Prezident İlham Əliyevin hakimiyyətdə olduğu və ondan əvvəlki müddət hamar olmayıb. Çünki Heydər Əliyevin oğlu olmaq həm şərəfli, həm də məsuliyyətlidir.
Bunu bu gün Milli Məclisin İlham Əliyevin Prezident seçilməsinin 20-ci ildönümünə həsr olunmuş iclasında parlamentin Regional məsələlər komitəsinin sədri Siyavuş Novruzov bildirib.
Deputat deyib ki, Prezident İlham Əliyevə qarşı olan haqsızlıqların çoxunu bilirik: "Hələ o vaxt Heydər Əliyevə qarşı Qorbaçov və ətrafında olan ermənilərin ən ağrı zərbələrini məhz Prezident alıb. Demokratiya qırıntıları Heydər Əliyevin oğlu olduğuna görə İlham Əliyevin Naxçıvana getməsinin qarşısını alırdılar. Bax, bu cür ağrılı və əziyyətli proseslərdən keçib. Prezident İlham Əliyev 5 dövlət çevrilişinə cəhdin qarşısının alınmasında Ulu Öndərlə çiyinə-çiyinə çalışıb. Bundan başqa, 2003-cü ildəki seçkidən sonra AXCP-Müsavat dəstəsi Azadlıq meydanına tökülüşdülər. O zaman da İlham Əliyevin qətiyyəti nəticəsində çevrilişə cəhdin qarşısı alındı. Həmçinin dövlətimizin çörəyini yeyən Prezident Aparatının şöbə müdirləri, digər şəxslər çevriliş etmək istəyirdilər. Sonrakı dövrlərdə də İlham Əliyev Azərbaycana qarşı təxribat aparanların qarşısını aldı və nəticə qələbə ilə başa çatdı. Bir sözlə, Prezidentin gördüyü bütün işlər Ümummilli Lider Heydər Əliyevin siyasi xəttidir. 1920-ci ildən bu yana kimsə xalqın lideri hesab olunmayıb. Xalqın Ümummilli Lideri Heydər Əliyev, lideri isə İlham Əliyevdir”.
Deputat Vüqar İskəndərov isə çıxışında qeyd edib ki, müstəqillik tariximizin önəmli hadisələrindən biri də məhz 2003-cü il prezident seçkiləridir: “Nə yaxşı ki, xalq öz doğru sözünü dedi, Prezident İlham Əliyev səslərin 76%-dən çoxunu qazanmaqla, bugünkü qələbəmizin bünövrəsini qoydu. Bu gün xalq öz çiynini liderinə söykəyib. Nəhəng siyasətçilər onu heyrətlə izləyir, artıq bütün dünya bu siyasət qrossmeysterini tanıyır. Bu nailiyyətlərin əldə edilməsində Mehriban xanım Əliyevanın da xidmətləri misilsizdir və çox qiymətlidir. İlham Əliyevin adı tariximizə müzəffər sərkərdə kimi həkk olundu. O tarix yazdı və yazır. Qurucudur, yeni çağırışlarla xalqa yeni ölkə qurur”.
