Xəbər verdiyimiz kimi, bir qrup ermənipərəst Konqres üzvü (50 konqresmen və 10 senator) Nümayəndələr Palatasının spikeri Mayk Conson, bu Palatada demokratik azlığın rəhbəri Hakim Cefris, Senatda demokratik çoxluğun lideri Çarls Şumer və respublikaçı azlığın rəhbəri Mitç Makkonela məktub ünvanlayaraq “həssas” (vulnerable) “demokratiya” kimi təqdim edilən Ermənistana ABŞ-nin yardım göstərməsi ilə bağlı məktub ünvanlamışdır.
Məktubun müəllifləri ABŞ-Ermənistan təhlükəsizlik tərəfdaşlığının gücləndirilməsi və Azərbaycanın “təcavüzü” nəticəsində yaranmış humanitar çağırışların qarşılanması üçün Konqresdən xahiş edilmiş əlavə büdcəyə daxil edilməsi “güclü” şəkildə dəstəklədiyini qeyd edir.
Bu barədə millət vəkili Naqif Həmzəyev bildirib ki, Fransa və ABŞ-da hazırda erməni lobbisinin təsiri altında azərbaycanofobiya və türkofobiya demək olar ki, ən güclü dövrünü yaşamaqdadır:
"Vəziyyət artıq o yerə gəlib çıxıb ki, ermənipərəst qüvvələrin bu ölkələrin xarici siyasətinə təsiri onların ziddinə gedir. Məsələn, ABŞ-da olan ermənipərəst konqres üzvləri, Nümayəndələr Palatasının spikeri Mayk Conson da daxil olmaqla, məsul şəxslərə məktublar ünvanlayaraq, Ermənistanı regionun həssas (vulnerable) demokratiyası olaraq təqdim edərək, onun xüsusilə də Rusiyaya qarşı mütləq şəkildə dəstəklənməsinin vacibliyini vurğulayırlar. Məktubda onlar həmçinin Azərbaycana qarşı əsassız fikir səsləndirməklə, hazırda Azərbaycanın Ermənistana qarşı guya “təcavüzünü davam etdirəcəyi” ilə bağlı narahatlıq da ifadə edirlər.
Təbikii, bu fikirlər əsassız olduğu qədər, erməni lobbisi və bu lobbinin dəstəklədiyi qüvvələrin ABŞ-ın xarici siyasi prioritetlərinin ziddinə addım atacaq qədər azğınlaşdığını göstərir. Nəzərə almaq lazımdır ki, hələ bir müddət əvvəl Ceyms O`Braynın əsassız açıqlamaları ABŞ-Azərbaycan münasibətlərindəki gərginliyin artmasına gətirib çıxarmışdı. Çox keçmədən isə gərginliyin yumuşaldılması istiqamətində də elə ilk addım məhz ABŞ tərəfindən oldu. Maraqlıdır ki, daha sonra “Azərbaycana yüksək səviyyəli səfərləri ləğv etmişik” deyən O`Brayenin səfəri üçün ölkənin Dövlət Katibi A.Blinken birbaşa cənab Prezident İlham Əliyevlə əlaqə yaradaraq bir növ peşmanlıq arzusunu dilə gətirib və onun səfərinin təşkili üçün cənab Prezidentə şəxsən müraciət edib. Bu bir daha onu təsdiq edir ki, Azərbaycan ABŞ üçün gözdən çıxarıla bilinməyəcək qədər önəmli partnyordur və ABŞ-ın xüsusilə də regional siyasətinin açar dövlətidir".
Deputat xatırlatdı ki, ABŞ-Azərbaycan münasibətlərində erməni lobbisi və ermənipərəst qüvvələrin məkrli oyunları dəfələrlə özünü göstərib:
"Bunun ən bariz nümunəsi Azərbaycana qarşı olan 907-ci düzəliş idi. Həmin dövrdə Azərbaycanın Xocalı kimi görülməmiş bir soyqırıma və torpaqlarının işğala məruz qalmasına baxmayaraq, ABŞ kimi təkqütblü hegemoniyaya iddialı bir dövlət tarixinin ən səhv siyasi qərarlarından birini vermişdi. 2001-ci ilin 11 sentyabr hadisələrinin ardından Azərbaycanın beynəlxalq sülh və təhlükəsizliyə vermiş olduğu töhfə, enerji təhlükəsizliyindəki rolu Corc Buş administrasiyasının diqqətindən yayınmadı və nəticədə 907-ci düzəliş donduruldu. İndi bu düzəlişin yenidən qüvvədə saxlanılması cəhdi hələ on illər əvvəl ABŞ-ın etdiyi səhvi yenidən təkrarlamaqda olduğunu, ermənipərəst siyasətçilərin erməni lobbisinin əlində siyasi maşaya çevrildiyini göstərir.
