"COP29 beynəlxalq konfransının Azərbaycanda keçirilməsinin əhəmiyyəti çox böyükdür". Bu sözləri açıqlamasında deputat Naqif Həmzəyev deyib.
İlk növbədə, onu qeyd etməliyik ki, bu günə qədər Azərbaycan bir çox beynəlxalq konfransların, tədbirlərin, idman oyunlarının uğurla baş tutmasını həyata keçirib. Azərbaycanın bütün beynəlxalq tədbirlərə ev sahibliyi həmişə müsbət hadisələrlə yadda qalıb. Eyni zamanda, Azərbaycanın birbaşa Qoşulmama Hərəkatına sədrliyi dönəmində uğurlu fəaliyyəti, onu BMT-dən sonra ikinci böyük təşkilat səviyyəsinə qaldıra bilməsi və həmrəyliyi yarada bilməsi, Azərbaycana olan etimadı daha da artırdı.
Deputat sözlərinə davam edərək deyib: "Azərbaycan enerji resurslarını ixrac edən dövlətdir. Həm də Azərbaycan yaşıl, alternativ enerji resurslarının işlənməsi və ixracına da önəm verən, iqlim dəyişikliklərinin həmişə nəzarətdə saxlanılmasına və iqlim dəyişikliklərinə töhvə verilməsi üçün bir çox mühüm addımları həyata keçirən dövlətlər sırasındadır. Azərbaycan mərddayanıqlı inkişaf prioritetlərinin icrası ilə əlaqədar mütəmadi illik hesabatlarını təqdim edir. İllik hesabatlarda biz Azərbaycanın bu dayanıqlı inkişafla bağlı, əsas da iqlim dəyişiklikləri, su resurslarının qorunması, düzgün istifadə edilməsi və gələcəyə baxış prioritetlərini uğurla icra etməsi, inkişaf etmiş ölkələrlə rəqabətə girə bilməsi imkan verdi ki, Azərbaycanın COP29 beynəlxalq konfransına ev sahibliyi etsin. Biz iqlim dəyişikliklərinə, yaşıl enerjiyə və ətraf mühitin qorunmasına önəm veririk".
Ölkəmizdə keçiriləcək bu tədbir digərlərindən geri qalmayacaq. Əksinə, Azərbaycan daha fərqli formada bu proseslərin həyata keçirilməsinə dünya dövlətləri ilə birlikdə nail olacaq. Tədbirin keçirilməsi ölkəmizin gücünə, nüfuzuna müsbət təsir edəcək. Azərbaycanın yaratdığı yeni reallıqlar fonunda bu beynəlxalq tədbirin ölkəmizdə keçirilməsi, düşünürəm ki, həm regional, qlobal məkanda qlobal çağırışlara cavab verən dövlət siyasətini həyata keçirən dövlət statusunu qoruması üçün fürsət olacaq. Azərbaycanın dostları birlikdə bu prosesdə yaxından iştirak edəcək. Azərbaycanla əməkdaşlığa maraqlı olan, bizi daha yaxından tanımaq imkanı bütün dövlətlərə yaradılacaq. Ümumilikdə bu sahədə çalışan mütəxəssislər Azərbaycan mütəxəssislərlə birlikdə əməkdaşlıq edəcəklər. Dünya liderləri tədbir zamanı ölkəmizə səfər edəcəklər. İnanıram ki, bu proseslər artan nüfuzumuzun, mövqeyimizin güclənməsinə xidmət etmiş olacaq".