"Azərbaycan və Çin arasındakı münasibətlər Ulu Öndər Heydər Əliyevin dövründən inkişaf etməkdədir. Prezident İlham Əliyev də bu münasibətlərin strateji tərəfdaşlıq səviyyəsinə yüksəlməsi üçün real addımlar atır. Çinin "Bir kəmər, bir yol" layihəsinin iştirakçılarından biri də Azərbaycandır. Xüsusilə, Orta Dəhliz layihəsinin genişləndirilməsi üçün Azərbaycan da öz töhfəsini verib. Bütün görülən işlər Çin Xalq Respublikası tərəfindən müsbət dəyərləndirilir". Bu sözləri açıqlamasında millət vəkili Naqif Həmzəyev deyib.
Onun sözlərinə görə, Çin ilə Azərbaycan arasında münasibətlər günü-gündən inkişaf edir və iqtisadi, mədəni, sosial layihələr həyata keçirilir: "Bütün bunlarla yanaşı, Çin Xalq Respublikasının sədri Si Cinpinin Azərbaycan Prezidentinə qarşı münasibəti hər zaman müsbət olub. İki lider arasında olan dostluq münasibətləri dövlətlər arasında əlaqələrin inkişaf etdirilməsinə mühüm təsir etməkdədir. Sədr Si Cinpinin cənab Prezidenti doğum günü münasibətilə təbrik etməsi, dünyada ikinci böyük iqtisadiyyata malik bir dövlətin liderinin Azərbaycana qarşı olan bu münasibəti bizi çox sevindirir. İnanırıq ki, Azərbaycan-Çin münasibətlərinin bu şəkildə inkişaf etməsi nəticə etibarilə Azərbaycanın suverenliyinin qorunması, bütün sahələr üzrə təhlükəsizliyinin təmin edilməsi, ölkə iqtisadiyyatının genişləndirilməsi, dövlətimizə qarşı etimadıb artmasına bir töhfədir".
Deputat sözlərinə davam edərək bildirib ki, Azərbaycan enerji resursları ixrac edən dövlətlə yanaşı, logistik şəbəkəni formalaşdıra bilən şimal-cənub, eyni zamanda şərq-qərb yollarının kəsişməsində yerləşən dövlət kimi də tanınır: "Həmçinin, Azərbaycan Orta Asiya dövlətləri ilə sıx əlaqədədir. Bu dövlətlər məhz Xəzər üzərindən Orta Dəhlizin inkişaf etdirilməsi, Çindən Avropaya gedən yüklərin daşınmasının həyata keçirilməsi Azərbaycanın əldə etdiyi ən böyük uğurlardan biridir. Xüsusilə də Çin və Azərbaycan münasibətlərinin günü-gündən inkişaf etməsi nəticə etibarilə Orta Dəhlizin yaxın gələcəkdə yük daşımaları üçün ən etibarlı yol olacağına inamı artırmaqdadır. Zəngəzur dəhlizinin açılması ilə yük daşımalarının daha da artacağına şahidlik edə biləcəyik. Digər dövlətlərdən fərqli olaraq Azərbaycan öz ərazilərində məhz dəmiryolları, avtomobil yollarının tikilməsi, hava limanlarının inşasını özü həyata keçirib. Bu baxımdan Azərbaycan belə məsələlərdə müstəqil qərarlar verə bilir və daha münasib qiymətlər təklif edə bilir. Düşünürəm ki, yaxın gələcəkdə Orta Dəhlizdən yüklərin daşınmasının vahid tarifə keçirilməsi ilə bu layihə daha da cəlbedici olacaq".