İtaliyanın xarici işlər nazirinin müavini Edmondo Çirielli ölkəsinin aparıcı kütləvi informasiya vasitələrindən olan “Formiche” qəzetinə müsahibəsində Avropadakı ermənipərəst qüvvələri ifşa edib. Edmondo Çirielli bildirib ki, “təəssüf ki, Avropada erməni millətçiliyini və revanşizmini qızışdıranlar var”.
Açıqlama verən millət vəkili Naqif Həmzəyev italiyalı diplomatın məlum açıqlamasını dost ölkənin Azərbaycana növbəti dəstəyi kimi xarakterizə edib:
“Cənubi Qafqazda münaqişənin başa çatması Ermənistanın havadarlarının maraqlarına xidmət eləmir. Onlar düşünürdülər ki, hələ uzun illər Qarabağ problemi dondurulmuş halda qalacaq. Nəticə etibarı ilə Ermənistanın əli ilə burada istədiyini reallaşdıracaqlar. Yəni Ermənistanın vasitəsilə bölgəyə təsir imkanlarını günü-gündən artıracaqlar. Azərbaycan bütün bu planları alt-üst etdi. Azərbaycan öz gücü hesabına məlum problemi həll etdi. Xüsusilə də dövlətimizin suverenliyinin 2023-cü ilin 19-20 sentyabr lokal antiterror tədbirləri nəticəsində bərpa edilməsi ermənipərəst qüvvələri tamamilə özündən çıxardı.
Onlar başa düşürlər ki, Cənubi Qafqaza təsir imkanlarını itirə bilərlər. Həmin qüvvələrin Azərbaycanla bağlı planları puç olub. Buna görə də onlar Ermənistanı revanşizmə təhrik edirlər. Ermənistana silah-sursat tədarükünü həyata keçirmək mesajları verirlər. Ermənistandan çox erməni mövqeyindən çıxış edirlər. Faktiki olaraq Ermənistanı cəsarətləndirməyə çalışır, sülhün baş verməsinə maneçilik törədirlər.
İtaliya Avropada Azərbaycana dost ölkələrdən biridir. İtaliya XİN rəhbərinin müavini tərəfindən həqiqətin dilə gətirilməsi Azərbaycana növbəti dəstəkdir. Bu açıqlama bir daha göstərir ki, Azərbaycan doğru yoldadır.
Biz öz mövqeyimizi sonuna qədər müdafiə edəcəyik. Gec-tez Ermənistanı sülhə vadar etmək siyasətini uğurla tamamlayaraq regionda uzunmüddətli və dayanıqlı sülhə nail olacağıq”.