"Azərbaycanda keçirilən növbədənkənar prezident seçkiləri azad və demokratik şəraitdə təşkil edilmişdi. Bu seçkiləri izləyən yerli və xarici müşahidəçilərlə ilkin təmasımız nəticəsində əminliklə deyə bilərik ki, onların mövqeyi çox müsbət idi. Xüsusilə də seçkilərdə vətəndaşların aktiv iştirakı və seçkilərin şəffaf şəkildə həyata keçməsi müşahidəçilər tərəfindən də qeydə alınıb. Son illərdə keçirilmiş seçkilər arasında fevralın 7-də baş tutan Zəfər seçkisi xüsusi önəm kəsb edir". Bu sözləri açıqlamasında Milli Məclisin deputatı Naqif Həmzəyev deyib.
Onun sözlərinə görə, seçkilərdə cənab İlham Əliyevin yüksək səs çoxluğu ilə qalib gəlməsi torpaqlarımızı işğaldan azad edən, xalqımızın Qarabağ həsrətinə son qoyan və suverenliyimizi bərpa edən Liderə Azərbaycan xalqının vəfa borcunun yerinə yetirilməsi kimi də dəyərləndirilməlidir: "Xalq öz seçimi ilə bizə qarşı törədilmiş təxribatlar, həyata keçirilməsi planlaşdırılan xoşagəlməz hadisələrin cavabını vermiş oldu. Qərbin, Ermənistandan daha çox erməni mövqeyi sərgiləyən dövlətlərin, eyni zamanda Azərbaycanı istəməyən bir çox beynəlxalq təşkilatların qurmaq istədiyi bütün oyunlar alt-üst oldu".
Deputat qeyd edib ki, ilkin nəticələr açıqlandıqdan sonra Azərbaycana dost-qardaş olan ölkələrin, beynəlxalq təşkilatların rəhbərləri, nüfuzlu siyasətçilər Prezident İlham Əliyevə təbrik mesajları ünvanladılar: "On minlərlə azərbaycanlı dövlət başçısına öz təbriklərini və sevincini ifadə etdi. Bir sözlə, Azərbaycan bu seçkiləri demokratik şəkildə keçirməyi bacardı və xalq da öz qalib Liderini dəstəklədi. İnanıram ki, növbəti 7 il ərzində də cənab İlham Əliyev Azərbaycan xalqının arzu və istəklərini reallaşdıra biləcək, dövlətimizi daha da gücləndirəcək, qarşıda duran bütün çağırışlar uğurla həyata keçirəcək. Biz gələcəyə inamla baxır və inanırıq ki, cənab İlham Əliyevin prezidentliyi dövründə zəfərdən-zəfərə irəliləyəcəyik".