![Fransa prezidenti istefa verə bilər Fransa prezidenti istefa verə bilər](https://hamzayev.az/uploads/posts/2024-07/medium/1720594186_eaaf1a5b-naqif-hmzyev-1170x824.jpg)
Məlum olduğu kimi, Emmanuel Makron koalisiyasının Avropa Parlamentinin seçkilərində məğlub olmasından sonra iyunun 9-da Milli Assambleyaya növbədənkənar seçkilər təyin etdi. Seçkilərin birinci və ikinci turu artıq yekunlaşıb. Nəticələrə görə "Yeni Xalq Cəbhəsi" solçu alyans növbədənkənar seçkilərdə qalib gəlib.
Partiya Milli Assambleyada 188 yer qazanıb. Digər koalisiyalar isə 168 mandatla ikinci yerdədir. Milli Birlik Koalisiyası 140 yer tutub və digər xırda sağçı və solçu partiyalar təxminən 45 yerə sahibdir. Ancaq əsas məsələ ondan ibarətdir ki, tam olaraq yekdil səslərin çoxluğu heç bir koalisiya tərəfindən qazanılmadığı üçün tək hökumət qurmaq heç bir koalisiyaya böyük ehtimalla qismət olmayacaq. Yenə də müəyyən hökumət qurulması üçün koalisiyalar və digər partiyalardan səslərə ehtiyac yaranacaq. Ancaq buna baxmayaraq, artıq Fransanın baş naziri Qabriel Attal istefa verəcəyi ilə bağlı məlumat vermişdir. Bütün bu dəyişikliklər təbii ki, Azərbaycan üçün önəmlidir. Biz istəyirik ki, Fransa-Azərbaycan münasibətləri normallaşsın. Ancaq təəssüflər olsun ki, Makron hökuməti bu məsələlərdə qərəz nümayiş etdirir. Ermənistandan çox erməni mövqeyi sərgiləməkdədir və Ermənistanı açıq şəkildə silahlandırır. Düşünürəm ki, parlamentdə Makron hökumətinin güc itirməsi, nəticə etibarilə onun karyerasının sonunu gətirəcək. Bu seçkilərdən sonra hökumət formalaşdırmaq Makrona nəsib olmayacaq. Bəlkə də heç prezidentlik mandatının son dövrlərini də yaşaya bilmədi. Tezliklə o da istefa vermək məcburiyyətində qala bilər.
İstənilən halda, nə vaxta qədər ki, Makron prezident olaraq qalacaq, düşünürəm ki, Fransanın Azərbaycana qarşı siyasətində biz köklü dəyişikliklərin şahidi olmayacağıq. Ola bilsin ki, yeni formalaşacaq hökumət Makron hakimiyyətinin buraxdığı səhvləri doğru, düzgün analiz edərək Cənubi Qafqazın ən güclü dövləti ilə münasibətlərini bərpa etmək siyasətini həyata keçirəcək. Nəzərə alınmalıdır ki, xüsusilə də yeni reallıqlar fonunda böyük güclər, güc mərkəzləri Azərbaycanla münasibətlərini ən yüksək səviyyədə qoruyub saxlayır və ölkəmizlə əməkdaşlığa can atırlar. Azərbaycan da bu əməkdaşlığı düzgün dəyərləndirərək iqtisadi, siyasi, mədəni, sosial və bütün sahələrdə inkişaf etdirmək üçün lazımi tədbirlər görür.
Naqif HƏMZƏYEV.