Torpaqlarımızın 20 faiz hissəsi 30 ilə yaxın müddətdə Ermənistanın işğalı altında qaldı.
Lakin Müzəffər Ali Baş Komandan İlham Əliyevin rəhbərliyi ilə şanlı Azərbaycan Ordusu tarix yazaraq 2020-ci ildə cəmi 44 günə Qarabağı işğaldan azad etməyi bacardı.
27 sentyabrda ermənilərin hücumu ilə başlayan müharibə 10 noyabrda Azərbaycanın Zəfəri ilə başa çatdı. Cari ilin 19 sentyabrda başlayan lokal antiterror tədbirləri nəticəsində isə ölkəmizin ərazi bütövlüyü tam şəkildə bərpa olundu.
Bütün bu zəfərin memarı isə dövlət başçısı İlham Əliyevdir. Çünki işğal altında olan torpaqlarımızın düşməndən azad edilməsi və Azərbaycanın bütün sərhədləri boyunca bayrağımızın dalğalanması bütün dövrlərdə Prezident İlham Əliyevin dövlət siyasətinin mütləq prioriteti və strateji hədəfi olub.
Bu gün isə həmin hədəfə nail olmağın haqlı qürurunu yaşayırıq.
Milli Məclisin deputatı Naqif Həmzəyev açıqlamasında bildirib ki, beynəlxalq təşkilatlar 30 ilə yaxın müddət ərzində keçmiş Qarabağ probleminin sülh yolu ilə həllinə töhfə verə bilmədilər:
"Əksinə, ATƏT-in Minsk qrupunun nümayəndələri sanki regiona turist səfərləri edirdilər. Onlar mandatlarının verdiyi imkanı düzgün dəyərləndirmədilər. Ancaq bu müddət ərzində həm Ulu Öndər Heydər Əliyevin hakimiyyəti dönəmində, həm də 2003-cü ildən sonra cənab Prezident İlham Əliyevin dönəmində münaqişənin Azərbaycanın xeyrinə həll edilməsi üçün mərhələli şəkildə işlər görüldü.
İlk növbədə, beynəlxalq platformalarda Azərbaycan həqiqətlərini əks etdirən sənədlər qəbul edildi və ölkəmizin haqq səsi dünyaya çatdırıldı. Həmçinin, Azərbaycan Ordusu yenidən quruldu, formalaşdırıldı, eləcə də gənclərin milli ruhda yetişməsinə önəm verildi və əhalinin sosial rifahı yaxşılaşdırıldı. Zamanı gələndə isə 44 günlük Vətən müharibəsində torpaqlarımızı işğaldan azad etdik".
Millət vəkili qeyd edib ki, kapitulyasiya aktını imzalamağa məcbur qalan Ermənistan son 3 il ərzində verdiyi sözləri və öhdəlikləri də yerinə yetirmədi:
"Məğlub olmalarına baxmayaraq, hər dəfə sülh danışıqlarından sonra təxribatlar törətdilər və proseslərə kölgə saldılar. Bütün bunlara baxmayaraq, Azərbaycan səbrlə Ermənistanın öhdəliklərini yerinə yetirməsini gözlədi. Təəssüflər olsun ki, rəsmi İrəvan bunu etmədi.
Növbəti mina terrorundan sonra isə Azərbaycan Ordusu cari ilin 19 sentyabrında məcburiyyət qarşısında qalaraq lokal antiterror tədbirləri həyata keçirdi. Bununla, həm Azərbaycanın suverenliyi bərpa olundu, həm də ölkəmizdəki separatçılığa və qondarma rejimin fəaliyyətinə son verildi.
Oktyabrın ayının 15-də isə cənab Prezident İlham Əliyev Xankəndidə, Xocalıda, Xocavənddə, Ağdərədə və Əsgəranda Azərbaycan bayrağını dalğalandırdı. Bununla da 30 il işğal altında qalan torpaqlarımız Azərbaycanın tam nəzarətinə keçdi.
Son 2 il ərzində Qarabağ və Şərqi Zəngəzurda aparılan quruculuq və abadlıq işləri artıq Xankəndi, Xocalı, Xocavənd, Ağdərə və Əsgəranda da həyata keçirilir. Bunun üçün xüsusi plan hazırlanır".
Naqif Həmzəyev vurğulayıb ki, Azərbaycan Prezidenti İlham Əliyev qarşısına qoyduğu bütün məqsədlərə çatdı:
"Dövlət başçısı verdiyi bütün sözləri yerinə yetirdi. Son 10 illiklərdə separatçılığın kökünü kəsən və münaqişəni ədalətli formada həll edən yeganə lider İlham Əliyevdir. Bu gün artıq keçmiş məcburi köçkünlər dədə-baba yurdlarına qayıdırlar. Biz inanırıq ki, tezliklə Xankəndi və digər ərazilərimizə də keçmiş məcburi köçkünlər qayıdacaqlar.
Həmçinin, Azərbaycan vətəndaşlığını qəbul edən ermənilər üçün də bütün lazımi şərait yaradılır və onların sosial təminatları qarşılanır. Onu da qeyd etmək lazımdır ki, birgə yaşayış üçün Azərbaycan tərəfindən xüsusi proqram hazırlanıb.
İnanırıq ki, Ermənistan da Azərbaycanın atdığı bu nümunəvi addımlardan nəticə və dərs çıxaracaq. Onlar da birgə yaşayışı təşviq edərək, buna töhfə verməyə çalışacaqlar.
Hesab edirəm ki, Azərbaycan Ermənistanı sülhə məcburetmə siyasəti də öz məntiqi nəticəsini tapacaq. Biz sevinirik ki, Azərbaycan nəhayət ki, bu problemləri həll etdi və ölkəmizin suverenliyi tam olaraq bərpa olundu".