"Ermənistan tərəfi reallığı heç cür qəbul etmək istəmir, hərçənd ermənilər reallığın nədən ibarət olduğunu anlayırlar, dərk edirlər".
Bu sözləri açıqlamasında millət vəkili Naqif Həmzəyev deyib.
Deputat bildirib ki, Paşinyan hökuməti müəyyən dərəcədə sülhə meyillənsə də, ancaq Ermənistanın havadarları, xüsusilə də Paşinyanın himayədarları qarşısında götürdüyü öhdəliklər onun müstəqil addım atmasına imkan vermir. Onun sözlərinə görə, həmçinin, daxili auditoriyanın da təzyiqlərindən qorxan Paşinyan hökuməti ara-sıra verdiyi açıqlamalardan imtina edirlər. Bəzən həmin açıqlamalara təkrar şərhlər verərək ona düzəlişlər edirlər: “Bir sözlə, Paşinyan hökuməti təəssüflər olsun ki, müstəqil siyasət apara bilmir. Əslində isə gözəl anlayırlar ki, Ermənistanın gələcəyi Azərbaycan və Türkiyə ilə münasibətlərin normallaşmasından keçir. Eyni zamanda regional layihələrə qoşulmadan Ermənistanın təhlükəsizliyinin təmin edilməsi və Ermənistan iqtisadiyyatının inkişaf etməsi mümkün deyil. Bu baxımdan hələ də ümid edirik ki, Ermənistan hökuməti nəhayət, reallığı dərk etmək məcburiyyətində qalacaq”.
Müsahibimiz deyib ki, əlbəttə, Azərbaycanın sülhə məcburetmə siyasəti, bu günədək uğurlu nəticə verib, bu gündən sonra da bu siyasət davam etdiriləcək. İstənilən halda hər ötən zaman Ermənistanın əleyhinə işləməkdədir.
N.Həmzəyev vurğulayıb ki, Ermənistan ilk növbədə Azərbaycanın işğal altında olan 8 kəndini qeyri-şərtsiz geri qaytarmalıdır: "Zəngilandan Naxçıvana quru əlaqələrinin yaranması təmin edilməlidir. Ermənistan və Azərbaycan arasında kommunikasiyaların açılması təmin olunmalıdır. Erməni əsilli əhalinin Qarabağda, yəni Azərbaycan torpaqlarında yaşamaq hüququnu Azərbaycan tanıyırsa, Ermənistan tərəfi də dədə-baba yurdlarından didərgin düşmüş Qərbi Azərbaycanlıların öz torpaqlarına qayıdaraq orada yaşamaq hüquqlarını tanımalıdır. Qərbi Azərbaycan İcması ilə Paşinyan hökuməti arasında əlaqələr qurulmalıdır. Bu öhdəliklər və reallıqlar Ermənistan tərəfindən gec-tez qəbul ediləcək və yerinə yetiriləcək”.
“Azərbaycan işğaldan azad olunmuş torpaqlarımızda quruculuq və bərpa işlərini sürətlə davam etdirir, keçmiş məcburi köçkünlər artıq öz yurdlarına qayıdır. Cənubi Qafqazda Qafqaz ailəsinin formalaşması və uzunmüddətli dayanıqlı sülhün olması üçün bütün alətlərimizi işə salmışıq. Ümid edirik, nəhayət, Ermənistan da bu proseslərə töhfə verəcək və regionumuzda uzunmüddətli, dayanıqlı sülhü əldə edə biləcəyik", - deyə Naqif Həmzəyev əlavə edib.
Qeyd edək ki, Azərbaycanın xarici işlər naziri Ceyhun Bayramov deyib ki, indi Ermənistan regional əməkdaşlıq və qonşulularına qarşı qanunsuz və əsassız ərazi iddiaları arasında seçim etməlidir. Nazirin sözlərinə görə, bu məsələdə beynəlxalq ictimaiyyətin də rolu böyük əhəmiyyət kəsb edir: “Ermənistanın revanşist cəhdlərinin hər hansı bir şəkildə dəstəklənməməsi bu bölgənin rifahı və sülhün alternativinin olmamasına dair çağırışların edilməsi olduqca vacibdir”.