Avropa Birliyi Şurasının sədri Şarl Mişel deyib ki, münasibətləri normallaşdırmaq üçün Azərbaycan və Ermənistan arasında sülh sazişinin imzalanmasına ehtiyac var. Onun sözlərinə görə, bu sülh sazişi sərhədlərin delimitasiyasına əsaslanmalıdır: "Sülh sazişi həm də yaxşı bir çərçivə ola bilər ki, regionda nəqliyyat əlaqələri yaxşılaşsın". Onun sözlərinə görə, Avropa Birliyi Qarabağ erməniləri ilə bağlı məsələni hərtərəfli diqqətdə saxlayır: “Biz bu məsələdə səylər göstəririk. Azərbaycan tərəfini inandırmağa çalışırıq ki, milli azlıqların haqlarının qorunması və beynəlxalq standartlara əməl olunması məsələsində xoş niyyətlərini açıq nümayiş etdirsinlər. Səmimi şəkildə inanıram ki, apardığımız bu müzakirələrin nəticəsi olaraq Avropa Birliyi üçün prioritet olan bir məsələdə irəliləyişə nail ola bilərik”.
Millət vəkili Naqif Həmzəyev deyib ki, Azərbaycan 44 günlük Vətən müharibəsində qələbə qazandıqdan sonra sülh çağırışlarını edən və Ermənistana sülh əlini uzadan birinci tərəf oldu.
Deputatın sözlərinə görə, Azərbaycan 3 il ərzində sülhün əldə olunması üçün bütün mümkün vasitələri səfərbər etdi:
"Təəssüflər olsun ki, Ermənistan siyasi və hərbi rəhbərliyi havadarlarının da dəstəyi ilə bu prosesdən yayınmağa çalışdı. Hər dəfə sülh danışıqlarında müəyyən razılıqlar əldə edildikdən sonra təxribatlar törətdilər. Mina xəritələri Azərbaycan tərəfinə dəqiq formada təqdim edilmədi. Bunun nəticəsində hələ də Azərbaycan ərazilərində minaların təmizlənməsi prosesi davam etdirilir və bu müddət ərzində 350 çox vətəndaşımız mina qurbanına çevrilib. Bütün bunlara baxmayaraq, Azərbaycan hər dəfə qeyd edirdi ki, biz sülhə sadiqlik. Sülhün əldə olunması üçün moderatorların və məkanların hara olmasından asılı olmayaraq, sülhün baş tutması üçün bütün görüşlərdə iştirak etməyə hazırıq. Bir şərtlə ki, vasitəçilər və yaxud görüş iştirakçıları tərəf tutmasınlar və birbaşa sülhə xidmət etsinlər. İndiki məqamda Azərbaycan və Ermənistan tərəfinin heç bir təmas olmadan hərbi əsirlərin dəyişdirilməsini həyata keçirməsi, birgə bəyanatla çıxış etmələri müsbət haldır. Vasitəçilər olsa da, olmasa da, sülh prosesini həyata keçirəcək və müqaviləni imzalayacaq tərəflər Azərbaycan və Ermənistandır. Bu baxımdan kənar tərəflər olmadan da sülhü əldə edə bilərik".
Parlament üzvü vurğulayıb ki, sülh sazişi imzalanacağı təqdirdə bir müddət sonra Ermənistandakı revanşist qüvvələr müəyyən təxribatlara əl ata bilərlər:
"Ermənistanın özü, erməni cəmiyyəti sülh prosesinin qarantı olmalıdır və özləri bu məsuliyyəti dərk etməlidirlər. İnanırıq ki, Ermənistan sonuna qədər səmimi mövqeyini ortaya qoyacaq və prosesə töhfə verəcəklər. Bizim buna inamımız var. Cənab Prezident bu məsələdə qətidir. Ermənistan tərəfi də səmimi və qətiyyətli olarsa, qısa zamanda yekun sülh mümkündür".