"Ermənistan hökuməti siyasi iradə ortaya qoyarsa, 2024-cü ilin ilk 6 ayında sülh müqaviləsi imzalana bilər".
Bunu millət vəkili Naqif Həmzəyev deyib.
Deputat vurğulayıb ki, hazırda Ermənistan-Azərbaycan münasibətlərində normallaşma və sülh anlaşmasının imzalanması ilə bağlı ümidlər və ehtimallar artmaqdadır. Onun sözlərinə görə, xüsusən Azərbaycan-Ermənistan arasında birbaşa sülh mətni üzərində işin aparılması çox böyük irəliləyişdir: “Hərbi əsirlərin dəyişdirilməsi, birgə bəyanatın verilməsi, xoşniyyətli açıqlamalar ümumilikdə prosesi sürətləndirib. Ancaq mübahisə doğuran məsələ sərhədlərin delimitasiya və demarkasiyadır. Ona görə də müzakirə olunur ki, sərhədlərin dəqiqləşdirilməsi məsələsi sonrakı dövrə saxlanılsın. Çünki çox ağır və uzunmüddətli prosesdir”.
Müsahibimizə görə, belə məqamda qoşunların şərti sərhədlərdən qarşılıqlı geri çəkilməsi müəyyən çətinliklər yarada bilər. O baxımdan bu məsələdə tələsmək yolverilməzdir: “Yenə qeyd edirəm, sərhədlər müəyyənləşməyib. Ermənistan tərəfi ilk növbədə Azərbaycanın 8 kəndinin geri qaytarılmasını həyata keçirməlidir. Daha sonra sərhədlərin delimitasiya və demarkasiya prosesi getməlidir. Yaxşı münasibətdə olduğumuz dövlətlərlə belə sərhəd anlaşılmazlıqları, tam razılaşdırılmayan məsələlər var".
Parlament üzvü qeyd edib ki, Ermənistan tərəfi iradə nümayiş etdirməli və rəsmi Bakını əmin etməlidir ki, sülh sazişi sadəcə kağız üzərində qalmayacaq: "İrəvan gələcəkdə revanşist qüvvələrin yenidən baş qaldırmasına imkan verməməlidir. Ermənistan hökuməti Azərbaycanla normallaşma prosesini hərtərəfli dəstəkləyərsə, sülh müqaviləsi imzalanar və qalıcı olar. Birgəyaşayışın mümkün olması üçün də Ermənistan tərəfi xüsusi proqram hazırlamalıdır. Kommunikasiyaların işə düşməsi üçün öz öhdəliklərini yerinə yetirməlidir".