Türkiyə Prezidenti Rəcəb Tayyib Ərdoğan mayın 9-u ABŞ-yə rəsmi səfərə yollanacaq. Türkiyə lideri Ağ Evdə ilk dəfə ABŞ Prezidenti Co Baydenlə görüş keçirəcək. Ərdoğanla Bayden beynəlxalq tədbirlər zamanı görüşlər keçirsə də, bu, iki lider arasında Oval Ofisdə ilk belə görüş olacaq. Tərəflərin terrorla mübarizə, Qəzza zolağında son vəziyyət və müdafiə sahəsində əməkdaşlıq kimi məsələləri müzakirə edəcəyi gözlənilir. SİA mövzu ilə bağlı deputat Müşfiq Cəfərovun və Naqif Həmzəyevin fikirlərini öyrənib.
Deputat Müşfiq Cəfərov: "Tarixən Türkiyə - Amerika münasibətləri heç də ürək açan olmayıb. Lakin Türkiyə II Dünya müharibəsindən sonrakı müddətdə kiçik kəsintiləri nəzərə almasaq, həmişə ABŞ ilə müttəfiq münasibətlərini qoruyub saxlaya bilib. Son zamanlar Türkiyə- Amerika münasibətləri hər sahədə inkişaf edir. Doğrudur hərbi sahədəki əlaqələrdə bir qədər durğunluğa səbəb olsa da, bu yeni dünya düzənində əhəmiyyətli bir mövqeyə sahib olan Türkiyə xarici siyasətdə ABŞ ilə əlaqələri qorumağa üstünlük verir. Bu ilin may ayında Türkiyə Prezidenti Rəcəb Tayyib Ərdoğan ABŞ-yə səfər etməsi nəzərdə tutulur. O, Vaşinqtonda həmkarı Co Baydenlə danışıqlar aparacaq. Çox güman ki, danışıqlar əməkdaşlıq əlaqələriylə yanaşı, hazırda dünyanın bir çox nöqtəsində höküm sürən terror hadisələrini də əhatə edəcəkdir. Lakin bu il may ayında ABŞ da seçkilərin keçirilməsini nəzərə alsaq, mən deyərdim ki, prezidentlərin görüşü təxirə salına bilər. Çünki ABŞ seçki zamanı adətən təhlükəsizlik baxımdan da problemlər yaşayır. Çox guman hər iki dövlətin gözlənilən görüşü iyulda Vaşinqtonda NATO sammiti çərçivəsində də baş tuta bilər".
Deputat Naqif Həmzəyev: "Bildiyimiz kimi Türkiyə və Amerika NATO birliyinin üzvüdür. Uzun illər Amerika və Türkiyə arasında münasibətlər normal olub. Müttəfiqlik münasibətləri əsasında bu münasibətlər inkişaf edib. Ancaq son dövrdə Amerika Birləşmiş Ştatlarının həyata keçirdiyi bəzi regional siyasət eyni zamanda Türkiyənin yeni növ qırıcı təyyarələrinin verilməsi məsələsindəki problemlər bu münasibətlərdə gərginlik yaradıb. Ancaq istənilən halda strateji baxımdan düşündükdə Amerika və Türkiyə müttəfiqdirlər, eyni hərbi blokun üzvüdürlər. Düşünürəm ki, çox hörmətli Rəcəb Tayyib Ərdoğanın Vaşinqtona planlaşdırılan səfəri, həmkarı ilə görüşü bəzi məsələlərdə müəyyən həllərə gətirib çıxara bilər. Həmçinin Türkiyə sərhədlərində, İraq və Suriyada həyata keçirilən əməliyyatlar, xüsusilə də, Fələstin-İsrail münaqişəsində normallaşmanın əldə edilməsi üçün çox müsbət addım ola bilər. Faktiki olaraq müsəlmanlara qarşı törədilən bu haqsız mövqe istər-istəməz dayandırılmalıdır, çünki terroristlərlə, hər hansı terror qruplaşması ilə yanaşı çoxlu sayda dinc sakinlər də bu münaqişələr zamanı şəhid olurlar. Bu baxımdan da Türkiyə sərhədlərində, xüsusilə də, müsəlmanlar yaşayan ərazilərdə sülhün əldə edilməsi Türkiyə və İslam həmrəyliyi təşkilatına üzv olan dövlətlər üçün vacibdir. Bu baxımdan Amerika bu ərazidə sülhün əldə olunmasında müsbət töhfələr verə bilər. Məhz görüş zamanı mütləq bu məsələlər nəzərdən keçiriləcəkdir.
Həmçinin Ukrayna-Rusiya müharibəsi, təəssüflər olsun ki, hələ də davam edir. Türkiyə yeganə dövlətdir ki, Ukrayna və Rusiya arasında vasitəçi rolunu oynaya bilər. Çünki hər iki tərəfdən də Türkiyəyə inam var. Amerikanın da sülhü istəyəcəyi təqdirdə Türkiyə bu missiyanı uğurla həyata keçirə bilər. Yaxın gələcəkdə NATO-Rusiya toqquşmasının qarşısı məhz Türkiyə vasitəsilə alına bilər. Belə bir toqquşmanı Türkiyə də istəmir. Çünki bu cür toqquşma nəticə etibarilə heç bir tərəfə fayda verməyəcək. Bu baxımdan da Türkiyə bütün münaqişələrin sülh yolu ilə həll olunmasında maraqlıdır. İnanıram ki, Amerikadakı danışıqlar zamanı da prezidentlər tərəfindən bu məsələlər əsas ana gündəm olacaqdır. Ümid edək ki, bu müzakirələr zamanı müsbət nəticələr də edilə biləcəkdir".