Dövr keçdikcə texnologiya öz inkişaf prosesindən qalmır. İrəliləyir,böyüyür,”Qlobal” nüfuz qazanır. Təbii ki, bu qarşısıalınmaz inkişaf da özlüyündə mənfi və müsbət məqamları da gətirir. Həm sosial mühitə, həm də cəmiyyətin psixologiyasına (birbaşa və ya dolayı yolla) təsir göstərir. Bu təsirlərə görə, bəzi dövlətlər “Sosial Şəbəkələrə”qadağa və ya məhdudiyyətlər qoyub. Keçdiyimiz günlərdə də ölkəmizdə “TikTok” şəbəkəsinə dezinformasiya və lüzumsuz şayiələrin qarşısını almaq məqsədi ilə məhdudiyyət tətbiq edildi. Səbəbi həm hərbi sahədə yalan informasiyaların yayılaraq düşmən tərəfindən lazımi məlumatlarımızın ələ keçirilməsinin qarşısını almaq, həm də reallıq payı olmayan, əhalimizi təşvişə salıb psixologiyasına mənfi yöndən təsir etməsidir.
Hazırki vəziyyətin vətəndaşlara psixoloji təsiri ilə əlaqədar Psixoloq Əfsanə Rüstəmova açıqlama verib. Psixoloq deyir ki, cəmiyyətin həssas olduğu dönəmlərdə, onların məxsus olduğu həssas sosial qrupları da nəzərə alıb, kütləvi istifadə olunan şəbəkələrdə əsaslı və əsassız xəbərlərin paylaşılması, ümumiyyətlə, insan psixologiyasına təsir edir.
“İlkin mərhələdə nəzərə almaq lazımdır ki, bizim yaşadığımız tarixi dönəm itkilərlə kifayət qədər sıx-sıx rastlaşdığımız bir dönəmdir. Yaş etibarilə xalqımız ən azı üç böhran dövrü görüb. Belə insanların ölüm, faciə, ağrı, narahatlıq kimi xəbərlərə verdiyi reaksiya kifayət qədər böyük və köklü olur. Çünki onların buna(itkiyə)dair təcrübəsi əvvəlcədən formalaşıb. Onları nə qədər “Ağrıdacağını” dəqiq bilirlər.”
Deputat Naqif Həmzəyev məsələ ilə bağlı bildirib ki, ciddi səbəblər üzündən “TikTok”sosial platormasına girişdə məhdudiyyətlər tətbiq olunmaqdadır.
“Ehtimal var ki, bu səbəblər aradan qaldırıldıqdan sonra “TikTok”a giriş təmin ediləcəkdir. İstənilən halda biz unutmamalıyıq ki, bu cür sosial şəbəkələrdə Azərbaycan vətəndaşlarının şikayətləri və yaxud hansısa istəkləri gec təmin edilir. Çox vaxt müəlliflik hüquqları pozulur. Burada vətəndaşlarımızın şərəf və ləyaqətlərini alçaldan videolar izləyirik və həmin insanların razılığı olmadan onlarla bağlı hansısa fikirlər səsləndirilir”.
Deputat qeyd edir ki, təəssüflər olsun ki, bu şikayətlər də gec təmin olunur.
“Bunun da əsas səbəbi odur ki, həmin platformaların Azərbaycan üzrə regional ofisləri yoxdur və Azərbaycan qanunvericiliyi üzrə onlar öz fəaliyyətlərini təşkil etməyiblər”.