Görünür ABŞ Azərbaycanın müəllifi olduğu yeni reallıqlardan narahatdır və bu səbəbdən də regionda Ermənistanın hərbi çəkisini balanslaşdırmağa çalışır. Bununla da Ermənistanın üzərindən regionda siyasi ekzistensializm nümayiş etdirmək fikrindədir. Bu səbəbdən də 44 günlük müharibənin ardından ABŞ-ın köməyilə Ermənistanın Xarici Kəşfiyyat Xidməti təsis edildi. Bu bir daha göstərir ki, ABŞ-da hələ də Azərbaycanın möhtəşəm Zəfəri üzərinə tədqiqatlar aparılır və kəşfiyyat yetərsizliyi Ermənistanın məğlubiyyətinin əsas səbəblərindən olaraq dəyərləndirilir.
Cari ilin 15 noyabr tarixində ABŞ Nümayəndələr Palatasının altkomitəsində “Dağlıq Qarabağın Gələcəyi” adlı dinləmələr zamanı səsləndirilən fikirlər isə ( O`Braynın fikirləri xüsusilə əsassız və provokativ idi) ABŞ-ın siyasi dairələrində gizli və açıq şəkildə azərbaycanofobiya kampaniyası aparan qüvvələrin alqışına oynanmış siyasi gedişdən başqa bir şey deyildi. 2024-cü ildə ABŞ-da keçiriləcək Prezident və konqres seçkilərini nəzərə alsaq, bu alqış kampaniyasının niyə bu qədər artdığını da başa düşmək mümkündür".
N.Həmzəyev qeyd etdi ki, təhdidvari fikirləri ilə Azərbaycanın dərhal diplomatik qəzəbinə tuş gəlmiş O`Brayn Bakı səfəri haqqında “X” sosial şəbəkəsindən etdiyi paylaşımla Azərbaycan Respublikası Prezidenti ilə görüşü haqqında “konstruktiv danışıqlar” ifadəsini işlədərək, sülhün təmin edilməsinin regionda tarixi fürsətlərin önünü açacağını qeyd edib:
"Azərbaycan 44 günlük müharibə və ardından 23 saat 43 dəqiqəlik lokal anti-terror tədbirləri ilə ərazi bütövlüyünü tam şəkildə bərpa etdi. Bu Təhlükəsizlik Şurasının qətnamələrinin tələbi və BMT Nizamnaməsinə əsasən Azərbaycanın özünümüdafiə hüququ idi. ABŞ-ın coğrafi ərazilərindən minlərlə kilometr kənarda sülh və təhlükəsizlik adına hərbi tədbirlər keçirən Azərbaycanı öz ərazilərindəki işğalçı və seperatist-terrorist yuvalanmaya göz yummağa çağırması təbikii ağlabatan deyildi. Ermənistandan fərqli olaraq, Azərbaycanda xarici siyasət kursu dövlətin milli maraqlarından qaynaqlanır. Azərbaycan müstəqil, güclü və yeni reallıqların müəllifi olan dövlətdir. ABŞ həqiqətən də sülh və təhlükəsizliyə töhfə verməyə çalışırsa nəzərə almalıdır ki, sülh nə amerikan, nə də fransız silahları ilə təmin oluna bilər. Daimi sülhə nail olmaq üçün Azərbaycanın üzləşdiyi mina terroruna qarşı və işğaldan azad edilmiş torpaqların yenidən qurulmasına beynəlxalq səviyyədə dəstəyin verilməsi, qarşılıqlı faydalı münasibətlərin qurulması gələcək üçün daha perspektivlidir. Ümid edək ki, ABŞ rəsmiləri siyasi kampaniya naminə xarici siyasət mövqeyini ermənipərəst qüvvələrin oyunlarına alət etməyəcəklər".