“Ali Baş Komandan İlham Əliyevin rəhbərliyi ilə Azərbaycan Ordusunun işğaldan azad etdiyi ərazilər 30 il ərzində erməni vandallarının ekoloji cinayətlərə məruz qalıb. Azərbaycan qarşı etnik təmizləmə, soyqırımı və dövlət terrorizmi siyasəti həyata keçirən erməni terrorçuları işğal etdikləri ərazilərdə torpaqlarımızın təbii resursları vəhşicəsinə istismar ediblər”.
Bunu Editor.az-a açıqlamasında Milli Məclisin Təbii ehtiyatlar, energetika və ekologiya komitəsinin üzvü Naqif Həmzəyev bildirib. Millət vəkili qeyd edib ki, işğal edilmiş ərazilərimizdə təbiəti, barlı-bəhərli bağları, qədim tarixə malik olan çoxlu memarlıq və incəsənt abidələrini viran qoyan erməni vandalları təbii resursları kortəbii şəkildə istismar edib, zəngin meşələrimizin məqsədli şəkildə məhv edilməsinə çalışıblar: “44 günlük Vətən müharibəsində məğlub olan erməni terrorçuları xarici KİV-in və dünya ictimaiyyətinin gözü qarşısında ekoloji terror aktları törədərək meşələri yandırdılar, yaşadıqları evləri dağıtdılar. Müharibə dövründə işğalçı Ermənistan ordusu strateji və beynəlxalq əhəmiyyət kəsb edən neft və qaz kəmərlərinin keçdiyi rayonları da mütəmadi raket atəşinə tutdular. Bu isə Avropanın enerji təhlükəs izliyinə ən böyük təhdid idi”.
Millət vəkili qeyd edib ki, Ali Baş Komandan İlham Əliyevin diplomatik danışıqlar müstəvisində böyük ustalığı və ordumuzun döyüş meydanında göstərdiyi şücaəti sayəsində torpaqlarımızın erməni işğalından azad olub, erməni təcavüzünə son qoyulub: “İllərdir düşmən tapdağı altında qalan torpaqlarımızda üçrəngli bayrağımız dalğalanır. Bu gün düşmən tapdağından azad olmuş torpaqlarımızda quruculuq və bərpa işlləri aparılır.
Ölkə başçısının xalqın güzəranının, sosial-rifah halının artırılmasına xidmət edən məqsədyönlü siyasətinin davamı olan “Azərbaycan 2030: sosial-iqtisadi inkişafa dair Milli Prioritetlər” adlı proqram da işğaldan azad edilmiş ərazilərə böyük qayıdışın təmin olunması taleyüklü məsələ kimi önə çəkilib.
Dövrün, zamanın tələbinə uyğun təkmilləşən Milli Məclis dövlətimizin strateji xətti ilə bağlı bütün məsələlərdə Prezident İlham Əliyevin proqram xarakterli tövsiyələrini əsas götürür”.
N.Həmzəyevin sözlərinə görə, işğaldan azad edilmiş ərazilərə qayıdış, ətraf mühitin qorunması və enerji təminatı, sahibkarların quruculuq işlərinə cəlb olunması, həmin torpaqlarda dövlət-özəl sektor əməkdaşlığının perspektivləri, bölgədə kənd təsərrüfatının inkişafı kimi məsələlər Milli Məclisin Təbii ehtiyatlar, energetika və ekologiya komitəsində geniş müzakirə olunub, ekoloji vəziyyət, perspektivlərlə bağlı qərarlar qəbul edilib.
“Ölkə Prezidentimizin həyata keçrdiyi məqsədyönlü siyasətdən güc alan qərarlar işğaldan azad edilən ərazilərin inkişafı, tərəqqisi ilə yanaşı təmiz ekoloji mühitin təmin edilməsinə böyük töhfələr verəcək”-deyə, millət vəkili əlavə edib.