Yaşıl enerji növlərinin yaradılması və yaşıl enerjinin dünya bazarlarına nəqli hazırda neft-qaz ölkəsi Azərbaycanın enerji siyasətinin yeni prioritet istiqamətidir. Məhz COP29-un Bakıda keçirilməsi qərarı da Azərbaycanın bu siyasətinə qlobal dəstəyin nümunəsidir. Azərbaycan post-sovet məkanında ilk dəfə olaraq hər il fərqli bir ölkənin ev sahibliyi etdiyi 29-cu "Tərəflərin Konfransı (COP)"nı 2024-cü ilin noyabrın 11-dən 24-dək qəbul edəcək. Bu, Azərbaycanın dünyada getdikcə güclənən mövqeyinin, artan nüfuzunun əyani göstəricisidir və belə mötəbər tədbirə ev sahibliyinin məhz Azərbaycan dövlətinə etibar edilməsi Prezident İlham Əliyevin yürütdüyü siyasətə dünya səviyyəsində dərin hörmətin, güclü dəstəyin təcəssümüdür.
Mövzu ilə bağlı fikirlərini bölüşən Milli Məclisin Təbii ehtiyatlar, energetika və ekologiya komitəsinin üzvü Naqif Həmzəyev COP29-un Azərbaycanda keçirilməsini böyük hadisə kimi dəyərləndirib:
“Əksər dünya dövlətlərinin Azərbaycanın ev sahibliyini dəstəkləməsi Azərbaycan dövlətinin, cənab İlham Əliyevin qazandığı uğurların və Azərbaycana olan etimadın bariz nümunəsidir. Azərbaycan enerji, neft-qaz ölkəsi olmasına baxmayaraq, son dövrlər alternativ enerji mənbələrinin işlənməsi, yaşıl enerjinin Avropaya ixracı ilə bağlı əldə etdiyi razılaşmalar, xarici şirkətlər tərəfindən Azərbaycana qoyulmuş sərmayə, külək, günəş və su enerjisinin istifadəsinə başlanması Azərbaycanın yaşıl enerji ölkəsinə çevrilməsinə gətirib çıxardı. Dövlətimiz bununla bağlı xüsusi strategiya hazırlayıb. Ölkənin bütün ərazilərinə dair xüsusi atlas hazırlanıb. Bölgələrə, regionlara görə harada hansı enerjini istehsal etmək olar, bu, artıq yerli və xarici mütəxəssislərə bəllidir. Azərbaycanın yaşıl enerji istehsalçısına çevrilməsi üçün çox böyük potensialı var. Ölkəmizin iqlim dəyişikliyi ilə əlaqədar gördüyü təxirəsalınmaz tədbirlər, uzun illər məhz yaşıllıq, meşə massivlərinin qorunub-saxlanılması ilə əlaqədar həyata keçirdiyi layihələr, xüsusi qoruqların yaradılması, kökü kəsilməkdə olan heyvanların, bitkilərin qorunması, saylarının artırılması ilə əlaqədar xüsusi tədbirlərin həyata keçirilməsi, Heydər Əliyev Fondu, İDEA və digər ekoloji təşkilatlar tərəfindən gerçəkləşdirilən layihələr Azərbaycanın COP29-a ev sahibliyi etməsi ilə nəticələndi”.
