkəmə və təşkilatlara müraciət edərək ölkəmizə dəymiş ziyanın hesablanması və təzminatın ödənilməsini tələb edir. İkinci həqiqət isə ondan ibarətdir ki, bütün işğal altında saxlanılmış ərazilər minalanmışdır. İşğalçı ölkə minalanmış ərazilərin xəritəsi Azərbaycan tərəfinə vermir. Sözsüz ki, bu da beynəlxalq qanunlara zidd addımlardır. Həmin xəritənin ölkəmizə verilməməsi həmin ərazidə xidmət aparan əsgərlərin, dinc sakinlərin həyatı üçün təhlükədir. İşğalçı ölkənin isə bunu etməsi onların hərbi cinayətləri davam etdirmələri anlamına gəlir”.
“Qarabağ müharibəsindən məğlubiyyətlə ayrılan işğalçı ölkədə revanşist hisslərlə yaşayan bir sıra erməni siyasətçiləri var ki, hələ də münaqişəyə sövq edən açıqlamalar verməkdədirlər” söyləyən N. Həmzəyev onu da diqqətə çatdırıb ki, görünür “Dəmir Yumruq” əməliyyatından nəticə çıxarmayanlar hələ də revanşizm fikirləri ilə ortalığı qarışdırmaqdadırlar: “Hesab edirəm ki, gec-tez düşmən ölkə həqiqətlərin nədən ibarət olduğunu anlayacaq. Onlar üzərlərinə götürdükləri öhdəlikləri yerinə yetirməyə məcbur olduqlarını dərk edəcək və Azərbaycan, Türkiyəyə qarşı ərazi iddialarından əl çəkəcəklər. Bununla da Azərbaycan, Türkiyə və digər qonşu dövlətlərlə dostluq münasibətlərini qurmağa, regionda sülhü dəstəkləməyə məcbur olacaqlarını anlayacaqlar. Azərbaycan regionda sülhü bərqərar etmək üçün əlindən gələni edən, digər qonşu ölkələr ilə xoş münasibət yaradan, özündə sadiq tərəfdaş imici formalaşdırdığı halda, işğalçı Ermənistanın istənilən təxribatlarının da qarşısını ala biləcək gücdədir. Əks təqdirdə belə bir təhlükə yaranarsa, o zaman “dəmir yumruq” yenidən erməni faşizminin başını əzərək öz tarixi missiyasını davam etdirəcək”.
Deputat onu da əlavə edib ki, bu günlərdə açılışı baş tutan Hərbi Qənimətlər Parkının yaradılmasında da əsas məqsəd faşizmin aqibətinin bütün dünyaya nümayiş etdirilməsi, işğalçı Ermənistanın Azərbaycan xalqına qarşı həyata keçirdiyi insanlıq əleyhinə cinayətlərin unudulmamasıdır.