Deputat Fatma Yıldırım deyib ki, Azərbaycan xalqı olaraq mühüm tarixi hadisə ərəfəsindəyik: “Mövcud tarixi-siyasi, coğrafi şəraitdən, siyasi sistemin xüsusiyyətindən asılı olmayaraq, liderlik fenomeni milli dövlətin formalaşmasında və inkişafında həlledici rola malikdir. Lider həmçinin mənəvi birliyi təmin edən, cəmiyyətdə müəyyən əhval-ruhiyyənin, ideya və dəyərlər sisteminin formalaşmasına təsir göstərən mühüm qüvvədir. Cənab İlham Əliyev məhz belə Liderdir. Bu keyfiyyətlərin sayəsində ölkəmizdə siyasi sabitlik təmin olunub və gələcək inkişaf üçün zəmin yaradılıb. Ardıcıl olaraq həyata keçirilmiş məqsədyönlü islahatlar və genişmiqyaslı tədbirlər ölkəmizin iqtisadi və hərbi-müdafiə qüdrətini daha da gücləndirib və 44 günlük Vətən müharibəsində parlaq qələbənin qazanılmasına güclü zəmin yaradıb. Prezident İlham Əliyevin uzaqgörən siyasətinin məqsədi Azərbaycanın hərtərəfli inkişafı, xalqımızın firavan həyatı, ölkənin 30 ilə yaxındır ki, pozulmuş ərazi bütövlüyünün bərpası idi. Buna görə hər bir atılan addım Azərbaycanı Qarabağın azadlığına yaxınlaşdırırdı. 2020-ci ilin 27 sentyabrında başlanan Vətən müharibəsi Ali Baş Komandan İlham Əliyevin qətiyyəti, xalqın birliyi və Ordumuzun gücü nəticəsində Zəfərlə sona çatdı. Ötən ay isə rəşadətli ordumuz tərəfindən Qarabağda keçirilən 24 saatlıq lokal antiterror tədbirləri nəticəsində ərazilərimiz qanunsuz erməni hərbi birləşmələrindən tamamilə təmizləndi, separatçı rejim özünü buraxdığını elan etdi. Ərazi bütövlüyümüzün və suverenliyimizin bərpa olunması Prezident İlham Əliyevin siyasətinin şah əsəridir, zirvəsidir. Biz inanırıq ki, Prezidentimiz İlham Əliyevin və Birinci vitse-prezidentimiz Mehriban xanım Əliyevanın rəhbərliyi ilə görülən işlər nəticəsində bu torpaqlar dünyanın ən gözəl guşələrindən birinə çevriləcək! Bugün əminliklə demək olar ki, Prezident İlham Əliyevin liderliyi ilə Azərbaycan bundan sonra da böyük zəfərlərə, nailiyyətlərə imza atacaq!”.
***
saat 13.49
2000-ci illərin əvvəllərində yenə də Azərbaycan cəmiyyəti narahat idi. "Ulu Öndər Heydər Əliyevdən sonra ölkəni kim idarə edəcək, Ulu Öndərin başlatdığı işləri kim davam etdirəcək? Ölkənin gələcəyi necə olacaq?" sualları dövlətin taleyini və gələcəyini düşünən hər kəsi ciddi narahat edirdi.
Bunu bu gün Milli Məclisin İlham Əliyevin Prezident seçilməsinin 20-ci ildönümünə həsr olunmuş iclasında deputat Ceyhun Məmmədov bildirib.
Deputat deyib ki, bu gün əsas hədəflərdən biri Zəngəzur dəhlizinin ən qısa vaxtda açılmasıdır: “Biz əminik ki, İlham Əliyevin rəhbərliyi, qətiyyətli siyasəti nəticəsində Zəngəzur dəhlizinin açılacağı gün heç də uzaqda deyil. Bu gün atılan müdrik və uzaqgörən addımların bir hissəsi ona hesablanıb. Bu işdə möhtərəm Prezidentimizə yeni uğurlar arzulayırıq. Sonda şəhid ailələrinin bir israrlı arzu və təklifini diqqətə çatdırmaq istəyirəm. Onların arzusu xüsusi bir adın, ali mükafatın təsis olunması və Cənab prezidentin təltif olunmasıdır. Uca Allah Prezidentimizi, xalqımızı və ordumuzu qorusun”.
***
saat 12.22
Bilmirəm, bu mistikadır, yoxsa nədir, biz bu gün burada qələbəmizdən danışırıq, 100 metr yaxınlıqda Şəhidlər xiyabanında bizim müqəddəslərimiz rahat uyuyur, 150 metr o yanda həmin şəhidlərin qatilləri Dövlət Təhlükəsizliyi Xidmətinin binasında ifadə verirlər.
Bunu bu gün Milli Məclisin İlham Əliyevin Prezident seçilməsinin 20-ci ildönümünə həsr olunmuş iclasında deputat Elşən Musayev deyib.
