31 dekabr - Dünya Azərbaycanlılarının Həmrəyliyi Günüdür. 1991-ci il dekabrın 16-da Naxçıvan Muxtar Respublikası Ali Məclisinin Heydər Əliyevin sədrliyi ilə keçən iclasında 31 dekabrın dünya azərbaycanlılarının həmrəylik bayramı kimi qeyd olunması barədə qərar qəbul edilib. Ali Məclis bununla bağlı qanunvericilik aktının qəbul olunması üçün ölkə parlamentinə - Ali Sovetə müraciət edib. Dekabrın 25-də Azərbaycan Respublikası Ali Sovetinin Milli Şurası müraciəti nəzərə alaraq, dekabrın 31-nin Dünya Azərbaycanlılarının Həmrəyliyi Günü elan olunması barədə qanun qəbul edib. 2001-ci il noyabrın 9-10-da Bakıda Dünya Azərbaycanlılarının I Qurultayı keçirilib. Qurultay soydaşlarımızın milli mənlik şüurunun güclənməsinə, müxtəlif ölkələrdə azərbaycanlı icmalarının mütəşəkkilliyinin və fəallığının artmasına təsir göstərib. Bu, ölkənin ictimai-siyasi həyatında yeni bir hərəkat, dövlət siyasətinin yeni bir istiqaməti idi. Həmin qurultayda Ulu Öndərin böyük iftixarla söylədiyi “Mən həmişə fəxr etmişəm, bu gün də fəxr edirəm ki, mən azərbaycanlıyam!” kəlamı isə dillər əzbərinə çevrilib. Qurultaydan sonra ümummilli lider Heydər Əliyevin 2002-ci il 5 iyul tarixli Fərmanı ilə xaricdəki soydaşlarımızla əlaqələrin genişləndirilməsi və inkişaf etdirilməsi məqsədilə Xarici Ölkələrdə Yaşayan Azərbaycanlılarla İş üzrə Dövlət Komitəsinin (hazırda Diasporla İş üzrə Dövlət Komitəsi) yaradılması, həmin il dekabrın 27-də isə soydaşlarımızla bağlı dövlət siyasəti haqqında Qanunun qəbul edilməsi dünya azərbaycanlılarının milli birliyi və təşkilatlanması prosesini daha da gücləndirib. Yorulmaz fəaliyyəti ilə Heydər Əliyev siyasi fəlsəfəsinə, onun liderlik məktəbinə söykənən Prezident İlham Əliyev Ulu Öndərin bu sahədəki xidmətlərini uğurla davam etdirir. Dövlətimizin başçısının “Dünya azərbaycanlılarının II Qurultayının keçirilməsi haqqında” 2006-cı il 8 fevral tarixli Sərəncamına uyğun olaraq, həmin il martın 16-da Bakıda keçirilən növbəti mötəbər toplantı xaricdə yaşayan azərbaycanlıların diaspordan lobbiyə çevrilməsi istiqamətində yeni addım olub, ölkəmizlə bağlı həqiqətlərin dünya ictimaiyyətinə çatdırılması işində əhəmiyyətli rol oynayıb. Diasporumuzun təşkilatlanması prosesi bu gün daha sürətlə gedir. Dünya Azərbaycanlılarının I Qurultayında yaradılmış Əlaqələndirmə Şurasının 2008-ci il dekabrın 18-də Bakıda keçirilmiş iclası, toplantıda “Dünya Azərbaycanlılarının Xartiyası”nın qəbulu birlik və mütəşəkkilliyinin artması, tarixi Vətənlə əlaqələrinin möhkəmlənməsi, diaspor potensialının möhkəm amilə çevrilməsini göstərməklə yanaşı, müstəqil Azərbaycanın bütün dünya azərbaycanlıları üçün cazibə mərkəzi olduğunu da bir daha təsdiqləyib. Həmrəylik günü milli birlik, Azərbaycana məhəbbət, milli-mənəvi dəyərlərimizə hörmət, Vətənə bağlılıq hisslərini özündə təcəssüm etdirir. Dövlətimizin diaspor siyasəti, həmvətənlərimizin birlik və həmrəyliyinin möhkəmləndirilməsi, onların daha mütəşəkkil formada təşkilatlanması prosesi özünün yeni mərhələsinə qədəm qoyub. Artıq dünya azərbaycanlıları yaşadıqları ölkələrin sosial-iqtisadi, ictimai-siyasi və mədəni həyatında daha fəal rol oynayır, respublikamızla qarşılıqlı əlaqələrin genişlənməsinə böyük töhfə verir, Azərbaycan həqiqətlərinin dünya ictimaiyyətinə çatdırılmasında, zəngin mədəni irsimizin təbliğində, təcavüzkar erməni dairələrinin ideoloji təxribatlarının qarşısının alınmasında qətiyyət nümayiş etdirirlər. Onlar Azərbaycan dövlətinin dəstəyi sayəsində qardaş və dost xalqların lobbi və diasporları ilə səmərəli əməkdaşlığın qurulması sahəsində təsirli tədbirlər həyata keçirir, Azərbaycanın, xalqımızın tarixini yazır və nəsillərdən-nəsillərə ötürürlər.
