2 Fevral - Azərbaycan Gəncləri Gününə həsr olunmuş silsilə tədbirlər çərçivəsində “Böyük Qayıdış” Gənclər Təşkilatının idarə heyətinin üzvlərinin, Vətən müharibəsi qazilərinin və üzv gənclərin iştirakı ilə Fəxri xiyabanda Ulu Öndər Heydər Əliyevin məzarı ziyarət edilib. Gənclər dahi şəxsiyyətin əziz xatirəsini ehtiramla yad edərək məzarı önünə gül dəstələri qoyublar.
"Böyük Qayıdış" Gənclər Təşkilatından bildiriblər ki, ardından Şəhidlər xiyabanını ziyarət edən gənclər ölkəmizin suverenliyi və müstəqilliyi uğrunda canından keçmiş şəhidlərimizin əziz xatirəsini dərin ehtiram və qürurla anıblar.
Tədbirlər proqramına uyğun olaraq Gənclər Günü münasibətilə Qayıdış Könüllüləri arasında boulinq yarışı keçirilib. 25 Qayıdış Könüllüsünün komandalar şəklində iştirak etdiyi, maraqlı və əyləncəli anlarla yadda qalan yarışda “Xudafərin” komandası qalib gələrək birinci yer, “Zəngəzur” və “Murov” komandaları isə müvafiq olaraq ikinci və üçüncü yerləri tutublar.
Gənclər Fondunun dəstəyi ilə "Böyük Qayıdış" Gənclər Təşkilatı tərəfindən Gənclər Gününə həsr olunmuş silsilə tədbirlər çərçivəsində təşkilatın fəaliyyətində aktivlik göstərən üzv gənclərin, gənc Vətən müharibəsi qazilərinin, Qayıdış Könüllülərinin və Təcrübə Proqramının iştirakçılarının təltifetmə mərasimi keçirilib.
Mərasimdə Azərbaycan Respublikasının Gənclər Fondunun icraçı direktor vəzifəsini müvəqqəti icra edən Qədir Xəlilov, Milli Məclisin deputatları Müşfiq Cəfərov və Naqif Həmzəyev, Gənclər və İdman Nazirliyinin sektor müdiri Elşən Qəhrəmanov, Gənclərin İnkişaf və Karyera Mərkəzinin Baş direktoru Azər Əliyev, “Böyük Qayıdış” Gənclər Təşkilatının sədri Nail Şükürov çıxış edərək hər il ölkəmizdə təntənəli surətdə Gənclər Günü kimi qeyd edilən bu əlamətdar tarixin uzaqgörən siyasətçi, dahi lider Heydər Əliyevin adı ilə bağlı olması diqqətə çatdırılıb.
Qeyd olunub ki, əsası Ulu Öndər tərəfindən qoyulan gənclər siyasətinin əsas hədəflərindən biri gənclərin cəmiyyət həyatının bütün sahələrində aktiv iştirakını təmin etmək olub. Həmçinin o da vurğulanıb ki, bu gün ərazi bütövlüyü və suverenliyi tam bərpa olunmuş ölkəmizdə gənclər siyasəti mahiyyət və keyfiyyətcə yeni mərhələyə qədəm qoyub. Qalib xalqın gəncləri bu gün cəmiyyətimizin ən fəal hissəsi kimi ölkənin sosial-iqtisadi və ictimai-siyasi həyatında yaxından iştirak edirlər. İşğaldan azad olunmuş ərazilərimizin dirçəldilməsində, əzəli torpaqlarımızda həyatın yenidən bərpa olunmasında və Böyük Qayıdış prosesində gənclərin aktiv iştirakı ilə bağlı gözləntilər də böyükdür. Bu xüsusda, “Böyük Qayıdış” Gənclər Təşkilatın fəaliyyətində fəal iştirak edən gənclərin təşəbbüslərini yüksək qiymətləndirən çıxışçılar, bu nəcib dəstəyə görə onlara təşəkkürlərini bildiriblər.
Təltiflərdən sonra tədbir yaradıcı gənclərin təqdimatında bədii hissə ilə davam edib.
