“2024-cü il Qarabağın dirçəlişində yeni bir dönəm olacaq”.
Bunu açıqlamasında millət vəkili Naqif Həmzəyev bildirib. Millət vəkili qeyd edib ki, cari ildə azad edilmiş ərazilərdə quruculuq işlərinin genişlənməısi ilə yanaşı, 2023-cü illə müqayisədə daha çox məcburi köçkünün bu torpaqlara qayıdışı nəzərdə tutulur:
“Bildiyiniz kimi, Prezident İlham Əliyevin bilavasitə qayğısı ilə işğladan azad edilən ərazilərin abadlaşdırılması, müasir şəhər və kəndlərin salınması prosesi sürətlə davam edir. Görülən işlərin miqyası vətəndaşlarımızla yanaşı, xarici qonaqları, dünya ictimaiyyətini də heyrətləndirməkdədir.
Bu gün Qarabağda inşa edilən yollar, yaşayış binaları, sosial obyektlər, park və istirahət mərkəzləri öz gözəlliyi, müasirliyi ilə göz oxşayır.
Ötən illə müqayisədə 2024-cü ildə daha çox keçmiş məcburi köçkünün öz doğma ocağına qayıdışı təmin ediləcək ki, bu da dövlətimizin tarixi nailiyyətidir. Bu fakt bir daha sübut edir ki, Azərbaycan xalqı qurucu, yaradıcı xalqdır. O, hərb meydanında olduğu kimi quruculuq meydanında da möcüzə yaratmağı bacarır.
Mən xalqımızı bayram münasibətilə təbrik edir, ona firvanalıq və tərəqqi arzulayıram. İnanıram ki, dövlət və xalq olaraq qarşıya qoyduğumuz hər bir məqsədə çatacaq, bütün dostlarımızı uğurlarımızla sevindirəcəyik”.