"Azərbaycan Qarabağ və Şərqi Zəngəzuru işğaldan azad etdikdən sonra bu torpaqlara keçmiş məcburi köçkünlərin ən qısa zamanda qayıtmasını təmin etmək üçün təxirəsalınmaz işlər həyata keçirməyə başladı". Bu sözləri açıqlamasında deputat Naqif Həmzəyev deyib.
Onun sözlərinə görə, Cənab Prezident İlham Əliyevin və birinci vitse-prezidenti Mehriban Əliyevanın birbaşa nəzarətində həyata keçirilən quruculuq, abadlıq, yenidənqurma işləri istədiyimiz kimi davam edir: "Bizim qarşımızı kəsən əsas maneə bu torpaqların Ermənistan və seperatçılar tərəfindən minalarla çirkləndirilməsidir. Azərbaycanda ANAMA və digər qurumlar tərəfindən minadan təmizləmə işləri uğurla həyata keçirilir. Biz inanırıq ki, tezliklə mina bəlasından canımızı xilas edəcəyik. Ermənistanla aparılan danışıqlar nəticəsində bu ərazilərdə basdırılmış minaların dəqiq xəritəsinin əldə olunma ehtimalı var. Əgər həqiqətən də, dəqiq xəritələr əldə etsək, Qarabağ və şərqi Zəngəzurun minalardan tamamilə təmizlənməsi prosesi daha sürətlə həyata keçirilər. Bu qədər çətin iş aparılmasına baxmayaraq, əksər şəhər və rayon mərkəzlərində ağıllı şəhər, kənd konsepsiyasına uyğun olaraq yeni binaların, qəsəbə və şəhərlərin salınması işi həyata keçirilir. Digər rayonlarımızdan fərqli olaraq çətin relyefdə yerləşən Laçın rayonuna keçmiş məcburi köçkünlərin qayıtma prosesi də həyata keçirilməkdədir. Biz demək olar ki, hər həftə buraya yeni ailələrin köçürülməsi prosesinin şahidi oluruq. 2024-cü ildə Xankəndinə, Xocalıya, Kəlbəcərə, Şuşa şəhərinə bizim keçmiş məcburi köçkünlərimiz qayıda biləcəklər".
Deputat bildirib ki, ümumilikdə, mərhələli şəkildə bütün rayon və şəhər mərkəzlərinə ağıllı kəndlərə qayıdış prosesini görəcəyik: "Onların yalnız ev, mənzil şəraitini qurub yaratmırıq, eyni zamanda məşğulluq məsələləri də düşünülür. Həmin rayonların ərazisində mövcud potensial nəzərə alınaraq iş yerləri yaradılır. Bu da çox vacibdir. Dövlət tərəfindən verilən dəstək azaldılmalıdır, çünki vətəndaş özü ayaqları üstündə dayanmalıdır. Bu ərazilərdə yerli icmaların yaradılması, idarə edilməsi, bütün yaş qrupunun və gender bərabərliyinin qorunma prinsipinə əməl edərək işlərin təşkil edilməsi də vacibdir. Növbəti 5-10 il ərzində də bu məsələlərə önəm veriləcəkdir. Biz düşünürük ki, 2030-cu ilə qədər burada yaşayan vətəndaşlarımız özləri ayaqları üzərində dayanacaqlar. Dövlətin onlara verdiyi imtiyazlar, müavinətlərə onların artıq ehtiyacı qalmayacaqdır. Yaradılmış yeni iş yerlərində çalışaraq yaxşı həyat təşkil edə biləcəklər. Azərbaycan dövləti hər zaman onların yanında olacaqdır. Biz inanırıq ki, bu qədər çətin işi bacaran Azərbaycan dövləti bu yükün də öhdəsindən gələcəkdir. Bütün işğaldan azad edilmiş ərazilərdə soydaşlarımız daha yaxşı həyatla təmin oluna biləcəklər".
