38 Saylı Nizami İkinci (Gəncə) Seçki Dairəsindən millət vəkili seçilmiş Naqif Həmzəyevin xüsusi karantin rejiminin tələbləri və sosial məsafə nəzərə alınmaqla seçicilərlə görüşləri davam edir.
Millət vəkilinin bu dəfəki görüşü Azərbaycan xalqının bəşər mədəniyyəti xəzinəsinə bəxş etdiyi böyük ədəbi şəxsiyyət, ölməz əsərləri ilə dünya şöhrəti qazanmış görkəmli şair və mütəfəkkir Nizami Gəncəvinin irsini tədqiq edən gənc alim, filologiya üzrə fəlsəfə doktoru Əlimuxtar Muxtarovla olub.
Naqif Həmzəyev istedadlı gənc alimin qayğılarını dinləyib, onun qaldırdığı bəzi məsələlər və təkliflər ətrafında geniş fikir mübadiləsi aparıb.
Özünün rəsmi facebook səhifəsində görüşlə bağlı paylaşım edən millət vəkili bildirib ki, müasir dövrün çağırışları, gənc alimlərin diqqət yetirməli olduqları meyarlar, regionda yaşayan və təhsil alan gənclərin karyera inkişafı, eləcə də digər mövzularla bağlı səmimi söhbət yaddaqalan anlardan oldu.
