Azərbaycan növbəti mötəbər bir tədbirə ev sahibliyi edir. Bu gün açılışı olan Bakı Enerji Həftəsi iyunun 6-dək davam edəcək. Bakı Enerji Həftəsi özündə üç mötəbər tədbiri birləşdirir: 29-cu Beynəlxalq Xəzər Neft və Qaz Sərgisi “CaspianOil&Gas”, 12-ci Xəzər Beynəlxalq Energetika və Yaşıl Enerji Sərgisi “CaspianPower” və 29-cu Bakı Enerji Forumu.
Hər il keçirilən və özündə üç mühüm tədbiri birləşdirən Bakı Enerji Həftəsi bütün dünyanın enerji sənayesi sahəsində mövcud olan liderlərini bir araya gətirir və bununla da diqqəti Azərbaycanın üzərinə cəmləşdirir. Bakı Enerji Həftəsində 37 ölkədən 300-dək şirkət iştirakını təsdiq edib. Bakı Enerji Həftəsi bütün dünyanın enerji sənayesi sahəsində mövcud olan liderlərini bir araya gətirir və bununla da diqqəti Azərbaycanın üzərinə cəmləşdirir.
İsveç, Hindistan və Sloveniyadan olan şirkətlər ilk dəfədir ki, tədbirə qatılırlar. Builki sərginin tərkibi iştirakçıların ümumi sayının 15 faizini təşkil edən yeni şirkətlər hesabına yenilənib. Onların əksəriyyəti Azərbaycanın yaşıl enerji sahəsinə yüksək maraq göstərən xarici iştirakçılardır. Sərgi sahəsinin 40 faizi isə tanınmış şirkətlərə, sərgilərin daimi iştirakçılarına məxsusdur.
Millət vəkili Naqif Həmzəyev açıqlamasında bildirib ki, Azərbaycan uzun illərdir Bakı Enerji Həftəsi təşkil edir
Deputatın sözlərinə görə, ölkəmiz sadəcə regionda deyil, qlobal məkanda da enerji mərkəzi olaraq tanınır:
"Azərbaycan hazırda Avropanın enerji təhlükəsizliyində çox aktiv iştirak edir. Eyni zamanda Azərbaycan prezidenti İlham Əliyev tərəfindən reallaşdırılmış meqalayihələr əvəzolunmaz proyektlər kimi qiymətləndirilir. Ulu Öndər tərəfindən həyata keçirilmiş "Əsrin müqaviləsi"ndən sonra Bakı-Tbilisi-Ceyhan, Bakı-Tbilisi-Ərzurum layihələrinin reallaşmasına şahidlik etmişik. Sonrakı dövrlərdə isə TAP və TANAP layihələrinin həyata keçirilməsini gördük. Halbuki, bunlar dünya ekspertləri tərəfindən riskli layihələr hesab olunur və müəyyən əngəllər yaradılırdı. Hər şeyə rəğmən, Azərbaycan öz gücü, imkanları hesabına bu mühüm layihələri reallaşdırdı. Xarici investorlar və şirkətləri bu prosesə cəlb etdi, böyük yükü isə Azərbaycan öz üzərinə götürdü. Nəticə etibarı ilə Azərbaycan Gürcüstan və Türkiyə ilə yanaşı, həm Şərqi Avropa, həm də Balkan dövlətlərinə faktiki olaraq enerji resurslarını çatdıra bilir".
Müsahibimiz qeyd edib ki, dövlətimizin başçısı İlham Əliyev açılış mərasimində çıxışı zamanı qaz layihələrinin qaz təchizatı coğrafiyasını genişləndirməkdə maraqlı olduğunu vurğuladı:
"Xüsusən bəyan edildi ki, Orta Dəhlizin inkişaf etdirilməsi yalnız yükdaşımalarla deyil, eyni zamanda Orta Asiya ölkələrinin enerji resurslarının da məhz Azərbaycan vasitəsi ilə dünya bazarına, Avropaya çıxarılmasını nəzərdə tutmaqdadır. Bir sözlə, Azərbaycan çox ağır bir yükün altına girib və uğurla bunun öhdəsindən gəlir. İnanırıq ki, Azərbaycan hazırda klassik enerji resurslarının ixracı ilə yanaşı, "Yaşıl enerji" layihələrinin ixracını da reallaşdıran bir dövlət kimi tanınmaqdadır. COP29 kimi önəmli bir tədbirin də Azərbaycanda keçirilməsi də Azərbaycanın bu sahədə nə qədər maraqlı və ciddi olduğunun nümunəsidir. Azərbaycan enerji resurslarının ixracını həyata keçirən bir dövlət statusunu uzun illər qoruyacaq və bu resursların insan kapitalına, vətəndaşların sosial-rifahının gücləndirilməsinə yönəldəcək”.
Naqif Həmzəyev: Ölkəmiz sadəcə regionda deyil, qlobal məkanda da enerji mərkəzi olaraq tanınır
“Əminliklə demək olar ki, Azərbaycan sadəcə öz maraqlarını qorumaqla kifayətlənmir, həmçinin, bölgənin, Cənubi Qafqazın da maraqlarını uğurla qoruyur, müdafiə edir. Sülhün qarantına çevrilən dövlət statusunu gündən-günə gücləndirir", - deyə Naqif Həmzəyev vurğulayıb.