Xəbər verdiyimiz kimi, Azərbaycan Prezidenti İlham Əliyev Novruz bayramını işğaldan azad edilmiş Xankəndidə qeyd edib.
Dövlət başçısı bayram tonqalını yandıraraq Azərbaycan xalqını bu münasibətlə təbrik edib.
Prezidentin artıq növbəti dəfə Novruz bayramını Qarabağda keçirməsi və xalqı təbrik etməsi xüsusi hadisə kimi tarixə düşüb.
Bəs Ali Baş Komandanın Xankəndidə tarixi çıxışı dünyaya və düşmənlərimizə hansı mesajları vermiş oldu?
Mövzu ilə əlaqədar açıqlama verən Milli Məclisin deputatı Naqif Həmzəyev bildirib ki, İlham Əliyevin Xankəndidə Novruz tonqalını yandırması və oradan Azərbaycan xalqını təbrik etməsi hər birimizi qürurlandırdı:
"Azərbaycan Respublikasının Prezidenti cənab İlham Əliyevin Xankəndidə Novruz tonqalını yandırması və oradan Azərbaycan xalqını təbrik etməsi hər birimizi qürurlandırdı. Bu, Azərbaycan dövlətinin gücünü, İlham Əliyevin qətiyyətini göstərmiş oldu. Xankəndində yandırılmış Novruz tonqalı bizim qələbəmizin simvoludur və işğaldan azad edilmiş bütün ərazilərdə uzun illər işğal siyasəti həyata keçirmiş, separatizmlə məşğul olmuş, qanunsuz faəliyyətləri yerinə yetirən quldurların əllərinin yanmasıdır. Bir növ bu Novruz tonqalı buradakı murdar xisləti və təcavüzkar siyasəti tamamilə yandırıb kül etdi. Biz görürük ki, Zəfər paradının Xankəndidə keçirilməsindən sonra burada nə qədər quruculuq, abadlıq işləri həyata keçirilib. Bu Zəfər meydanında ancaq cənab Prezidentin bizi istəməyən qüvvələrə verdiyi mesaj, eyni zamanda dostlara birlik, bərabərlik və təbrik mesajının ötürülməsi Azərbaycanın bir daha gücünü göstərdi. Biz inanırıq ki, cənab Prezident Azərbaycan xalqını həmişə zəfərdən-zəfərə aparacaq".
Deputat əlavə edib ki, dövlət başçısı İlham Əliyevin sayəsində işğaldan azad edilmiş ərazilər gündən-günə çiçəklərin və firavanlaşır:
"2024-cü ildə Xankəndi sakinləri öz ata-baba yurdlarına qayıda biləcək. Həmçinin işğaldan azad olunmuş digər ərazilərimizə keçmiş məcburi köçkünlər qayıtmaqda davam edəcəklər. Bütün bu ərazilər cənnət məkana çevriləcək. Biz fəxr edirik ki, cənab Prezident, möhtərəm Ali Baş Komandan İlham Əliyev kimi liderimiz var. Əminliklə inanırıq ki, Azərbaycan xalqının bu gündən sonra kədərli, acılı, hüznlü günləri olmayacaq. Biz ildən-ilə irəli gedəcəyik. Allah bütün şəhidlərimizə rəhmət etsin. Biz öz torpaqlarımızı şəhidlərimizin qanı hesabına geri qaytarmışıq. Allah qazilərimizə can sağlığı versin. Azərbaycan xalqına həmişə belə həmrəy olmağı və bir yumruq kimi qalmağı arzu edirəm. Bayramımız mübarək olsun".