Naqif Həmzəyev: “Sumqayıt Tibb Mərkəzinin fəaliyyəti buna ən bariz nümunədir”
Bu gün Tibbi Ərazi Bölmələrini İdarəetmə Birliyinin – TƏBİB-in yaradılmasının 5-ci ildönümüdür. Yarandığı ilk gündən etibarən vətəndaş məmnunluğunun təmin edilməsinə xüsusi diqqət yetirən TƏBİB, şəhid ailələri və qazilərə xüsusi həssaslıqla yanaşıb, onlara fədakarcasına xidmət göstərib.
Sumqayıt Tibb Mərkəzinin fəaliyyəti TƏBİB-in şəhid ailələri və qazilərə olan münasibətinə ən bariz nümunədir. Təkcə bir faktı qeyd edək ki, 2022-ci ilin fevral ayından 2023-cü ilin noyabr ayına kimi Sumqayıt Tibb Mərkəzi tərəfindən 5390 nəfər şəhid, qazi və onların ailə üzvlərini və müharibə iştirakçılarına tibbi xidmət göstərilib. Onlardan 1193 nəfəri şəhid ailələrinin üzvləridir. Bu fakt TƏBİB və onun tabeçiliyindəki müəssisələrin şəhid ailələri və qazilərə olan həssas münasibətini əks etdirir.
Mövzu ilə bağlı açıqlama verən millət vəkili Naqif Həmzəyev TƏBİB-in fəaliyyətinin cəmiyyətdə məmnunluqla qarşılandığını bildirib:
“Heç kimə sirr deyil ki, TƏBİB hər zaman şəhid ailəlri və qazilərə xüsusi diqqət və həssaslıqla yanaşıb. Sumqayıt Tibb Mərkəzinin fəaliyyəti buna ən bariz nümunədir. 2022-ci ilin fevralından cari ilin noyabrına qədər Sumqayıt Tibb Mərkəzi tərəfindən 5390 nəfər şəhid, qazi və onların ailə üzvlərini və müharibə iştirakçılarına tibi xidmətin göstərilməsi bunu sübut edir.
Bildiyiniz kimi, Prezident İlham Əliyev və Birinci vitse-prezident Mehriban xanım Əliyeva şəhid ailələrinə, müharibə veteranlarına həssas kateqoriyadan olan vətəndaşlar kimi xüsusi diqqət və ehtiramla yanaşır. Həm dövlət başçısı, həm də hörmətli Mehriban xanım dəfələrlə bütün qurum və vətəndaşların şəhid ailələrinə, veteranlara hörmət və ehtiramla yanaşmasının vacibliyini vurğulayıb, məlum kateqoriyadan olan şəxslərə diqqət və qayğını hər şeydən öncə mənəvi borc kimi xarakterizə edib.
Bu baxımdan TƏBİB-in fəaliyyəti kifayət qədər müsbət və təqdilayiqdir və bu fəaliyyət dövlətimizin şəhid ailəlrinə, veteranlara olan qayğıkeş münasibətini əks etdirir.
Əminəm ki, bundan sonra da TƏBİB, habelə, onun tabeçiliyindəki müəssisələrin bütün vətəndaşlara, eyni zamanda şəhid ailələri və qazilərə qayğıkeş münasibətinə şahid olacaq, səhiyyə işçilərimizin bu münasibətindən hər zaman məmnunluq duyacağıq”.