“Dünya ictimaiyyəti əslində Azərbaycanın tərəfini saxlayır, ancaq bir qrup beynəlxalq təşkilat dünya ictimaiyyəti adından danışmağa səy göstərir. Bu haqda cənab Prezident andiçmə mərasimində ətraflı danışdı. Həqiqətən də bir və ya bir neçə dövlətin dünya ictimaiyyəti adından danışması, Azərbaycana hansısa təzyiqlər göstərməsi qəbuledilməzdir. Azərbaycanın mövqeyini dəstəkləyən kifayət qədər dost dövlətlər var. Azərbaycan bundan sonra da öz yolunda inamla addımlayacaq. Ölkəmizin sərgilədiyi mövqe ilə barışmaq istəməyən və ona müxtəlif tələlər quran, güclənmək mərhələsində qarşısını kəsmək istəyən bu qüvvələr gec-tez reallıqları dərk edəcəklər. 10 minlərlə kilometr uzaqdan gəlib Cənubi Qafqazda “ədaləti bərpa etmək” adı altında hansısa planlar icra etməyin yeri yoxdur. Azərbaycan buna imkan verməyəcək. Güclənən Azərbaycanın mövqeyini qəbul etmək məcburiyyətində qalan region dövlətləri də birləşərək kənar təhdidlərin qarşısını alacaqlar. Başqa yolumuz yoxdur. Bu mərhələdə hər zaman olduğu kimi, Azərbaycan xalqı cənab Prezidentin arxasında sıx birləşməlidir. Yalnız birliyimiz, vəhdətimiz hesabına gücümüzü və inkişafımızı qoruya bilərik”.
Bu sözləri açıqlamasında Milli Məclisin deputatı Naqif Həmzəyev deyib.
Deputat xatırladıb ki, Azərbaycan torpaqlarının işğalda saxlanıldığı 30 il müddətində beynəlxalq ictimaiyyətdən, xüsusilə Qərb dairələrindən Qarabağ probleminin sülh yolu ilə həll olunmasına dəstək gözləyib: “Amma təəssüf ki, onlara məhz Qarabağ problemini həll etmək mandatı verilsə də, həmin qüvvələr yalnız regiona turistik səfərlər etdilər. Faktiki olaraq bu münaqişəni dondurmaq və gənc nəsillərin doğma torpaqlara qayıtmaq istəyini unutdurmaqla problemin Ermənistanın xeyrinə həll olunmasına dəstək verdilər. Ermənistandan çox erməni mövqeyi sərgiləyən bəzi beynəlxalq təşkilatlar və bu təşkilatlarda təmsil olunan siyasətçilər ikili standartlardan qətiyyən çəkinmədilər. Onlar açıq şəkildə Ermənistanın tərəfini tutdular. Azərbaycanın problemi həll etməsində dəstək göstərmədilər. Müxtəlif dövrlərdə “demokratiya”, “insan haqları” bəhanələri ilə, Azərbaycana müxtəlif təzyiqlər göstərməklə onu zəiflətmək, inkişafdan saxlamaq niyyətini ortaya qoydular. Bu baxımdan, Azərbaycan özü üçün ən böyük problem olan Qarabağ problemini, torpaqların işğal altında saxlanılması məsələsini özü öz gücü hesabına həll etdi. Problemi həll etdikdən sonra həmin qüvvələrin bizə təsiretmə alətləri zəiflədi və onlar bu gün Azərbaycanın güclənməsini istəmir, Azərbaycanın onların oyunlarını pozmasını qəbul edə bilmirlər. Xüsusilə, Cənubi Qafqazda aparıcı dövlət olan Azərbaycanın bəzi qüvvələrin təsiri altına düşməməsi onları çox qəzəbləndirir. Azərbaycan daha da güclü olmalıdır, öz mövqelərini gücləndirməli, bacardığı qədər çalışmalıdır ki, kənar təhlükələrdən özünü qorusun. Azərbaycan yeni dövrdə yeni çağırışları həll etmək üçün müxtəlif vasitələrdən istifadə edəcək. Bunlardan ən birincisi ilk növbədə Türk Dünyasına inteqrasiyanı daha da gücləndirmək, türk dövlətləri arasında əlaqələri daha da möhkəmləndirmək, türk xalqları arasında mədəni, iqtisadi, siyasi və bütün sahələrdəki münasibətləri yeni dövrə, mərhələyə çıxara bilməkdir. Bizim ən çox güvəndiyimiz və etibar etdiyimiz birlik məhz Türk Dünyasıdır, türk ailəsidir. Türk Dünyası bizim təbii birliyimizdir. Bu baxımdan, bu birliyin güclənməsinə və inkişaf etdirilməsinə daha çox vaxt ayırmalıyıq. Ən təbii bağımıza daha sıx bağlanmalıyıq”.