Bu gün Ali Baş Komandan topa atəş əmri vermir, bu gün Ali Baş Komandan futbolda topa vurur.
Bunu Milli Məclisin bu gün keçirilən iclasında parlamentin Regional məsələlər komitəsinin sədri Siyavuş Novruzov deyib.
Deputat deyib ki, bu gün Xankəndidən top səsləri yox, yenidənqurma səsləri gəlir: “Antimilli qüvvələr yenə də öz ağalarının tapşırığı ilə addımlar atmaqla məşğuldur. İnsanların sevincinin həddi-hüdudu olmayan dövrdə onlar başqa dövlətlərə müraciət edir ki, Azərbaycana sanksiya tətbiq etsinlər. Bu cür hərəkəti heç ermənilər etmir, heç erməni parlamentində etmirlər. Dünən Xankəndidə futbol oyununa ermənilər, xaricdə Fransa sevinmirdisə, daxildə də o qüvvələr sevinmirdi. Prezidentin hər atdığı addım dünyaya da, onlara da mesajdır ki, Azərbaycan müstəqil dövlətdir və Azərbaycanın işinə heç kim qarışa bilməz”.
Deputat Fazil Mustafa qeyd edib ki, Xankəndidə Prezident İlham Əliyev topa vurduğu zərbəylə ABŞ və Fransadan “topun içinə doldurulmuş hava”nı dağıtmağa qadir olduğunu göstərdi: “Realist düşünən ermənilər də anlayır ki, Fransa, ABŞ, istərsə də digər ölkələrin Ermənistana dəstəyi sözdən başqa bir şey deyil. Onlar yardım göndərdi, Ermənistana çatdıra bilmədilər, qətnamə qəbul etdilər, yerinə yetirə bilmədilər”.
Deputat Naqif Həmzəyev deyib ki, Azərbaycan xalqının Prezident İlham Əliyevə olan sarsılmaz inamının nəticəsidir ki, ölkəmiz bütün sahələrdə - siyasi, iqtisadi, mədəni, sosial, hətta mənəvi olaraq belə özünün ən yüksəlişdə olduğu dövrünü yaşayır: “Dəmir yumruq” əməliyyatının ardından xüsusilə də erməni lobbisinin maliyyələşdirdiyi tədqiqat institutları hesabatlar hazırlayaraq, Qarabağ zəfərinin Azərbaycan üçün çətin nəticələrini proqnozlaşdırırdılar: “Həm anti-Azərbaycan əhval-ruhiyyəsi formalaşdırılmağa çalışılır, həm də Ermənistan silahlandırılaraq, ölkəmizin xeyrinə olan regional balansı sanki güc vasitəsilə dəyişməyi hədəfləyirdilər. Nəticə isə bizə bunu göstərdi ki, Azərbaycan sadəcə qalib dövlət deyil, Azərbaycan eyni zamanda Cənubi Qafqaz regionunun güc mərkəzi və mövcud bütün reallıqların müəllifidir. Bu mənada, Azərbaycanı baypass edən istənilən layihə və ya niyyət heç bir halda produktiv ola bilməz və dayanıqlılığı daim şübhə altında olacaqdır. Prezident İlham Əliyev Azərbaycan xalqının ən ümdə problemlərini ilmək diplomatiyası ilə sonraya heç bir sual və ya ölkəmizə qarşı istifadə edilə biləcək detal saxlamadan həll etdi. Ən başlıcası isə, Azərbaycanın artıq Qarabağ adlı problemi yoxdur. Ərazi bütövlüyümüzün bərpası ilə ölkəmizə qarşı istifadə edilməyə çalışılan siyasi alətlər də bir-bir sıradan çıxarıldı. Məhz bu amilin nəticəsidir ki, hələ də Ermənistanla birlikdə məğlubiyyətin yasını saxlayan, Ermənistandan daha çox erməni olmağa çalışan dövlətlər və siyasi isteblişmentlər özünü göstərir. Lakin, Azərbaycanın dəmir yumruğu və dəmir iradəsi hər zaman yerindədir və dəfələrlə bildirdiyim kimi, xalq öz lideri - cənab Prezident İlham Əliyevin arxasındadır və lider-xalq-ordu birliyimiz gündən-gündə güclənməkdədir. Təəssüflər olsun ki, ölkə daxilindəki bəzi qüvvələr siyasi ambisiyalar naminə şəxsi maraqlarından yola çıxaraq ölkəmizin haqq işinə də daxili, eləcə də xarici maneələr yaratmağa çalışırlar. Bunun ən bariz nümunəsi məhz 7 fevral 2024-cü ilə təyin edilən və təyini Konstitusional hüquq olan növbədənkənar prezident seçkiləridir. Dövlət reyestrinin ardından həyata keçirilən bu seçkilərlə siyasi partiyaların iştirakı üçün əlverişli şərait yaradılsa da, zəruri seçici bazasından belə məhrum olduğunu dərk edən bəzi qüvvələr məhz seçkini siyasi şouya çevirməklə faydalanmağa çalışırlar. Nəzərə almaq lazımdır ki, xalqımızın gözü tərəzidir və Azərbaycan xalqı özünün siyasi iradəsini müzəffər bir xalq olaraq ortaya qoyacaqdır. 2023-cü il tariximizə ömürlük həkk olundu: Azərbaycan Respublikası bir tarixin izi ilə növbəti şanlı səhifələri öz tarixinə həkk etdi. Əldə etdiyimiz uğurlar sadəcə dünənimizi, bugünümüzü deyil, sabahımızı da xilas etdi: gələcək nəsillər Qarabağ dərdindən, torpaqlarımızdakı terrorizm və separatizmlə mübarizədən xilas edildi”.
Deputat Fatma Yıldırım qeyd edib ki, dünən biz növbəti bir tarix gün yaşadıq, hər bir azərbaycanlının qəlbini iftixar hissi ilə dolduran, bizlərə sonsuz qürur yaşadan tarixi anlara şahidlik etdik: “Uzun illərdən sonra, ilk dəfədir ki, işğaldan azad edilmiş ərazilərimizdə, Xankəndi şəhər stadionunda milli futbol oyunu keçirildi, bu stadionda “Qarabağ” öz rəqibini qəbul etdi. Bu hadisənin digər amillərlə yanaşı böyük mənəvi əhəmiyyəti var. Futbol oyunun izləyənlər sırasında Prezidentimiz İlham Əliyevin və birinci xanım Mehriban Əliyevanın olması bu hadisənin böyük tarixi-mənəvi əhəmiyyətini bir daha təsdiqləyir. Eyni zamanda, Xankəndi stadionunda keçirilmiş oyunda qəhrəman şəhidlərimizin uşaqları və ailə üzvlərinin də iştirak etməsini xüsusi vurğulamalıyıq. Bu, Vətənimizin bütövlüyü uğrunda canlarını qurban vermiş şəhidlərimizin ruhuna ehtiramın nümunəsidir. Artıq bütün Qarabağda suverenliyimiz tam təmin olunub və bu yerlərdə üçrəngli bayrağımız əzəmətlə dalğalanır. 30 ildən sonra bu tarixi oyunda topa ilk zərbəni də Qalib Liderin vurması dünyaya daha bir mesajdır – məkrli oyun bitib – Qarabağda sülh, əmin-amanlıq simvolu olan idman oyunları başlayır”.