Millət vəkili Naqif Həmzəyev deyib ki, Azərbaycan müstəqillik qazandıqdan sonra çox çətin bir dövrlə üzbəüz qaldı:
"Müstəqillikdən öncə Qərbi azərbaycanlılar indiki Ermənistan ərazisindən deportasiya olundular, 350 minə yaxın qaçqın Azərbaycana təşrif buyurdu. Bundan sonra Azərbaycan 20 Yanvar hadisələri ilə üzləşdi. Birinci Qarabağ savaşı zamanı torpaqlarımızın 20 faizini itirdik. Həmin ərəfədə Ulu Öndər Heydər Əliyevin yenidən Azərbaycan rəhbərliyinə gətirilməsinin qarşısını aldılar. Azərbaycanın bu ağır vəziyyətdən xilas olması üçün Heydər Əliyevin bilik və bacarığından istifadə etməsinə imkan vermədilər. Buna rəğmən, Naxçıvanda ulu öndər Heydər Əliyev üçrəngli Azərbaycan bayrağını qaldırdı və 31 dekabr Dünya Azərbaycanlılarının Həmrəylik Günü qeyd edilməyə başlanıldı. Sonradan bütöv Azərbaycanda Həmrəylik Günü olaraq qeyd olundu. O vaxt sözün əsl mənasında həmrəyliyə böyük ehtiyacımız var idi. Ulu öndər ikinci dəfə hakimiyyətə qayıtdıqdan sonra da dünya azərbaycanlılarının birliyinə nail oldu. Diaspora fəaliyyəti ilə əlaqədar dövlət qurumu, komitə yaradıldı və dünyanın hər bir yerində olan azərbaycanlılarla səfərləri zamanı görüşlər keçirdi. Ümummilli lider azərbaycanlıların birləşməsini, təşkilatlanmasını Azərbaycanın haqq səsinin dünyaya çatdırılmasını həyata keçirməyə başladı. 2020-ci ildə 44 günlük Vətən müharibəsində torpaqlarımızı işğaldan azad etdik. 2023-cü ildə suverenliyimiz tam olaraq bərpa olundu, separatizm üzərində qələbə çaldıq. 2023-cü il ulu öndər "Heydər Əliyev İli" çərçivəsində çox möhtəşəm işlər görüldü. Əsrə bərabər il yaşadıq. Ona görə də bu il Dünya Azərbaycanlılarının Həmrəylik Günü çox fərqli qeyd olunur".
Parlament üzvü vurğulayıb ki, ilk dəfədir ki, Azərbaycan bu qədər güclüdür, azərbaycanlılar bu qədər həmrəydir:
"Buna görə cənab Prezident İlham Əliyevə, ordumuza, xalqımıza, şəhidlərimizə, şəhid ailələrinə, qazilərimizə minnətdarıq. İnanıram ki, 2024-cü il çox fərqli il olacaq. Dünya azərbaycanlıları 2024-cü ildə daha çox həmrəylik nümayiş etdirəcəklər. Bu vəhdəti davam etdirəcəklər. Əsas müharibəni qələbə ilə başa vurmuşuq, ancaq informasiya müharibəsi hələ də davam edir. Azərbaycanın yaratdığı bu reallıqları qəbul etməyən güclər var. Ermənidən çox ermənilik edənlər var. Bu baxımdan həmrəyliyimizi qorumalı, saxlamalı və çalışmalıyıq ki, yeni yetişən gənclər də əldə olunmuş bu zəfərin qədrini bilsinlər. Biz hər cəbhədə dövlətin siyasətini təbliğ etməliyik. Prezidentin qarşımıza qoyduğu vəzifələri yerinə yetirməliyik".