“Təəssüflər olsun ki, Ermənistan ordusu yenidən ciddi təxribatlara əl atdı. Azərbaycanın döyüş bölgəsindən xeyli kənarda yaşayan dinc əhalisini, mülki vətəndaşları atəş altında saxlayan erməni hərbçiləri bu dəfə məqsədli şəkildə Gəncəni hədəfə aldılar”.
Bu barədə Azvision.az-a açıqlamasında Milli Məclisin Gəncədən seçilən deputatı Naqif Həmzəyev deyib. Onun sözlərinə görə Gəncə döyüş bölgəsinə yaxın şəhər olduğu üçün ermənilər bu şəhərə atdıqları mərmilərlə növbəti dəfə təxribat əməllərini ortaya qoymuş oldular:
“Məncə Gəncənin dağıntılara səbəb olan artilleriya atışları ilə vurulmasında məqsəd şəhərdə vətəndaşları qorxu içində saxlamaq, sakinlər arasında müharibə təşvişi yaratmaqdır. O da ola bilər ki, Ermənistan rəhbərliyi bu yola əl atmaqla istəyir ki, biz də onların atış ocaqlarını vuraq. Çünki belə deyilir ki, atəş məhz Ermənistan ərazisindən açılıb. Yəni biz də Ermənistan ərazisini vuraq deyə belə bir ciddi təxribata getdilər”.
Azərbaycan ordusunun heç vaxt dinc əhalini, mülki şəxsləri hədəf seçmədiyini deyən deputat Gəncənin vurulmasının cavabsız qalmayacağına əminliyini ifadə edib: “İstənilən halda düşmən ölkənin ordusu öz istəyinə nail olmadı. Düşünürəm ki, işğalçılar son çabalarını göstərirlər. Onların son təxribat əməllərinə baxmayaraq, Gəncədə əhval-ruhiyyə yüksək səviyyədədir, gəncəlilər, bütün vətəndaşlarımız hərbçilərlə bərabər Ali Baş Komandanın növbəti əmr və tapşırıqlarını gözləyirlər. Gəncədə hazırda ruh düşkünlüyü və s. bu kimi məsələlərlə bağlı heç bir ciddi problem yaşanmır. Ermənilər bundan sonra da arzularına çatmayacaqlar, təxribatları öz əleyhinə işləyəcək. Biz hazırda ordumuzun yeni zəfər xəbərlərini gözləyirik və inşallah qələbə bizimlədir!”