Döyüş meydanında uduzmağın əvəzini Azərbaycanın dinc əhalisinə, mülki obyektlərinə zərbə endirməklə çıxmaq istəyən Ermənistan rəhbərliyinin cəbhədən uzaq şəhərləri vurması dövlət terrorizmi və bəşəri çinayətdir.
Bunu Türkiyənin “TürkAz TV” telekanalına müsahibəsində Milli Məclisin deputatı Naqif Həmzəyev bildirib.
Türkiyənin Azərbaycandakı keçmiş səfiri Hulusi Kılıcın da qatıldığı verilişdə millət vəkili Naqif Həmzəyevlə telefon bağlantısı qurulub və millət vəkili tarix boyu Azərbaycana qarşı etnik təmizləmə, soyqırımı və işğalçılıq siyasəti həyata keçirən Ermənistan faşist ideologiyasının törətdiyi faciələrdən, dəhşətlərdən danışıb. Naqif Həmzəyev qeyd edib ki, mənfur qonşular beynəlxalq təşkilatların çağırışlarına, BMT Təhlükəsizlik Şurasının dörd məlum qətnaməsinə məhəl qoymayaraq çirkin niyyətlərini həyata keçirmək üçün hər vasitəyə əl atırlar: Dinc sakinlərin təhlükəsizliyini qorumaq, işğal altındakı torpaqlarımızı erməni tapdağından azad etmək, regionda sülhü bərqərar etmək üçün işğalçı Ermənistan hakimiyyətinin silahlı qüvvələrinin hücumlarına layiqli cavab verən Azərbaycan Ordusu uğurlara imza atır. Məğlubiyyətini sinirə bilməyən işğalçı dövlət dəfələrlə qadağan olunmuş silahlarla dinc əhalinin yaşadığı əraziləri hədəfə aldı, insanları təşviş içində saxlamağa çəhd etdi. Cəbhə bölgəsindən 60 km uzaqda yerləşən Gəncə şəhərini dəfələrlə raket atəşinə tutdu. Gəncə ilə yanaşı Mingəçevir, Bərdə, Tərtər, Naftalan, Füzuli, Goranboy və digər bölgələrdə dinc sakinlər, mülki infrostrukturlar erməni vandalizminin qurbanına çevrildi.
Millət vəkili müsahibəsini “Tanrı Azərbaycan və Türkiyə qardaşlığını qorusun” sözləri ilə bitirib.