Azərbaycanın antiterror tədbirləri ilə Xankəndini azad etməsindən və Prezident İlham Əliyevin burada dövlət bayrağını qaldırmasından sonra vətəndaşlar tərəfindən bu şəhərdə yaşamaq üçün çoxsaylı müraciətlər edilir.
Hazırda Xankəndidən olmayan, lakin orada yaşamaq istəyən xeyli şəxsin olduğu bildirilir. Sosial şəbəkələrdə də bu cür istəklə bağlı xeyli paylaşımlar gözə dəyir.
Bəs Xankəndidə yaşamaq istəyən vətəndaşlar hara müraciət edə bilərlər? Onlara belə bir şərait yaratmaq olarmı?
Məsələ ilə bağlı danışan Milli Məclisin Əmək və sosial siyasət komitəsinin sədri Musa Quliyev bu məsələdə tələsməyə ehtiyac olmadığını deyib:
"Tək Xankəndidə yox, Şərqi Zəngəzur iqtisadi rayonunda və Qarabağ iqtisadi rayonunda vətəndaşlarımızın məskunlaşması üçün dövlətin proqramı var. Bu proqrama uyğun olaraq da hərəkət ediləcək. Məncə, bu məsələ ilə bağlı tələsməyə ehtiyac yoxdur".
Deputat onu da bildirib ki, Azərbaycanın hər bir vətəndaşının ölkənin istənilən ərazisində yaşamaq hüququ var:
"Qaçqınların və Məcburi Köçkünlərin İşləri üzrə Dövlət Komitəsi var. Ora müraciət edib məlumat ala, növbəyə dayana bilərlər. Hesab edirəm ki, hökumətin müvafiq qərarı olmadan hər hansı bir fikir söyləmək doğru deyil. Ancaq Azərbaycanın hər bir vətəndaşının ölkənin istənilən ərazisində yaşamaq hüququ var. Bunu müvafiq qurumlarla razılaşdırlaraq reallaşdıra bilərlər".
Milli Məclisin digər deputatı Naqif Həmzəyev Azərbaycanın antiterror tədbirlərindən sonra işğaldan azad olunmuş ərazilərində xüsusi işlər həyata keçirildiyini qeyd edib:
"Azərbaycan suverenliyini tam bərpa edib. Qarabağ və Şərqi Zəngəzurdan sonra Xankəndi, Xocalı, Ağdərə, Əsgəran, Xocavənd də tam olaraq Azərbaycan Silahlı Qüvvələrinin nəzarətinə keçib. Hazırda quruculuq, abadlıq, yenidənqurma işləri, vətəndaşlarımızın qayıdışı, eyni zamanda, erməni sakinlərlə birgəyaşayışın təmin edilməsi üçün lazımi tədbirləri həyata keçirilir".
Deputat Şuşa və Hadrutun işğaldan azad edilməsindən sonra da sözügedən ərazilərdə doğulmamış şəxslərin orada yaşamaq üçün çoxsaylı müraciətlər etdiyini söyləyib:
"Hələ ki həmin ərazilərdə doğulmuş insanların orada yaşayışı təmin edilir. Bununla bağlı Qarabağa qayıdış proqramı həyata keçirilir. Bunu unutmamalıyıq. Düşünürəm ki, Xankəndidə, Xocalıda, Ağdərədə yaşamaq üçün çoxsaylı müraciətlərin olması təbiidir. Çünki hər bir azərbaycanlı üçün Şuşada, Xocalıda, Xankəndidə yaşamaq və Azərbaycan dövlətinin maraqlarına xidmət etmək şərəfdir. Amma unutmamalıyıq ki, ilk növbədə o ərazilərdə yaşamaq hüququ olan keçmiş məcburi köçkünlərin qayıdışı təmin ediləcək. Bununla bağlı xüsusi işlər görülür. Aidayyətı qurumlar iclas keçirir, konkret layihələr hazırlanır. Bu işlər həyata keçirildikdən, orada yaşamaq sərbəst olduqdan sonra digər vətəndaşlarımız da orada gedib məskunlaşa biləcəklər. Gəncədə doğulan şəxs necə ki istədiyi vaxt Bakıya, Lənkərana köçə bilirsə, vaxt gələcək Qarabağda da eyni icazələr veriləcək".