Deputat bildirib ki, bəlkə də həmin şəhidlərin məzarlarına pəncərədən baxa-baxa ifadə verirlər: “Hərdən insana qəribə gəlir ki, bu, reallıq deyil, yuxudur. Bu reallıqdır və onu Prezident İlham Əliyev öz zəkası, cəsarəti ilə yaradıb. Mənim Prezidentlə bağlı bir məqaləm olmuşdu, bütün müxalifət liderləri həmin məqaləni paylaşıb məni söyürdülər. 2020-ci ildə qələbədən sonra mən həmin statusları axtardım, gördüm siliblər. 2020-ci ildə qələbədən sonra “müxalif”lər Xankəndi nə oldu? Bu, kapitulyasiya aktı deyil” deyirdilər. 2023-cü ilin sentyabrında antiterror əməliyyatlarından sonra isə mənə maraqlı idi ki, onlar nə yazacaq. Onların adını burda çəkmək istəməzdim, amma deyəcəyəm. Tofiq Yaqublu deyirdi ki, yəqin YAP Xankəndidə qərargah axtarır, Əli Kərimli isə Ermənistanın bizdən yaxşı durumda olduğunu iddia edirdi. Onlar təbrik etmək iradəsinə sahib deyillər”.
Milli Məclisin İnsan hüquqları komitəsinin sədri Zahid Oruc qeyd edib ki, Pənahəli xandan Rəsulzadəyə, Nərimanovdan, Bağırovdan, Elçibəydən Ulu öndər Heydər Əliyevə qədər müxtəlif formasiya və ideologiyalarda xalqımıza rəhbərlik edən şəxslərin yarımçıq qalan ideallarını gerçəkləşdirən İlham Əliyev əsrlərin lideri oldu: “45 günlük müharibədə qazanılan Zəfər, Zamanı və yaşadığımız yüz ili aşdığına görə dövlət başçısının statusu normativ prezident və Ali Baş Komandan titulundan daha üstündür. İlham Əliyev 45 günlük müharibədə qazanılan parlaq Zəfərlə milyonlarla azərbaycanlını 20 faizlik natamamlıqdan xilas etdi, bütöv vətəndaşla yeni - 4-cü Respublikanı qurdu. Cümhuriyyət, sovet dövrü, müstəqilliyin ilk illərindən ta 2020-ci ilə qədər ölkənin və xalqın siyasi təcümeyi-halı son 3 ilin dövləti ilə eyni deyil və biz fərqli milli kimliyə, yeni Respublikaya qovuşmuşuq. 8 noyabr Zəfər və 20 sentyabr “Bütövlük günü” 4-cü Respublikanın təvəllüd tarixidir. İndi fərqli siyasi təqvim-sülh erası başlayır. Əsrlərdir axan qan və göz yaşları nəhayət, durur və yeni ədalətli dünya nizamının əsası Qafqazda qoyulur. Rusiya-Ukrayna savaşına, yaxud böyük siyasi qəzaya çevrilən Qəzzadakı qanlı toqquşmalara son qoyulması üçün adil vasitəçiliyi haqq edən də İlham Əliyevdir. Yaxın Şərqdə savaşın şiddət və amansızlığı qələbəmizin əzəmətini, Azərbaycanın müharibəni ləyaqətlə apardığını və yeni hərbi qanunlar yazanlar üçün əsil Bakı Konvensiyasını dünyaya nümayiş etdirir. İlham Əliyevin liderliyi təkcə ötən 20 ilin deyil, daha çox gələcəyin - 2044-cü ilin Azərbaycanının aydın üfüqlərini yaradır. Nəinki ölkəmizin, eləcə də bölgəmizin sabahı İlham Əliyevin gələcək 20 illik kursundan asılıdır. Bakı, Tiflis və İrəvan arasında tarixi bağlar bərpa olunduqca, 200 il sonra ermənilər və bütün region xalqlarını iqtisadi rifaha qovuşduran arteriyalar açıldıqca, 200 km qısalan qədim yollar dirçəldikcə, dünya erməniçiliyi Azərbaycanla birgə sülhün və rifahın inşasına qoşulacaqlar. Qafqazın Marşal planı Qarabağda və dünyada sülh şüarı ilə barışın coğrafiyasını genişləndirəcək, ermənilər mifik tarixdən, Sprük və Miatsumdan qurtularaq Ermənistanı da xilas edəcəklər. Əslərdir bölgəmizə fəlakət gətirən “parçala və hökmr sür” siyasəti Əliyevin “birləşdir və firavan et” kursu ilə əvəz olunur”.
