Son günlər dünyada ermənilərin azərbaycanlılara, soydaşlarımıza qarşı vandal hərəkətləri terror elementlərini yenidən dünyaya nümayiş etdirdi. Bu da təbidir, Ermənistan dövlətinin fəaliyyətinin tərkib hissəsi terrorizmlə sıx bağlıdır.
Bunu iyulun 27-də Yeni Azərbaycan Partiyasının Gənclər Birliyinin təşkilatçılığı ilə keçirilən “Dünya azərbaycanlıları təxribatlara qarşı” mövzusunda videokonfransda Milli Məclisin deputatı Naqif Həmzəyev səsləndirib. Millət vəkili bildirib ki, ermənilərin vandal və terrorçu hərəkətləri insidentin baş verdiyi dövlətlər tərəfindən kəskin şəkildə pislənməli, soydaşlarımıza qarşı zorakılıq faktları həmin ölkələrin hüquq-mühafizə orqanları tərəfindən ciddi araşdırılaraq, konkret tədbirlər görülməlidir. Eyni zamanda son hadisələr dünyanın müxtəlif ölkələrində yaşayan soydaşlarımız Vətənin səsinə səs verməyə, Prezidentimizin hər bir tapşırığını yerinə yetirməyə hazır olduqlarını nümayiş etdirdi.
Qeyd edək ki, videokonfransda Milli Məclisin deputatı, YAP Gənclər Birliyinin sədr müavini Ramin Məmmədov, Milli Məclisin deputatı Bəhruz Məhərrəmov, Real TV-nin Avropa müxbiri Xatirə Sərdarqızı, AMOR-un regional bölməsinin sədri Toğrul Həsənzadə, Ümumukrayna Azərbaycanlı Gənclər Təşkilatının sədri Daməd Əsgərov, AGAH təşkilatının sədri Təbriz Cəfərov, Fransada Azərbaycanın Dostları Assosiasiyasının katibi Mirvari Fətəliyeva, Azərbaycanlı Gənclər Birliyinin sədri Elman Manafov, Rusiya Yaxın Şərq Assosiasiyasının prezidenti Murad Sadıqzadə, İsveç Azərbaycanlı Gənclər təşkilatının sədri Ayda Amir Haşimi, NAYORA-nın sədri Məryəm Məcidova, ASAN Könüllüləri təşkilatının sədri Səbinə Cabbarova, ATGTİ sədri Faiq Məmmədov, YAP Gənclər Birliyi Ofisinin rəhbəri Elmar Məmmədov, “Cavan” təşkilatının sədri Murad Ağabəyli və Diasporla İş üzrə Dövlət Komitəsinin nümayəndəsi Bəxtiyar Rəhimov iştirak edib.
Onlar belə bir tədbirin keçirilməsinin əhəmiyyətli olduğunu bildirib, keçirilən aksiyaların önəmi barədə danışıblar. Eləcə də, ABŞ-da, Kanadada və Avropanın digər şəhərlərində ermənilərin azərbaycanlılara qarşı zorakı hərəkətləri barədə fikirlərini bildirib, hər zaman Azərbaycan dövlətinin və xalqının yanında olduqlarını diqqətə çatdırıblar.
Natiqlər çıxışlarında xaricdə yaşayan soydaşlarımıza ermənilərin təxribatına uymamaq, onlara qarşı mübarizəni hüquqi müstəvidə aparmaq, Azərbaycan həqiqətlərinin təbliğ olunması ilə bağlı fəaliyyəti daha da gücləndirməyi və birgə hərəkət etməyi tövsiyə ediblər.