Avropa İttifaqı nazirləri Ermənistanda Azərbaycanla sərhədin gərgin olan ərazilərində "daha çox patrul həyata keçirəcək mülki missiyanın sayının artırılması" təklifini dəstəkləyiblər. Aİ-nin xarici siyasət və təhlükəsizlik siyasəti üzrə ali nümayəndəsi Jozep Borrell deyib ki, Avropa Sülh Fondunun vəsaitləri hesabına Ermənistana mümkün dəstək və Ermənistan vətəndaşları üçün "vizanın liberallaşdırılması" variantı da müzakirə olunub.
“Biz Ermənistanda sabitliyi pozmağa yönəlmiş istənilən cəhdlərə qarşı xüsusilə ayıq olmalıyıq - istər daxildən, istərsə də xaricdən. Azərbaycana mesajım aydın idi: Ermənistanın ərazi bütövlüyünə xələl gətirmək cəhdləri qəbuledilməz olacaq və münasibətlərimizin keyfiyyəti üçün ağır nəticələr doğuracaq”.
Millət vəkili Naqif Həmzəyev açıqlamasında bildirib ki, ermənipərəst siyasətçilər İrəvana təsir dairəsinin artırılması və öz mövqelərinin gücləndirilməsi üçün müxtəlif bəyanatlar verirlər.
Deputatın sözlərinə görə, Ermənistanın himayədarları Cənubi Qafqazda sülhə töhfə vermək əvəzinə, münaqişəni gərginləşdirmək və İrəvanı daha da cəsarətləndirmək yolunu tutublar: "Aİ nümayəndəsi Cozef Borrelin açıqlaması, şərti sərhədlərin yaxınlığında "daha çox patrul həyata keçirəcək mülki missiyanın sayının artırılması" məsələsi növbəti təxribatlardan biridir. Ermənistan vətəndaşlarına viza güzəştlərinin tətbiq edilməsi də bunun tərkib hissəsidir. Erməni lobbisinin təsir dairəsində olan siyasətçilər Rusiyanın Ermənistandan sıxışdırılıb çıxarılması və yaranacaq boşluğun doldurulması məqsədi ilə bu cür addımlar atırlar”.
Naqif Həmzəyev: İrəvan hökuməi çalışmalıdır ki, əldə etdiyi tarixi şansı düzdün dəyərləndirsin
Müsahibimiz hesab edir ki, Ermənistanda mövqelərini gücləndirmək niyyətində olan həmin dairələr şirnikləşdirici açıqlamalar verməkdə davam edəcəklər: “İstənilən halda Azərbaycan bütün bu təzyiqlərin, ermənipərəst mövqeyin qarşısını almaq iqtidarındadır. Azərbaycan tərəfi bizimlə münasibətlərdə səmimi olmayan siyasətçilərin reallıqları dərk etməsi üçün lazım olan addımları atır və bundan sonra da atacaq”.
“Ermənistan da bu oyunlara gəlməməlidir. İrəvan hökuməi çalışmalıdır ki, əldə etdiyi tarixi şansı düzdün dəyərləndirsin və Azərbaycanla münasibətlərin normallaşması yönündə addımlar atsın", - deyə Naqif Həmzəyev əlavə edib.