Deputat Naqif Həmzəyev bildirib ki, Prezident İlham Əliyev Qarabağ problemini birdəfəlik həll etdi: “Bu gün bütün dünya Azərbaycan Prezidentini sözündən dönməyən biri kimi tanıyır. Prezident İlham Əliyevin prinsipial mövqeyi özünü doğrultdu, düşmənə bir qarış belə torpaq verilmədi. Azərbaycan əsgəri Şuşaya yüngül silahlar, erməni kimi hiyləgər düşmənin belə ağlına gəlməyəcək yollarla qalxdı. Azərbaycan Erməistana hamilik edən güclərin planlarını puça çıxardı. Biz xalq olaraq özümüzə inamımızı bərpa etdik. Artıq sübuta yetirilib ki, sözümüz söz, imzamız imzadır. Azərbaycanın güclü lideri və hər zaman liderinin arxasında yumruq kimi duran xalqı var”.
Deputat Razi Nurullayev Prezident İlham Əliyevin ən böyük xidmətlərindən birinin dünyada baş qaldıran və günü-gündən daha da ruhlanan erməni separatizmini dayandırmaq olduğunu bildirib: “Erməni diasporunu zəiflətdi və onun liderlərindən biri olan Ruben Vardanyanı zərərsizləşdirdi, mənəvi cəhətdən sındırdı. Yoxsa, erməni separatizmi Türkiyədə, Gürcüstanda və Rusiyada da başlayacaqdı. Məhz bu xidmətinə görə də İlham Əliyev ayrıca mükafata layiqdir. Xərçəng kimi yayılan "dənizdən-dənizə" erməni ideologiyası "dağ çayından su kanalına" səviyyəsinə endi. Prezident İlham Əliyevin həyata keçirdiyi siyasəti, diplomatiyanı, regionda və dünyada gedən prosesləri öz xeyrinə həll etmə bacarığını ayrıca bir fakültə kimi, mərkəz kimi öyrənmək lazımdır. Prezident İlham Əliyevin etdiklərini və apardığı davamlı, zəncir kimi bir-birinə bağlı proseslərdən ibarət, eyni zamanda bir-birini məntiqi sonluqla tamamlayan, amma mürəkkəb bir siyasətin şahmat fiqurları kimi gedişlərini dünyanın heç bir hərbi və diplomatik məktəblərində öyrənmək mümkün deyil”.
Milli Məclis sədrinin birinci müavini Əli Hüseynli deyib ki, bəzi ölkələrdə hakimiyyətdə qalmaq üçün konstitusion quruluşu dəyişənlərdən fərqli olaraq, Prezident İlham Əliyev xalqın səsini alaraq hakimiyyətdə qalıb: “İndi Qarabağdakı qələbəmizlə oradan ermənilər təxliyə edilirlərsə, radikal müxalifət də Azərbaycandan təxliyə olmaqdadır. Prezident İlham Əliyev tarixi yenidən yazdı. Prezident İlham Əliyev öz qətiyyətli çıxışlarında tarixi həqiqətləri – AXC-nin Şuşanı verməsi, AXC-nin zor gücünə hakimiyyətə gəlməsini çəkinmədən dilə gətirdi, cəmiyyətdə populizmə son qoydu. Regionda məxməri inqilabların yetişdirdiyi marionet liderlərdən fərqli olaraq, İlham Əliyev güclü liderdir. İndi də bölgəmizdə Əliyevin sözü olmadan heç bir qərar qəbul edilə bilməz. Məhz Heydər Əliyev siyasəti bu gün Qarabağı işğaldan azad etdi, məhz Heydər Əliyev siyasəti Qafqazda sülhü daimi edəcək”.