Deputat bildirib ki, COP28-də müzakirə edilən mövzular və qəbul edilmiş qərarlar, Azərbaycanın bu işlərdə böyük öhdəlik götürməsi iqlim dəyişikliyi ilə əlaqədar müsbət işlərin görülməsinə gətirib çıxara bilər: “Cənab Prezidentin sərəncamı ilə 2024-cü ilin “Yaşıl dünya naminə həmrəylik i̇li” elan edilməsi əbəs yerə deyil. Yaşıl dünyanın əldə edilməsi, yaşıllıqların qorunub-saxlanılması, iqlim dəyişikliklərinə həssas yanaşmaq üçün hər bir vətəndaş həmrəylik nümayiş etdirməli, dünyanı bu missiya ətrafında birləşdirməyə çalışmalıdır. Çünki iqlim dəyişiklikləri ilə bağlı hansısa dövlətin, yaxud təşkilatların gördükləri işlər bəs etmir. Hər bir vətəndaş bu məsuliyyəti dərk etməlidir. Gələcək nəsillər üçün dünyamızı, yaşıllıqlarımızı, su ehtiyatlarını qorumalıyıq. Suyu bacardığımız qədər qənaətlə istifadə etməli, havanı az zəhərləməliyik. Havaya buraxılan qazlar mütləq xüsusi filtirlərdən keçirilməlidir. Bununla bağlı vacib öhdəlikləri bütün dövlətlər yerinə yetirməlidirlər. 2030-cu ildə dayanıqlı inkişafa dair öhdəliklərlə əlaqədar yaşıl enerjiyə keçidi sürətləndirməliyik. Ən azı 30%-dən çox yaşıl enerjidən istifadə edilməlidir. Bununla da bağlı öhdəliklər var. İnanıram ki, məhz 2024-cü ildə bütün vətəndaşlarımız həmrəylik nümayiş etdirəcək və yaşıl dünyanın əldə edilməsi üçün çox mühüm layihələr həyata keçirəcəyik. Azərbaycan COP29-a nümunəvi ev sahibliyi edəcək. Bu günə qədər Azərbaycanın beynəlxalq tədbirlərə, təşkilatlara rəhbərlik etdiyi dövrlərdə əldə edilmiş uğurlar, təcrübə COP29-un da keçirilməsinə əla zəmin yaradacaq. COP29-un qarşısında duran bütün məsələlərə nail olacağıq. Bütün vətəndaş cəmiyyətinin üzvlərini, təşkilatları həmrəyliyə çağırıram”.
“Biosfer” İctimai Birliyinin sədri, ekoloq Qorxmaz İbrahimli isə bildirib ki, COP29 kimi beynəlxalq tədbirin Bakıda keçirilməsi hər mənada fərəhləndirici hadisədir:
“Ətraf mühitlə bağlı bir platformada ölkəmizin təqdimatı, gələn turistlər, ekoloqlar, beynəlxalq təşkilatların nümayəndələri baxımından çox böyük əhəmiyyət daşıyır. Bildiyimiz kimi, 2023-cü ilin sonunda COP28 çərçivəsində Azərbaycan geniş tərkibdə nümayəndə heyəti ilə Birləşmiş Ərəb Əmirliklərində təmsil olunmuşdu və nümayəndə heyətimiz orada geniş povilyon açmışdı. Azərbaycan öz üzərinə götürdüyü öhdəlikləri həmin povilyonda bir daha sərgilədi. Çox sevindirici haldır ki, COP29-un Azərbaycanda keçirilməsi haqqında qərar verildi. Azərbaycana olan diqqət onsuz da getdikcə artır. İnsanlar məcburən artıq anlayırlar ki, ətraf mühit qorunmalıdır və çevrəyə qarşı nə qədər diqqətli olsaq, bir o qədər faydalı olacaq. Bu cür beynəlxalq tədbirin ölkəmizdə keçirilməsi ekologiyaya qarşı diqqəti, məsuliyyəti daha da artıracaq, orta ümumtəhsil məktəblərinin, universitetlərin və digər təhsil sahələrinin, ümumilikdə, cəmiyyətin çevrəyə münasibətinə ciddi təsir göstərəcək. Azərbaycan yaşıl enerjinin, günəş, külək enerjisinin, su elektrik stansiyalarının, dağ çaylarının istifadəsi üzrə də dünya ölkələri sırasında önə çıxmağa başlayıb. COP29 sayəsində həm də ölkə daxilində ekologiya ilə bağlı sivil toplum, qeyri-hökumət təşkilatlarının mövqeyi möhkəmlənəcək, onlara diqqət artacaq. Xüsusən, könüllülüyün genişlənməsi, təbliği, könüllü gənclərimizin bu işə cəlbi də sürətlənəcək”.