“Azərbaycan Qarabağı işğaldan azad edərək, öz torpaqlarımızda suverenliyini tam təmin edib. Bu, həm də separatizmi və terroru dəstəkləyən qüvvələr üzərində bizim qələbəmizdir. İndi sülh sazişinin imzalanması ərəfəsindəyik. İnanırıq ki, bu qələbə və sülh sazişi Qərbi azərbaycanlıların da öz doğma yurd-yuvalarına qayıdışını təmin edəcək”.
Bu sözləri Milli Məclisin deputatı Naqif Həmzəyev Tbilisidə keçirilən “Qərbi Azərbaycana Qayıdış beynəlxalq müstəvidə - Gürcüstan Forumu”ndakı çıxışı zamanı söyləyib.
Deputat bu yolda Gürcüstan hökumətinin və dost gürcü xalqının rolunu xüsusi qeyd edib. O bildirib ki, Azərbaycan Prezidenti İlham Əliyevin Gürcüstana səfəri zamanı söylədiyi kimi, Cənubi Qafqazda sülhün bərqərar olmasının vaxtı çatıb. İnanırıq ki, ermənilər də bunu anlayacaq və tez bir zamanda səhvlərini başa düşüb birgə yaşayış prinsiplərini qəbul edəcəklər.
“Biz bu yolla birgə davamlı sülh şəraitində yaşayıb inkişaf edəcəyik”, – deyə N.Həmzəyev vurğulayıb.