“Azərbaycan Respublikasının müstəqillik tarixində bir sıra əlamətdar günlər var. Bu günlər tarixdə qızıl hərflərlə yazılıb və daim xatırlanacaqdır. Məhz bu kimi əlamətdar günlər sırasına 7 fevral 2024-cü il tarixi də namizəddir. Çünki, ilk dəfə olaraq bütün ölkə ərazisində keçiriləcək bu seçkilərdə, Azərbaycan xalqı artıq işğal və separatizm problemi olmadan, eləcə də müstəqillik tarixinin ən güclü dövrünü yaşayaraq siyasi iradəsini ortaya qoyacaq”.
Bu barədə Milli Məclisin İnsan hüquqları komitəsinin üzvü Naqif Həmzəyev bildirib.
Millət vəkili qeyd edib ki, Azərbaycan regionun güc mərkəzi rolunu oynamaqla bərabər, qütbləşməkdə olan dünya siyasətində balanslı siyasətin tərəfdarıdır: “Yeni Azərbaycan Partiyası növbədənkənar prezident seçkiləri üçün cənab Prezident İlham Əliyevin namizədliyini irəli sürdü. Qeyd etmək lazımdır ki, növbədənkənar seçkilərin təyin edilməsi Azərbaycan Respublikası Konstitusiyasının 101-ci maddəsinin birinci bəndinə əsasən Prezident üçün konstitusional hüquqdur və dünya praktikasında qəbul edilmiş siyasi təcrübədir. Azərbaycan regionun güc mərkəzi rolunu oynamaqla bərabər, qütbləşməkdə olan dünya siyasətində balanslı siyasətin tərəfdarıdır. “Dəmir Yumruq” əməliyyatının ardından ölkəmizə qarşı aqressivləşən siyasi mərkəzlər ölkəmizin beynəlxalq nüfuzuna qarşı hücum strategiyasını həyata keçirərək, fərqli qarayaxma kompaniyaları həyata keçirməyə çalışsalar da niyyətləri baş tutmadı. Hətta tam əksinə olaraq, xalqın birliyi və iradəsindən güc alan Azərbaycan dövləti beynəlxalq sferada da dəyişilməz iradə nümayiş etdirərək, ölkəmizi hədəf almağa çalışan bütün paytaxtlara layiqli cavab verdi və sinə gərdi. Bir daha bütün dünya region üçün yeni reallıqlardan başqa alternativin olmadığını və bu reallıqların müəllifi olanın Azərbaycanla güc ritorikası ilə danışmağa çalışmanın hansı nəticələrə gətirib çıxaracağını gördü”.
Deputat deyib ki, Azərbaycan 2023-cü ildə bir-birindən fərqli hadisələrə şahidlik edib: “Hələ aylar öncə separatçıların nəinki torpaqlarımızdan çıxmağa niyyəti var idi, hətta Laçında sərhəd-buraxılış məntəqəmizin açılmasına belə etiraz edirdilər. Sərhəd-buraxılış məntəqəsinin fəaliyyəti beynəlxalq reaksiyaya da səbəb olmuşdu. Lakin, Azərbaycan 44 günlük müharibədə olduğu kimi, post-müharibə dövründəki diplomatiya mübarizəsində də ardıcıl uğurlara imza atdı, beynəlxalq rakursda anti-Azərbaycan kampaniyasını və onun məkrli siyasətini neytrallaşdırdı. Bütün bunlar o dövrdə baş verirdi ki, Qarabağ və digər işğaldan azad edilmiş torpaqlarımızın yenidən bərpası, bu torpaqlara mülki həyatın qayıdışı problemi ilə qarşı-qarşıya idik. Hələ də Böyük Qayıdış istiqamətində işlər tam sürətlə davam etməkdədir. Cənab Prezident İlham Əliyevin rəhbərliyi ilə Azərbaycan həm daxildə, həm də xaricdə mötəbər uğurlara imza atıb. Xüsusilə də 2023-cü il ərzində qısa müddətə böyük nailiyyətlər sığdırmağı bacarıb. 2023-cü il bitməmiş əsirlikdə olan 2 vətəndaşımızın vətənə geri qaytarılması isə öz növbəsində cənab Prezident üçün Azərbaycan vətəndaşı amilinin dəyərini göstərir. Yəni, cənab Prezidentin xüsusilə də siyasi gündəmi həm daxili, həm də xarici mövzuları özündə əhatə etməklə, vətəndaş amili daha ön plandadır”.
N.Həmzəyev artıq Qarabağ münaqişəsinin tarixə qovuşduğunu, Azərbaycanın öz ərazi bütövlüyünü bərpa edərək güc mərkəzi rolunu bütün dünyaya sübuta yetirdiyini vurğulayıb: “Növbəti il üçün də böyük diqqətlə gözlənilən bir sıra mühüm hadisələr var ki, onlardan başlıcası Ermənistanla sülh müqaviləsinin imzalanması, delimitasiya və demarkasiyanın həyata keçirilməsidir. Əlavə olaraq, nəqliyyat-kommunikasiya əlaqələrinin bərpası, Qərbi Azərbaycan İcması ətrafında cəmləşən soydaşlarımızın hüquqlarının təmin edilməsi, birgəyaşayış üçün addımların atılması regionda sülhün təməlini daha da sağlamlaşdıracaqdır. Təbi ki, bu kimi tarixi hadisələrin öncəsində növbədənkənar seçkilərin təyin edilməsi cənab Prezidentin xalqın siyasi dəstəyinə olan sarsılmaz inamının göstəricisidir. Azərbaycan bütün dünyaya lider-xalq-ordu birliyinin vahidliyini və sarsılmazlığını nümayiş etdirir. Bu birlik Azərbaycan Respublikasının gücünün və dəmir iradəsinin əsas mənbəyidir”.