"30 illik işğal dönəmində Ermənistan və onun havadarları, Qərb dairələri münaqişənin sülh yolu ilə həllinə töhfə vermədilər".
Bunu açıqlamasında millət vəkili Naqif Həmzəyev deyib.
Onun sözlərinə görə, ATƏT-in keçmiş Minsk qrupunun üzvləri regiona turistik səfərlər etdilər, öz mandatlarının onlara verdiyi imkanları düzgün dəyərləndirmədilər. Deputat qeyd edib ki, sabiq həmsədrlər münaqişənin yalnız sülh yolu ilə həlli variantının mümkünlüyünü dilə gətirərək hərb yolunu inkar etdilər. Bu yolla münaqişənin dondurulmasına, proseslərin Ermənistanın xeyrinə dəyişməsinə şərait yaratdılar: “Azərbaycan isə bu dairələrin oyunlarını pozdu və 2020-ci ildə ərazi bütövlüyünü bərpa etdi. Ali Baş Komandanın rəhbərliyi altında rəşadətli Ordumuz qanları, canları bahasına bu işin öhdəsindən gəldilər. Məhz bu proseslər Qərb dairələrinin heç də xoşuna gəlmədi. Ermənistanın imzaladığı üçtərəfli bəyanatın yerinə yetirilməsinə gizli formada, bəzən isə açıq formada maneçilik törətdilər. Sülhə yaxınlaşdığımızı düşündüyümüz anda erməni havadarlarının dəstəyi və təhriki ilə çoxlu sayda təxribatların şahidi olduq. Ermənistan təxribatlardan peşman olduğunu, yenidən sülh masasına qayıtmaq istədiyini desə də, sülhə heç bir töhfə vermədi. Hazırda da eyni proseslər davam edir. Azərbaycanın Laçın yolunda nəzarət-keçid məntəqəsi quraşdırması, antiterror tədbirləri, separatizmə son verməsi və suverenliyini bərpa etməsindən sonra Qərb dairələri, Ermənistanın havadarları anladılar ki, artıq regionda Ermənistana dəstək metodları tükənib".
Həmsöhbətimiz vurğulayıb ki, Azərbaycan onların oyunlarını tamamilə pozub: "Azərbaycan öz qaydaları ilə oynayır və regionda söz sahibidir. Region dövlətləri də Azərbaycanın mövqeyini və yaratdığımız reallıqları qəbul edirlər. Bu isə təbii ki, Ermənistanın və havadarlarının heç də xeyrinə deyildi. Ona görə də hazırda Fransa kimi ölkələr Ermənistanı silahlandırır. İrəvanı Rusiyanın təsirindən çıxardaraq tamamilə öz nəzarətlərinə keçirmək niyyəti güdürlər. Çünki Ermənistan onların nəzarətində olduğu təqdirdə regionda öz oyunlarını davam etdirəcəklər, təsir mexanizmlərini gücləndirəcəklər. Nəticə etibarilə hələ uzun illər burada öz varlıqlarını davam etdirəcəklər”.
Naqif Həmzəyev: Əgər İrəvan Bakının yaratdığı şəraiti düzgün dəyərləndirməsə uduzan birbaşa Ermənistan olacaq
Deputat bildirib ki, Azərbaycan isə regional problemlərin bölgədəki dövlətlər arasında həll edilməsi üçün Qafqaz Evinin formalaşdırılması ideyasını təşviq etməkdədir: “Biz kənar qüvvələrin bura müdaxiləsini qəbul etmirik. Düşünürük ki, özümüz istənilən problemin həllini tapa bilərik. Region dövlətləri bölgənin maraqlarından çıxış edərək mövcud problemlərin aradan qaldırılmasına nail ola bilər".
N.Həmzəyev təəssüflə bəyan edib ki, Ermənistan müstəqil qərar vermək iqtidarında deyil: "Ermənistanın hərbi siyasi rəhbərliyi həm "3+3" formatındakı görüşlərə qatılır, həm də Fransadan silah almaq üçün müqavilə imzalayır. Bu isə Ermənistanın növbəti riyakarlığı deməkdir. Fransanın Ermənistana dəstək mesajlarından və açıq formada silah verməsindən həvəsə gələn digər Qərb dairələri "biz də burdayıq" deyirlər. Ancaq Ermənistan unutmasın ki, Ukraynanı da təhrik edən və müharibəyə sürükləyən Qərb dairələri Kiyevi sona qədər dəstəkləmədilər”.
Onun sözlərinə görə, əgər İrəvan Bakının onun üçün yaratdığı şəraiti düzgün dəyərləndirməsə, sülh imzalanması prosesini uzatsa, uduzan birbaşa Ermənistan olacaq. Region layihələrindən onsuz da kənarda qalan Ermənistan özünü növbəti blokadaya salacaq.
“Ermənistanın silahlandırılması regionda yeni münaqişəyə gətirib çıxara bilər. Xüsusilə, Rusiya və İranın maraqlarına zidd olan bu proses Ermənistanın çox ağır və çətin vəziyyətə düşəcəyi ehtimalını irəli sürməyə imkan verir", - deyə Naqif Həmzəyev vurğulayıb.