“Bir il öncə Azərbaycan Silahlı Qüvvələri ölkəmizin suverenliyini tam olaraq bərpa etdi”.
Bunu deputat Naqif Həmzəyev sentyabrın 20-nin Azərbaycanda Dövlət Suverenliyi Gününün təsis edilməsinə münasibət bildirərkən deyib.
Onun sözlərinə görə, Ali Baş Komandan İlham Əliyevin rəhbərliyi altında müstəqilliyimizi bərpa etdikdən sonra ilk dəfə suveren bir ölkədə yaşamaq hüququ əldə etdik:
"Şükürlər olsun ki, bayrağımız Azərbaycanın bütün rayon, şəhər və kəndlərində dalğalanır. Xankəndidə, Xocalıda, Ağdərədə dövlət himninin sədaları altında silahlı qüvvələrimizin paradı keçirildi. Həmin ərazilərdə sürətli quruculuq, abadlıq işləri gedir. Bunlar ən yeni tariximizdir və Azərbaycan dövlətinin ən şanlı tarixidir. O baxımdan cənab prezidentin həmin günün Dövlət Suverenlik Günü kimi qeyd edilməsi ilə bağlı sərəncamı çox düzgün və zamanında verilmiş qərardır. Belə bir günün təsis edilməsi çox önəmli idi. İnanıram ki, qanunvericiliyə müvafiq dəyişikliklər edildikdən sonra bu gün qeyri-iş günü kimi qəbul olunacaq. Biz bu günü bayram kimi qeyd edəcəyik. Heç zaman imkan verməyəcəyik ki, suverenliyimiz təhdid altına düşsün".
Müsahibimiz bəyan edib ki, Azərbaycanın həyata keçirdiyi uğurlu xarici-daxili siyasət qonşularımız üçün də bir nümunə olmalıdır və olacaq:
"İndiyədək təcavüzkar siyasət yeritmiş Ermənistan pozucu əməllərindən vaz keçməli, sülhün dayanıqlı və uzunmüddətli olması üçün səmimi addımlar atmalıdır. Əvvəlki səhvi təkrar etməməlidirlər".
Qeyd edək ki, 20 sentyabr - Azərbaycanda Dövlət Suverenliyi Günü təsis edilib.
Bununla bağlı Prezident İlham Əliyev sərəncam imzalayıb. Sərəncamda bildirilib ki, 2023-cü il sentyabrın 19-da Azərbaycanın Qarabağ iqtisadi rayonunda törədilən genişmiqyaslı təxribatların qarşısının alınması və Ermənistan silahlı qüvvələrinin qalıqlarının tərksilah edilərək torpaqlarımızdn çıxarılması, həmin ərazilərdə Azərbaycan konstitusiya quruluşunun bərpa edilməsi məqsədilə antiterror əməliyyatına başlanılıb. Cəmi 23 saat davam etmiş və sentyabrın 20-də başa çatmış əməliyyat nəticəsində rəşadətli Azərbaycan Ordusu qarşısına qoyulmuş bütün vəzifələri yüksək peşəkarlıqla yerinə yetirib.
Beləliklə, növbəti parlaq Qələbə nəticəsində Azərbaycan Respublikasının suverenliyi tam bərpa edilib. Azərbaycan xalqının həyatında müstəsna əhəmiyyət kəsb edən şanlı Zəfər sayəsində bu gün Azərbaycan Respublikasının Dövlət Bayrağı suverenliyimizin bərqərar olduğu bütün ərazilərdə əzəmətlə dalğalanmaqdadır.
Qeyd olunub ki, hər bir xalq üçün öz taleyinə sahib olmaq, müstəqil dövlətini yaradaraq inkişaf etdirmək onun ən böyük nailiyyətidir. Tarixin müxtəlif mərhələlərində üzləşdiyi çətinliklərə, işğala, məhrumiyyətlərə baxmayaraq, heç bir qüvvə xalqımızın müstəqillik, dövlətçilik əzmini sarsıda bilməyib. Azərbaycan xalqı bu gün öz müstəqil dövlətinə sahibdir, qəhrəman əsgər və zabitlərimizin, şəhidlərimizin qanı hesabına əldə edilmiş ərazi bütövlüyümüz, suverenliyimiz xalqımızın milli sərvətidir.