"Tehranda "3+3" formatında görüş keçirildi və çox maraqlı məqamlar nəzərə çarpdı. "3+3" formatında keçən görüşdə ikitərəfli təmasların keçirilməsi, həmçinin yekun bəyanatda birgə sülhə çağırışların olması, regional təhlükəsizliyin təmin edilməsi vacib amillərdən idi".
Bunu açıqlamasında millət vəkili Naqif Həmzəyev deyib.
Deputat bildirib ki, belə bir görüşün baş tutması üçtərəfli formatda regional problemlərin həllinin mümkünlüyünə inamı artırdı: "Həmçinin, kənar güclərin regional məsələlərə müdaxiləsinin və regionda mövcudluğunun heç də faydalı olmadığı qənaətinə gəlindi. Bütün bunlarla yanaşı, Azərbaycan Zəngəzur dəhlizinin açılmasında maraqlıdır. Ancaq İran, Ermənistanla sərhəd faktoruna görə, bu layihənin reallaşdırılmasına elə də isti baxmır. Bu baxımdan Ermənistan da verdiyi sözü və öhdəlikləri hələ də yerinə yetirmir”.
Onun sözlərinə görə, məlumdur ki, proseslərin uzanmaması üçün Azərbaycan və İran arasında razılığa əsasən körpülərin, dəmir yolu və avtomobil yolu körpülərinin tikintisi ilə əlaqədar təməlqoyma mərasimi keçirildi: “Hazırda bu layihə üzərində iş həyata keçirilir. Son dönəm Ermənistan da açıq şəkildə Qərbə meyllənir ki, bu da nə Rusiyanın, nə də İranın maraqlarına xidmət edir".
Müsahibimiz diqqətə çatdırıb ki, İran və Rusiya Ermənistanı yenidən əvvəlki mövqeyinə qaytara bilmək üçün müxtəlif addımlar atırlar: "Eyni zamanda, İran Azərbaycanla yükdaşımalarının həyata keçirilməsində maraqlı olduğu kimi, Ermənistan üzərindən yük daşımalarının həyata keçirilməsinin vacibliyini anlayır. Ermənistanı itirməmək üçün Araz çayı üzərində Ermənistanla İranı birləşdirən yeni körpünün tikintisində maraqlı olduqlarını bildirir”.
Deputata görə, istənilən halda hər kəs anlayır ki, Ermənistan üzərindən yükdaşımalar o dərəcədə əlverişli deyil. Ermənistanın faktiki olaraq birbaşa dənizlərə çıxışı yoxdur: “Nəticə etibarilə İrəvan Gürcüstan, yaxud Azərbaycan və ya Türkiyə ərazisindən istifadə etməlidir. Həmçinin, Ermənistan ərazisindəki yolların yükdaşıma qabiliyyəti çox deyil. Çünki relyef baxımından çətin və qəliz bir ərazidən keçir. Azərbaycan ərazisindən isə yükdaşımalar çox əlverişlidir. Eyni zamanda Azərbaycan artıq yükdaşımaların həcminin artırılması üçün lazımi infrastrukturu formalaşdırıb".
Naqif Nəmzəyev: Nəticə etibarilə İrəvan Gürcüstan, yaxud Azərbaycan və ya Türkiyə ərazisindən istifadə etməlidir
Parlamentari düşünür ki, Azərbaycan ərazisindən yükdaşımalarla əlaqədar hər hansı irəliləyiş olduğu təqdirdə Ermənistan yenidən bu prosesdə kölgədə qalacaq: "İran və Ermənistan arasında tikiləcək yeni körpü gələcək üçün nəzərdə tutulmuş bir layihə kimi dəyərləndirilməlidir. Yükdaşımalar Ermənistan üzərindən həyata keçirilsə də, nəticə etibarilə həmin yüklərin Avropaya, eyni zamanda Rusiyaya daşınmasını həyata keçirmək üçün alternativ yollar Ermənistan ərazisində yoxdur. Gələcəkdə "3+3" formatında uğurlu nəticələr əldə edilərsə, ən əlverişli marşrut Azərbaycan üzərindən Rusiyaya yükdaşımaların həyata keçirilməsi, yəni Şimal-Cənub Dəhlizidir. Yaxın günlərdə İranın Astara ərazisində də dəmir yolu xəttinin tikintisi yekunlaşcaq. Belə olacağı təqdirdə asanlıqla Hind okeanından Rusiyanın şimalına qədər, hətta oradan Avropaya qədər yükdaşımaların mümkünlüyü reallaşacaq".