İşğalçı Ermənistan hökumətinin məqsədi regionda yeni gərginlik ocağı yaratmaq, işğal olunmuş ərazilərdən diqqəti yayındırmaq, danışıqlar prosesini pozmaq, eyni zamanda bu kimi təxribatlarla onlar diqqəti daxili ağır sosial-iqtisadi vəziyyətlərindən yayındırmaq istəyirlər. Lakin istəklərinə nail ola bilmədilər.Güclü Azərbaycan Ordusu təcavüzkar dövlətin təxribatının qarşısını aldı, layiqli cavabla onları yerlərində oturtdu.
Bunu Milli Məclisin deputatı Naqif Həmzəyev iyulun 12-də günorta saatlarından başlayaraq Ermənistanın Azərbaycan-Ermənistan dövlət sərhədinin yerləşən Tovuz rayonu istiqamətində törətdiyi təxribatla bağlı Türkiyənin tanınmış jurnalist-blogeri Aysun Mola ilə müsahibəsində bildirib.
Aysu Molanın Azərbaycan-Ermənistan sərhəddindəki münaqişə, bölgədə sön vəziyyət, qardaş Türkiyənin Azərbaycana dəstəyi ilə bağlı suallarını ətraflı cavablandıran millət vəkili qeyd edib: “Azərbaycan – Ermənistan dövlət sərhədinin Tovuz rayonunun Ağdam kəndi istiqaməti Tovuz istiqaməti, Dağlıq Qarabağ və işğal olunmuş ərazilərimizdən xeyli uzaq məsafədə yerləşir. Və bu istiqamətdə hərbi təxribat ilk hadisə deyil. Son bir neçə ay ərzində erməni tərəfin törətdiyi hərbi təxribatlar nəticəsində burada Azərbaycan hərbçiləri, eyni zamanda, dinc kənd sakinləri, mülki şəxslər həlak olurlar. Dinc sakinlərin başına gələn faciələr Ermənistan hökumətinin beynəlxalq hüquq normalarını kobid şəkildə pozmalarının daha bir təsdiqidir. Baş verən hadisəyə görə bütün məsuliyyət mülki əhalinin müqavimət əzmini qırıb regionu onlardan təmizləmək məqsədi güdən erməni hakimiyyətinin, işğalçı ölkənin hərbi-siyasi rəhbərliyinin üzərindədir”.
Türkiyə dövlətinin dəstəyinə xüsusi ilə toxunan millət vəkili vurğulayıb ki, Azərbaycana dəstək nümayiş etdirən ilk ölkə-hər zamankı kimi qardaş Türkiyə oldu. Türkiyənin Prezidenti Rəcəb Tayyib Ərdoğan, xarici işlər naziri, müdafiə naziri və digər siyasi-ictimai xadimlər iölkəmizə dəstəklərini ifadə etdilər. Türkiyəyə məxsus pilotsuz uçuş aparatlarının Türkiyə-Ermənistan sərhədində uçuşlar həyata keçirməsi qardaş Türkiyənin Azərbaycanın yanında olduğunun təsdiqi olmaqla yanaşı, düşmənlərə mesaj oldu.