"Azərbaycanda uğurlu kadr siyasəti həyata keçirilir". Bu sözləri açıqlamasında deputat Naqif Həmzəyev deyib.
Deputat bildirib ki, artıq Azərbaycanda əvvəlki dövrlərdən fərqli olaraq milli kadrların hazırlanması, yetişdirilməsi və onların praktikada da uğur qazanmasının şahidi olmuşuq: "Cənab Prezident bütün məmurlar qarşısında konkret tələblər qoyub. Bütün məmurların, dövlət qulluqçularının əsas məqsədi, fəaliyyətinin qayəsi Azərbaycan xalqına, vətəndaşlarına ləyaqətlə, vicdanla xidmət etməkdir. Bu cür milli kadrların sayı gündən-günə artmaqdadır. Əgər əvvəl gənclərin sayı az idisə, indi dövlət qurumlarında, aparıcı vəzifələrdə gəncləri görə bilirik. Xüsusilə, yeni dövrdə yetişmiş, formalaşmış, milli ruhda olan gənc kadrların sayı artır. Cənab Prezident tərəfindən də bu siyasət hər ötən gün daha uğurla həyata keçirilir. Son dövrlərdə yüksəliş müsabiqəsinin təşkil edilməsi, yüksəliş müsabiqəsi qaliblərinin çox önəmli vəzifələrə təyin olunması, onların nazirlər, nazir müavinləri və çox təcrübəli kadrların yanında praktika keçməsi də yaxşı bir ənənədir. Bu istər-istəməz Azərbaycanın milli kadrlarının formalaşması, inkişaf etdirilməsi və vətəndaşlara xidmətin ən yüksək səviyyədə təşkil olunmasına kömək göstərən amillərdən biridir".
Onun sözlərinə görə, artıq Azərbaycan gəncləri xarici universitetlərdə rahatlıqla dövlət proqramı vasitəsilə təhsil ala bilirlər: "Bu layihələr icra edilir. Gənclərimiz ən çox tələb olunan ixtisaslar üzrə yüksək bilik və bacarığa sahib olurlar. Daha sonra qayıdaraq Azərbaycan dövlətinə xidmət edirlər. Mən düşünürəm ki, hal-hazırda Azərbaycan universitetlərinin də keyfiyyət səviyyəsi getdikcə artır. Dünya universitetləri ilə rəqabətə girə biləcək universitetlərimiz var. Müəyyən ixtisaslar üzrə biz çox uğurlu kadrlar yetişdirə bilirik. Həm xaricdə, həm daxildə yüksək səviyyədə təhsil alan gənclərimiz uğurla əmək bazarında özlərinə yer tapa bilirlər. Bu da bizi sevindirir. Hər ötən gün Azərbaycan kadr potensialını daha da gücləndirir. Qarabağ zəfərindən sonra bu proseslərdə yaxından iştirak edən şəhid övladlarına, qazilərimizə də üstünlük verilir. Onların da məşğulluq məsələləri həll olunmaqdadır. Mən inanıram ki, yaxın gələcəkdə savadlı, bilikli gənclərimizin işğaldan azad olunmuş torpaqlarda işləməsi, orada fəaliyyətlərini davam etdirmələri daha da mümkün olacaqdır. Çünki bu gün orada yeni iş yerləri yaradılır. Savadlı, bilikli, təcrübəli gənc kadrlarımız həmin ərazilərdə fəaliyyətlərini davam etdirirlər. Bu da istər-istəməz həmin ərazilərin ən qısa zamanda cənnət məkana dönməsi üçün əla fürsət olacaqdır. Gənclərimiz orada öz töhfələrini verərək bu prosesləri daha da sürətləndirəcəkdir. Hal-hazırda milli ruhda yetişən, savadlı, bilikli, vətəninə, millətinə sadiq olan və Azərbaycan qanunlarını yaxşı bilən, Azərbaycan qanunvericiliyinə əməl edən, vicdanla çalışan kadrların sayı artır. İnanıram ki, yaxın gələcəkdə savadlı kadrlarımız daha da çox olacaqdır. Azərbaycan vətəndaşları daha yaxşı xidmət ala biləcəklər".