***
saat 11.43
Azərbaycanın dövlət müstəqilliyinin möhkəm əsasları Ulu öndər Heydər Əliyev tərəfindən qoyulub. Qürur hissi ilə bu gün deyə bilərik ki, dövlət müstəqilliyinin qorunması, ərazi bütövlüyünün tam təmin olunması Prezident İlham Əliyevin Azərbaycan xalqı qarşısında ən böyük xidmətlərindən biridir.
Bunu bu gün Milli Məclisin İlham Əliyevin Prezident seçilməsinin 20-ci ildönümünə həsr olunmuş iclasında Azərbaycan Milli Elmlər Akademiyasının prezidenti, deputat İsa Həbibbəyli deyib.
Deputat bildirib ki, Prezident İlham Əliyev ərazi bütövlüyümüzü tam bərpa etməklə adını tarixə həkk edib: “İlham Əliyevin Azərbaycana rəhbərlik etdiyi 20 ilin hər ili möhtəşəmdir”.
Deputat Elşad Mirbəşir qeyd edib ki, Prezident İlham Əliyev sözün əsl mənasında inqilab edə bildi: “Bu gün Cənubi Qafqaz Prezident İlham Əliyevin strateji baxışları nəticəsində artıq həm də Avropaya açılan bir qapıdır. Cənubi Qafqazda həyata keçirilən nəqliyyat-logistika layihələri sayəsində Avropanın istehlak bazarında çox ciddi dəyişikliklər baş verib. Bu gün Cənubi Qafqaz təkcə Orta Asiyaya deyil, həm də Avropaya açılan qapıdır".
Deputat XXI əsr boyunca ilk dəfə olaraq separatizm ocaqlarının sayının azaldığını nəzərə çatdırıb: "Bu da Azərbaycan Prezidentinin həyata keçirdiyi inqilabi dəyişiklikdir. Artıq aktiv separatizm ocaqlarının sayı 51-dir. XX əsr boyunca separatizm ocağı söndürülməsinə dair bir fakt mövcud deyil. Amma Azərbaycan prezidenti separatizm ocağını söndürməyə nail oldu və qlobal təhlükəsizliyə mühüm töhfə verdi. Azərbaycan Prezidenti ölkəmizin, ümumilikdə regionun əhəmiyyətini artırıb. 2020-ci ilə qədər Azərbaycan Prezidenti dünyanın güc mərkəzlərində torpaqlarımızı siyasi yolla işğaldan azad etdi, 2020-ci ildə isə hərbi yolla torpaqlarımızı azad etməyə nail oldu”.
Parlamentin Elm və təhsil komitəsinin sədri Bəxtiyar Əliyev diqqətə çatdırıb ki, bu gün azad edilmiş Qarabağ və Şərqi Zəngəzur ağıllı şəhər, qəsəbə, kənd sistemiylə qurulur: “Bütün bunlar onu göstərir ki, Prezident İlham Əliyev prezident olduğu dövrdə yalnız öz xalqının xoşbəxt gələcəyini düşünüb. Bu gün Azərbaycanın həyata keçirdiyi uğurlu siyasət onu dünya siyasətində əhəmiyyətli aktora çevirib. Bu gün İlham Əliyevin müdrik siyasəti nəticəsində Azərbaycan xalqı demokratiya yolunda inamla addımlayır”.
Deputat Tural Gəncəliyev bildirib ki, bu gün biz Prezident İlham Əliyevin həyata keçirdiyi daxili və xarici siyasətinin necə uğurlu olduğunu görürük: “Prezident İlham Əliyevin fəaliyyətinin zirvə nöqtəsi torpaqlarımızın işğaldan azad edilməsidir. Həm daxili, həm də xarici siyasətdə strateji, dərin vizyonun olması bu məsələdə özünü göstərdi. Bu gün Avropa ölkələrinə baxanda onların probleminin əsas səbəbi güclü liderlərinin olmaması olduğunu görürük. Bizim isə güclü liderimiz var. Prezidentə təşəkkür edirəm ki, doğulduğum Xankəndi şəhərini, boya-başa çatdığım Şuşa şəhərini bizə qaytardı”.