2020-ci il dünyada koronavirus infeksiyasının sürətlə yayılması və faciəvi nəticələri ilə yaddaşlarda qalacaq. Lakin dünya ölkələrindən fərqli olaraq, bu il Azərbaycan üçün Zəfər ili kimi tarixə düşdü. Müzəffər Ali Baş Komandan İlham Əliyevin rəhbərliyi ilə Ordumuz tərəfindən 30 illik Qarabağ həsrətinə son qoyuldu, Azərbaycanın ərazi bütövlüyü bərpa edildi.
Geridə qoymağa hazırlaşdığımız 2020-ci il Milli Məclisin deputatlarının yaddaşında nə ilə qalacaq?
Deputat Vüqar Bayramov Azvision.az -a bildirib ki, hər bir azərbaycanlı üçün 2020-ci il Zəfər ili kimi yadda qalacaq.
“Müzəffər Ali Baş Komandanın rəhbərliyi ilə şanlı Ordumuz zəfərə imza atdı. Biz artıq qalib xalqıq. Bu da 2020-ci ilin bizim üçün ən yadda qalan və qürurverici məqamıdır. Mənim üçün də xüsusi məqamdır. 27 ildən çox işğal altında olan, doğulub, boya-başa çatdığım və orta məktəbi oxuduğum kənd işğaldan azad olundu. 2020-ci ildə artıq ata-baba yurdum, həm də parlamentdə təmsil etdiyim rayon azaddır”.
V.Bayramov, həmçinin iqtisadçı alim kimi 2020-ci ili qiymətləndirib. O bildirib ki, cari ilin iqtisadi baxımdan ən yadda qalam məqamı COVID pandemiyasının qlobal və milli təsirləri oldu. “Proqnozlaşdırılmadığı halda 2020-ci ildə bütün ölkələrdə xarici şok iqtisadi prosesləri diktə etdi. Qlobal azalma sürətləndi, neftin qiymətində kəskin volatillik oldu, eyni zamanda digər bazarlara da pandemiya təsir etdi. Bu il bizim üçün yadda qalan digər məqam pandemiyanın iqtisadi və sosial təsirlərini minimumlaşdırmaqla bağlı paketlərin hazırlanması və icra olunması oldu. 3,5 milyard manatlıq paketlər həm biznesə, həm də vətəndaşlarımıza pandemiyanın təsirlərini minimumlaşdırmaq məqsədi daşıdı”.
Deputat qeyd edib, pandemiyanın təsirlərini azaltmaq üçün yeni imkan, alətlər təklif olundu. Bunlara vergi güzəştləri, güzəştli kreditlərə çıxış imkanlarının artırılması daxildir: "Azərbaycan iqtisadiyyatı 2020-ci ildə orta hesabla 4 faiz azaldı. Qonşu ölkələr, həmçinin dünya ölkələri üzrə azalma faizini nəzərə alsaq, bu, məqbul azalmadır. 2020-ci ilin yekunlarında biz pandemiyanın iqtisadiyyata təsirlərini hiss etdik. Bu təsirlər ÜDM-də, eyni zamanda qeyri -neft sektorunda özünü göstərdi”.
Onun sözlərinə görə, bütün bunların fonunda biz 2021-ci ilə nikbin daxil oluruq: “Həm Azərbaycan höküməti, həm beynəlxalq maliyyə qurumlarının ölkəmizlə bağlı proqnozları müsbətdir və gələn il Azərbaycanda təxminən 3 faizlik artım proqnozlaşdırılır. 2021-ci il eyni zamanda qələbə büdcəsinin icrası ili kimi yadda qalacaq. Ümid etmək istəyirdik ki, 2020-ci ildə qlobal və milli iqtisadiyyatlarda müşahidə edilən çətinliklər məhz bu ildə qalacaq və 2021-ci ilə proqnozlaşdırıldığı kimi iqtisadi artımlar da daxil olaraq daha pozitiv nəticələr əldə edəcəyik”.
Milli Məclisin deputatı Naqif Həmzəyev isə qeyd edib ki, bu gün biz qürur hissi ilə dünyada problemləri ilə yadda qalan, lakin dünya azərbaycanlıları üçün torpaqlarımızın işğaldan azad edilməsi, qazandığımız zəfərlə əlamətdar olan 2020-ci ili yola salırıq.
“Son saatları başa çatmaqda olan təqvim ili xalqımız, dövlətimiz üçün əlamətdar oldu. Belə ki, böyük islahatlar ili kimi tarixə qovuşan 2019-cu ildə başlanan islahatlar bütün sahələrdə uğurla davam etdi. Azərbaycanın müstəqillik tarixindəki ilk növbədənkənar parlament seçkiləri 2020-ci ilin fevralın 9-da keçirildi və ölkə tarixində demokratik və azad seçki prinsipi kimi yadda qaldı.
2020-ci ilin əvvəllərindən bəşəriyyətin başını qara bulud kimi alan koronavirus pandemiyasının misli görünməmiş fəsadlarının dünyada 80 milyondan artıq yoluxmaya, 1 milyondan çox insanın həyatına son qoyduğu bir vaxtda müstəqil Azərbaycan koronavirusla mübarizədə model ölkə kimi nümunə göstərildi. Eyni zamanda Azərbaycan dünyanın koronavirus pandemiyası ilə üz-üzə dayandığı bu çətin vəziyyətdə özünün iqtisadi və sosial gücünü bir daha göstərə bildi”.
Deputat qeyd edib ki, 2020-ci ildə Azərbaycan xalqının illərdir gözlədiyi, həsrətində olduğu xoşbəxt sabah, ədalətin bərpa edilməsi reallığa çevrildi. “Müzəffər Ali Baş Komandanın rəhbərliyi ilə rəşadətli Azərbaycan Ordusunun sentyabrın 27-dən başladığı zəfər yürüşü 44 gün ərzində 30 ilin həsrətinə son qoydu, avantürist Ermənistanın təcavüzkar silahlı qüvvələrini darmadağın etdi, işğal altında qalan torpaqlarımızı əsl sahibinə qaytardı. Ali Baş Komandan İlham Əliyevin rəhbərliyi ilə Azərbaycan Silahlı Qüvvələrinin düşmən tapdağı altında qalan torpaqlarımızın işğaldan azad etməsi bütün bəşəriyyətə ölkəmizin gücünün, qüdrətinin nümayişi oldu. Ermənistanın təslim olması ilə nəticələnən bəyanatın rəsmi şəkildə elan edilməsi sübut etdi ki, ölkəmiz işğal altında olan torpaqlarını müstəqil şəkildə azad etməyə qadirdir. Azərbaycan bütün dünyaya göstərdi ki, onun savaşı haqq savaşıdır.
2020-ci il noyabrın 10-u ilə Azərbaycanın hərb tarixinə daha bir əlamətdar gün əlavə edildi. 30 il ərzində əzəli-əbədi torpaqlarımızı işğal altında saxlayan təcavüzkar Ermənistan hakimiyyətinin nəhayət ki, qanunsuz əməllərinə beynəlxalq hüquq çərçivəsində son qoyuldu. Tarixi ədalət bərpa olundu.
Arzu edirik ki, qarşıdan gələn 2021-ci il də dünyamıza, ölkəmizə sülh, əmin-amanlıq, xoşbəxt və firavan günlər, yeni-yeni uğurlar gətirsin”.